Read Sidama_Qullaawa _Maxaafa SOQQAMAASINETE LOOSO 11 Bible Online

SOQQAMAASINETE LOOSO 11 - Sidama_Qullaawa _Maxaafa bible

SOQQAMAASINETE LOOSO 11

¹Yihudu gobbara heedhanno soqqamaasinenna roduuwu, daga Maganu qaale adhitinota macciishshitu.

²Pheexiroosi galagale Yerusaalame ha'ri yannara barcintino ammanaano bushiishshannisi,

³«Barcimtinokkiri minira e'e insa ledo sagale mayira ititto?» yitu.

⁴Kunnira, Pheexiroosi ikkino coye baala gudise kulanninsa,

⁵«Ani Iyophe katamira huuccatto assi'ranni hee'reenna ajuuja leeltinoe. Ajuujatenni, mittu hala'ladu hocci shoole maddenni iiminni dirre anewa daanna afoommo.

⁶Isi widira qole buuxe laeemmo woyite, hoccu aana addi addi saada, godowunni ha'ranno kalaqaminna iima buubbanno cea no.

⁷Hakkawoyite, ‹Pheexiroosi, ka'e gorrite iti!› yitanno huuro macciishshoommo.

⁸«Ani kayinni, ‹Mooticha'ya! Di"ikkanno! Ani lagonnire woy batte ikkinore ite diegennoommo› yoommo.

⁹Layinkimeeshshono gordunni, ‹Maganu faansinoha ati battete yitooti› yitanno huuro macciishshoommo.

¹⁰Kuni coyi sase hige dayihu gedensaanni baalunkuri galagale gordo hige ha'rino.

¹¹Hakkawoyintenni Qiisaariyunni anewa sonkoonniri sasu manni ani noommo minira ka'e daggu.

¹²Mittoreno moromummokkinni ledonsa ha'reemmo gede Qullaawu Ayyaani kulinoe. Kuri leyunku roduuwino ledo'ya no. Insa ledo Qornelewoosi yinanni manchi minira marre e'noommo.

¹³Isino Maganu sokkaasinchi minesi uurre nooha afinotanna, ‹Iyophe noohuwa Pheexiroosi yinanni Simiooniwa manna soqqi.

¹⁴Isi atinna minikki manni baalu gattinanni qaale kulannohe› yiinosita kulinonke.

¹⁵«Ani coyi'ra hanafummota, Qullaawu Ayyaani alba ninke aana dirrinte gede insa aanano dirrino.

¹⁶Hatte yannara, ‹Yohaannisi wayinni cuuino; ki'ne kayinni Qullaawu Ayyaaninni cuuantinanni› yee Mootichu coyi'rino qaali qulli yiie.

¹⁷Ninke Mooticha Yesuusa Kiristoosa amma'ninummo waro Maganu ninkera uyinke elto insara uyiro, Magano hoolate anera wolqa nooeni?» yiinsa.

¹⁸Insa konne coye macciishshitu yannara qoltannore hoogge Magano galattanni, «Xa Maganu dagate nafa aagintaabbe heeshsho afidhanno kaayyo uyinonsa» yitu.

¹⁹Isxifaanoosi kinchunni ganne shini yannara kalaqamino qarrinni billaallitino ammanaano Foniqenna Qophiroosi, hattonni Antsookiyu geeshsha hadhu. Maganu qaaleno Yihudu mannira calla ikkinnina woleho dikultino.

²⁰Ikkollana Qophiroosinna Qereenunni dagginori mite mite ammanaano Antsookiya daggu yannara, Giriikete manni nafa gatikkinni Mootichu Yesuusiha Dancha Duduwo dudubbino.

²¹Mootichu wolqasinni kaa'lanni noonsa daafira, lowo mannino amma'ne Mootichunniwa higi.

²²Yerusaalamete noo Beetekiristaane ammanaano konne coye macciishshite Barinabaasi Antsookiya sokku.

²³Isino mare Maganu mannaho uyino elto lae, lowo geeshsha hagiidhi. Baalunku wo'mu wodaninni kaajjite Mootichaho ammanante heedhanno gede kulinsa.

²⁴Isi Qullaawu Ayyaaninna amma'na wo'mitinosiha dancha mancho ikkino daafira, lowo manni amma'ne Mootichunniwa higi.

²⁵Hakkunni gedensaanni Barnabaasi Saawulinni xaadara Xerseesi ha'ri.

²⁶Afisihu gedensaanni haa're Antsookiya abbi. Lamunku mitto diro wo'ma hakkiicho heedhanno ammanaano ledo mitteenni gamba yite lowo manna rosiissu. Ammanaano umo assine, «Kiristaana» yine woshshinoonnihu Antsookiyahooti.

²⁷Hatte yannara mite mite himanaano, Yerusaalametenni Antsookiya hadhu.

²⁸Insa giddonni mittu Agaboosi yinanni manchi Qullaawu Ayyaaninni gobbate aana wolqaataame hude ubbanno yaanni kae, gobba baalate coyi'ri. (Kuni ikkinohu Roomu Moote Qelawudewoosi yannaraati.)

²⁹Kunnira Antsookiyaho heedhanno ammanaano Yihudaho heedhanno roduuwira noonsa wolqanni woxe fushshite sokkanno gede assitu.

³⁰Woxe fushshite Barnabaasinna Saawuli anga worte beetekiristaanete cimeeyyera sokku.