Read Sidama_Qullaawa _Maxaafa SOQQAMAASINETE LOOSO 1 Bible Online

SOQQAMAASINETE LOOSO 1 - Sidama_Qullaawa _Maxaafa bible

SOQQAMAASINETE LOOSO 1

¹Tewofiloosi: Umi borro'yara Yesuusi loosinorenna rosiisinore baala borreessoommo. Borreessoommohu Yesuusi loososi hanafihunni kayise,

²gordo fuli barri geeshsha nooreeti. Gordo fulinohu, doodhinonsa soqqamaasinera Qullaawu Ayyaaninni hajajo uyinsahu gedensaanniiti.

³Lowo qarra adhe reyihu gedensaanni batinye hige daanni, heeshshonniha ikkasi leellishinonsa. Shoyilloo barra wo'ma leellanninsa Maganu gashshootire rosiisinonsa.

⁴Ledonsa hee'ri yannara, «Ani kuloommo'neha Anni'ya uyinoe hexxo agadhe ikkinnina Yerusaalametenni fultinoonte.

⁵Yohaannisi wayinni cuuino; ki'ne kayinni shiimu barri gedensaanni Qullaawu Ayyaaninni cuuantinanni» yee hajajinsa.

⁶Insa mitteenni gamba yite heedheenna, «Mootichanke! Israeelete Gashshoote xaanni galagalchite qolattoni?» yite xa'mitusi.

⁷Yesuusi kayinni, «Annu roorresinni hirqino yannanna diro afate ki'nera diuyinoonni'ne.

⁸Ikkollana Qullaawu Ayyaani ki'ne aana dirranno yannara wolqa adhitinanni. Hakka woyite Yerusaalamete, Yihuda baalaho, Samaariyahonna gobbate qacce geeshsha naqaashshe'ya ikkitinanni» yiinsa.

⁹Hatto yiihu gedensaanni, insa la'anni heedheenna gordu iimira fuli. Gomichu guggushshe albinsanni golisi.

¹⁰Isi gordu iimira fulanna, rosaanosi iima higge la'anni heedheenna lamu waajjo uddano uddidhino mannooti mulensa uurrite,

¹¹«Ki'ne Galiilu manna, iima higgine la'inanni kawiicho mayira uurritinoonni? Iima hige ha'ranna la'ini Yesuusi, iima hige ha'ranna la'ini garinni galagale daanno» yitunsa.

¹²Hakkunni gedensaanni Ejedhete Ilaalinni dirrite Yerusaalame higgu. Ejedhete Ilaali Yerusaalametenni mitte kiilo metire ha'risanno.

¹³Yerusaalame dagge minu aana minnoonni minira fultu. Insa, Pheexiroosi, Yohaannisi, Yaiqoobi, Indiriyaasi, Filiphoosi, Toomaasi, Bertelemewoosi, Maatiyaasi, Ilfiyoosi beetti Yaiqoobi, Laalaataanchu Simiooninna Yaiqoobi beetti Yihudaati.

¹⁴Kuri baalu wo'manka woyite huuccattote mitteenni gamba yitanno. Insa ledo mitu mitu meenti, Yesuusi ama Maariyaaminna Yesuusi roduuwi no.

¹⁵Hatte yannara Pheexiroosi 120 ikkitanno ammanaano mereero uurre,

¹⁶«Roduuwa'ya, Yesuusa amadi mannira albisa ikkino Yihudire, Qullaawu Ayyaani balaxe Daawiti widoonni qole kulinoti qullaawa borro adda ikkitino.

¹⁷Yihudu ninke ledo noo yannara ledonke soqqamino.

¹⁸«Kuni manchi loososi mixxino; alba hige uwe lamewa fulino; helleesino du'nantino.

¹⁹Konne coye Yerusaalamete hee'ranno manni baalu macciishshino. Kunnira hatte baattora insa afiinni, ‹Akelidaama› yine su'ma fushshinoonni. Hatto yaano, ‹Mundeete baattooti› yaate.

²⁰«Kuni ikkinohu faarsote giddo, ‹Baattosi mulla ikkito; galannohuno hee'roonke; gashshootesino wolu adho› yine borreessinoonni daafiraati.

²¹«Kunnira Mootichinke Yesuusi ninke ledo ha'rami yanna baalate ninke ledo noori,

²²hattono Yohaannisi cuuanni kayise Mootichu Yesuusi gordu iimira fuli barri geeshsha ledonke noori kunni manni giddonni mittu kaote naqaashshe ikka hasiissanno» yii.

²³Kunnira lame mancho shiqishshu; insano Bersabaasi, woy Yusixoosi yinanni Yooseefiitinna Maatiyaasiiti.

²⁴Hakkunni gedensaanni, «Mannu baalu wodana afattohu Mootichanke, kunni lamunku giddonni hiikkonne doodhoottoro leellishinke.

²⁵Yihudi umisi doogo ha're agurino soqqanshonna isi darga amade soqqamaasincho ikkannoha leellishattonke gede huucci'neemmohe» yitu.

²⁶Hixa tungi woyite, hixu Maatiyaasira fuli. Kunnira isi tonaalayinki soqqamaasincho ikke kiirami.