Read Sidama_Qullaawa _Maxaafa YOHAANNISI 9 Bible Online

YOHAANNISI 9 - Sidama_Qullaawa _Maxaafa bible

YOHAANNISI 9

¹Yesuusi doogo sae ha'ranni hee're, illiweele ilamino mancho afi.

²Rosaanosi Yesuusa, «Rosiisaancho, kuni manchi illiweele ilaminohu ayi loosino cubbinniiti? Isinso iltinosiri loossino cubbooti?» yite xa'mitu.

³Yesuusi, «Kuni manchi illiweele ilaminohu, isi woy iltinosiri loossino cubbinni di"ikkino; ikkollana Maganu loosi isi aana leellanno gedeeti.

⁴Barru hee'reenna soyinoehu looso loosa hasiissannoe. Ayino loosa dandaannokkihu hashshu daanno.

⁵Ani baattote aana noommo geeshsha baattote xawaabbaati» yii.

⁶Hatto yiihu gedensaanni uulla anja tufe, anjunni liisamino sabba illiweelu illera buuri.

⁷Hakkiinni, «Cuuammanniwa Selihoomi marte hayishshi'ri!» yiisi. (Selihoomi yaa Sonkoonniho) yaate. Manchuno ha're hayishshi're la"anni higi.

⁸Olliisinna alba huucci'ranna afinosi manni, «Kuni diofolle huucci'ranna anfummo manchooti?» yitu.

⁹Gamu, «Ee, isooti» yitu. Gamu qolte, «Isolla lawannona iso di"ikkino» yitu. Isi kayinni, «Ee, aneetiwe» yii.

¹⁰Insano, «Illekki hiitto ikkite fa'nituheyya?» yitu.

¹¹Isi qole, «Yesuusa yinanni manchi sabba liise ille'yara buure, ‹Marte Selihoomi hayishshi'ri!› yiie. Anino mare hayishshi're la"a dandoommo» yii.

¹²Insa qolte, «Xa hakku manchi hiikko nooyya?» yitu. Isino, «Ani diafoommo» yii.

¹³Hakka woyite mannu hakkonne huri illiweelo haa're Farisootunniwa massi.

¹⁴Yesuusi sabba liise manchu ille hursinohu Fooliishshote Barraati.

¹⁵Farisootu, «Hiitto ikkite la"a dandiitto?» yite mancho ledde xa'mitusi. Isino, «Ille'yara sabba buureenna hayishshi're, la"a dandoommo» yii.

¹⁶Gamu Farisooti, «Kuni manchi Fooliishshote Barra diayirrisannona, Maganuwiinni dayinoha di"ikkino» yitu. Gamu kayinni, «Cubbaataamu manchi togoo maalale loose dandaannoni?» yitu. Kunninni kainohunni mereeronsa babbadooshshu kalaqami.

¹⁷Kunnira ille fa'nitusi mancho ledde, «Ati, ‹llle'ya faninoe› yiitto manchi daafira ma yaatto?» yitusi. Isi qole, «Himanaanchoho» yii.

¹⁸Ayihudete roorrooti, kuni manchi illiweelo ikkinotanna gedensaanni illesi fa'nitinota iltinosire woshshite xa'mita geeshsha diammantino.

¹⁹Kunnira, iltinosire woshshite, «‹Illiweele ilamino› yitinihu beetti'ne konneeti? Xa hiitto ikke la"a dandiiyya?» yite xa'mitunsa.

²⁰Iltinosirino, «Kuni ee beettonkeeti; illiweele ilaminota anfoommo.

²¹Xa kayinni hiitto ikke la"a dandiinoronna ille faninosihu ayetiro dianfoommo. Isi umisinni xa'minoonnire qo'la dandaanno geeshshi manchootina, iso xa'me» yitu.

²²Iltinosiri hatto yitinohu Yesuusa, «Kiristoosaati» yaannoha xaadu mininni fushshine hunnanni gede kulloonni daafira Ayihudete roorroota waajjiteeti.

²³Iltinosiri, «Isi xa'minoonnire qo'la dandaanno geeshshi manchootina iso xa'me» yitinohu kunniraati.

²⁴Hakkonne illiweele ilame huri mancho layinkimeeshsho woshshite, «Ati halaale coyi'ratenni Magano ayirrisi; kuni manchi cubbaataamo ikkinota ninke anfoommo» yitu.

²⁵Isi kayinni, «Isi cubbaataamo ikkasinna hoogasi ani diafoommo; ani afoommohu mitto coyeti. Hakkuno, ani kunni albaanni illiweeloho; xa kayinni kune la"anni noommo» yiinsa.

²⁶Insano, «Ma assihe? Illekki hiitto asse fanihe?» yite xa'mitusi.

²⁷Isi daware, «Alba balaxe kuloommo'ne; kayinni dimacciishshitinoonni. Xaano leddine macciishsha mayira hasidhinanni? Ki'neno isi rosaano ikka hasidhinoonnini?» yiinsa.

²⁸Insa xontanni, «Isi rosaanchi ateeti! Ninke Muse rosaanooti.

²⁹Maganu Musera coyi'rinosita anfoommo; kuni maminni dayinohoro dianfoommo» yitusi.

³⁰Manchu kayinni, «Kuni manchi maminni dayinoro afa hooga'ne maala'linannite. Anera ille'ya fanihu kayinni isooti.

³¹Maganu cubbaataammunnire macciishshannokkita egenninoonni. Maganu ayirrisannohurenna hedosi wonshannohunnire kayinni macciishshanno.

³²Baatto kalaqantuhunni kayise, ‹Illiweele ilaminoha hursino› yinanna anfe egenninoonnihu horonta dino.

³³Kuni manchi Maganuwiinni daa hoogoommero, mittoreno assa didandaanno» yii.

³⁴Insa qolte, «Cubbunni sona ba'e ilamoottohu kuni, ninke rosiisattoraatini?» yite xaadu mininni fushshite huntusi.

³⁵Yesuusi mancho xaadu mininni fushshite huntinosita macciishshi. Isi ledo xaadi woyite, «Manchi Beetto amma'natto?» yee xa'misi.

³⁶Isino, «Mooticha'ya, amma'neemmosina isi ayeti?» yii.

³⁷Yesuusino, «Kunni albaannino afoottosi; xa hasaawisanni noohehuno isooti» yiisi.

³⁸Manchu qole, «Mooticha'ya, maahoyye amma'neemmo» yee albasiinni kumbuuli.

³⁹Yesuusino, «La'annokkiri la'anno gede, la'annori ballitanno gede, ani tenne gobba yoo yaammora dayommo» yii.

⁴⁰Hatte yannara Yesuusi mule noo Farisooti yiino coye macciishshite, «Hatto yaatto woyite, ninkeno ballootaho yaateni?» yitu.

⁴¹Yesuusi qole, «Balloota ikkitinoommero, cubbo di"ikkanno'ne; xa kayinni, ‹La'nanni hee'noommo› yitinanni daafira, cubbi'ne ledo'ne hee'ranno» yiinsa.