Read Sidama_Qullaawa _Maxaafa SOQQAMAASINETE LOOSO 10 Bible Online

SOQQAMAASINETE LOOSO 10 - Sidama_Qullaawa _Maxaafa bible

SOQQAMAASINETE LOOSO 10

¹Qiisaariyaho Roomu olanto hunda, Ixaaliyu Garo yinannitera xibbu roorricha ikkinohu mittu Qornelewoosi yinanni manchi no.

²Isi minisi manni ledo Magano magansi'rannohonna Magano waajjannoho. Buxaneteno lowo woxe aanno. Wo'manka woyite Magano huucci'ranno.

³Mitto barra honse saatera Maganu sokkaasinchi isiwa e"e, «Qornelewoosi!» yee woshshannasi ajuujatenni mucci asse afino.

⁴Waajje sokkaasincho seekke lae, «Mooticha! Maati?» yii. Sokkaasinchuno, «Huuccattokkinna buxanete ootto kaa'lo dancha qaaggo ikkite Maganoho leeltino.

⁵Xa manna Iyophe soqqite Pheexiroosi yinanniha Simiooni woshshiishi'ri!

⁶Isi xa baaru mule noohuwa goga duugannohu Simiooni mine wosinchimma ofolle no» yiisi.

⁷Konne kulisi sokkaasinchi isiwiinni ha'rihu gedensaanni Qornelewoosi, soqqamaanosi giddonni lame mannanna olantosi garo giddonni mitto Magano waajjannoha woshshe,

⁸baalanka coye kulinsahu gedensaanni Iyophe hadhanno gede assi.

⁹Layinki soodo insa marte katama iilla rakkuta, Pheexiroosi lee saate ikkanno hedora minu aanaanni minnoonni mini giddo huuccatto assi'rara fuli.

¹⁰Hatte yannara Pheexiroosi hudi're sagale itara hasi'ri. Sagale iillitanni heedheenna ajuuja afi.

¹¹Ajuujatenni gordu fa'nameenna mittu hala'ladu hocci shoole maddenni uullara dirranna afi.

¹²Hakkunni hala'ladu hocci aana addi addi saada, godowunni ha'ranno kalaqaminna iima bubbanno cea no.

¹³Hatte yannara, «Pheexiroosi, ka'e gorrite iti!» yitanno huuro macciishshi.

¹⁴Pheexiroosi, «Mooticha'ya! Di"ikkanno! Ani lagonnire woy batte ikkinore ite diegennoommo» yii.

¹⁵Qole, «Maganu faansinoha ati battete yitooti» yitanno huuro macciishshi.

¹⁶Kuni coyi sase hige ikkihu gedensaanni hakku hala'ladu hocci hakkawoyintenni galagale gordu iimira fuli.

¹⁷Pheexiroosi ajuujate tiro afara quqquxamanni hee'reenna, Qornelewoosi soyi manni Pheexiroosi mine xa'misiisse iillite marte nafara uurrite no.

¹⁸Mine qolte woshshite, «Pheexiroosi yinanni Simiooni wosinchu konniicho nooni?» yite xa'mitu.

¹⁹Pheexiroosi laino ajuujare hedanni hee'reenna, Qullaawu Ayyaani, «Kuneeti sasu manchi hasidhanni noohe;

²⁰soommohu aneetina mittoreno huluullamittokkinni ka'e dirrite insa ledo ha'ri!» yiisi.

²¹Pheexiroosino dirre mannootunniwa mare, «Kuneeti, hasidhinannihu aneeti; mayira hassinoonnie?» yiinsa.

²²Insano, «Ninke xibbu roorrichi Qornelewoosi soyennanke dangoommo. Iso Ayihudete manni baalu ayirrisannosi; keeraanchohonna Magano waajjanno manchooti. Ate minisira woshshi're ati yaattore macciishshanno gede Maganu sokkaasinchi kulinosi» yitu.

²³Pheexiroosi insa minira eesse hasiisannore baala shiqishe galtanno gede assi. Layinki soodo fule insa ledo ha'ri. Iyophe heedhanno roduuwi giddonni mitu mitu isi ledo hadhu.

²⁴Layinki barra Qiisaariya iillitu. Qornelewoosi fiixasinna muli jaallasi woshshe, ledonsa Pheexiroosi agare no.

²⁵Pheexiroosi minira eanni hee'reenna, Qornelewoosi isiwa shiqqi yee lekkasira uwi.

²⁶Pheexiroosi kayinni, «Gotti yii! Ani ate gedee manchooti» yee amade kayisisi.

²⁷Ledosi hasaawanni minira e"e, gamba yee nooha lowo manna afi.

²⁸Pheexiroosi mannaho, «Ayihudete ilama ikkinohu wolu manni ledo hosannota amma'nonke garinni seeru hoolannota ki'nenni affinoonni. Maganu kayinni ayeno lagaawinoho woy battaawinoho yeemmokki gede leellishinoe.

²⁹Kunnira woshshinieta mittoreno moromummokkinni dayommo. Xa mayira woshshitinoonniero kulle"e» yiinsa.

³⁰Qornelewoosi, «Shoolu barrira albaanni, tenne yannara honse saatenni huuccatto assi'ranni hee'reenna, hedeweelcho mitte bilicci yitanno uddano uddi'rino manchi daye alba'yaanni uurre,

³¹‹Qornelewoosi! Maganu huuccattokki macciishshinohe; buxanete ootto kaa'lono qaaginohe.

³²Kunnira Iyophe manna sokke Pheexiroosi yinanniha Simiooni woshshi'ri. Isi baaru mule goga duugannohu Simiooni mine wosinchimma ofolle no› yiinoe.

³³Atewa manna soqqoommohu kunniraati; atino dancha dayotto. Xa Mootichu kulattora hajajinohere baala macciishshate, ninke baalunku Maganu albaanni gamba yine hee'noommo» yii.

³⁴Pheexiroosino, «Halaalinta Maganu manna mallaadannokkita xa buuxoommo.

³⁵Aye gosano ikkiro Maganu waajjannosihanna dancha loosannoha baxanno.

³⁶Maganu soyino qaali, baalunku Mooticha ikkinohu Yesuusi Kiristoosi widoonni hige keerunnihu Danchu Duduwi kulamanna Israeelete mannira iillanno gede sonkoonniha ikkinota egentinoonni.

³⁷Yohaannisi cuuamannire kulihu gedensaanni, Galiilunni kayise Yihudu gobba baalate ikkinore affinoonni.

³⁸Qoleno Maganu Naaziretete Yesuusa Qullaawu Ayyaaninni buurinotanna wolqa uyinosita affinoonni. Maganu isi ledo noo daafira danchare assanninna Sheexaanu amadino manna baala hursanni gobba duucha tuqino.

³⁹Yihudahonna Yerusaalamete isi assino coyi baalaho ninke naqaashshete. Insa kayinni haqqu aana sutte shitinosi.

⁴⁰Ikkollana Maganu sayikki barra reyotenni kayise leellanno gede assino.

⁴¹Leellinohuno Maganu umo asse doorino naqaashsheraati ikkinnina manna baalaho di"ikkino. Isi reyotenni kaihu gedensaanni isi ledo inte angoommori ninke naqaashshete.

⁴²Isi nooriranna reyitinorira yoo yaanno gede Maganu doorinoha ikkinota farci'neemmo gede hajajinonke.

⁴³Iso amma'ninohu baalu su'misinni cubbu maaro afi'rannota himanaano baalanti farcidhino» yii.

⁴⁴Pheexiroosi coyi'ranna konne qaale macciishshi manni baalu aana Qullaawu Ayyaani dirri.

⁴⁵Pheexiroosi ledo dagginori Ayihudete ammanaano, Maganu dagate Qullaawa Ayyaana dirrisanna la'e, lowo geeshsha dhaggeeffattu.

⁴⁶Hakkuno, daga haaru afiinni coyidhannanna Magano galattanna macciishshitinohuraati. Hatte yannara Pheexiroosi,

⁴⁷«Kuni manni ninkente gede Qullaawa Ayyaana adhino; xa insa cuuama hoolannonsahu nooni?» yee coyi'ri.

⁴⁸Kunnira Yesuusi Kiristoosi su'minni cuuantanno gede hajajinsa. Hakkunni gedensaanni Pheexiroosi insa ledo shiima barra keeshshanno gede huuccidhusi.