Read Sidama_Qullaawa _Maxaafa SOQQAMAASINETE LOOSO 12 Bible Online

SOQQAMAASINETE LOOSO 12 - Sidama_Qullaawa _Maxaafa bible

SOQQAMAASINETE LOOSO 12

¹Hatte yannara moote Heeroodisi mito mito beetekiristaanete manna qarrisi.

²Yohaannisi rodoo Yaiqoobi bisetenni shiishiishi.

³Kunni coyira Ayihudootu hagiidhitinota afe Pheexiroosino amadisiisi. Kuni ikkinohu Ayihudete Timu Ayyaana ayirrinsanni yannaraati.

⁴Pheexiroosi amadihu gedensaanni usuru minira eessi. Ayihudennihu Agure Sa"ate Ayyaani gedensaanni mannunniwa haa'ne abbina geeshsha shoole shoole ikkite agartanno gede shoole gaamo olantora sayise uyi.

⁵Kunnira Pheexiroosi usuru mine agarreenna hee'ranno. Ikkollana ammanaano isi daafira Magano jawaatte huuccitanni no.

⁶Heeroodisi layinki soodo Pheexiroosi mannaho sayise aara hede no. Pheexiroosi hakko hashsha lame cagaagenni usurreenna lame olanto mereero goxe no. Wole olanto kayinni usuru mini waalcho agarte no.

⁷Hatte yannara Maganu sokkaasinchi leellisi. Usuru mini giddono caabbichu xawi. Sokkaasinchu Pheexiroosi midaado kise kayise, «Rakke gotti yii!» yiisi. Cagaageno angasi aaninni uulla ubbu.

⁸Sokkaasinchuno, «Uddanokki uddi'ri! Koattekkino wodhi!» yiisi. Pheexiroosino hajajinosi gede assi. Sokkaasinchu qole, «Uddanokki uddidhe, faana'ya amo!» yiisi.

⁹Pheexiroosi fule sokkaasinchu ledo ha'ri. Ajuuja lawe leellinosita ikkinnina, sokkaasinchu assino coyi halaale dilawinosi.

¹⁰Umi agaraasinenna layinki agaraasine sa'e katama massitanno doogo Siwiilu waalchiwa martu. Cufanuno mannu kisikkinni umisinni fa'nameenna furduggi assitanno doogo higge hadhu. Hadhanni heedheenna hedeweelcho sokkaasinchu Pheexiroosiwiinni baxxi.

¹¹Pheexiroosira wodanu higeennasi, «Maganu sokkaasincho soye Heeroodisinna Ayihudete manni agarte noo coyiwiinni gatisinoeta addinta xa afummo» yii.

¹²Kuni coyi halaale ikkinota afihu gedensaanni lowo manni gamba yee huucci'rannowa Maariyaami minira ha'ri. Hatti Maariyaami Maarqoosi yinannihu Yohaannisi amaati.

¹³Pheexiroosi hakka iille gobbayidi cufana ganganita, Rooda yinanni soqqamaancho ewelumma affara yite dodde waalcho martu.

¹⁴Pheexiroosi qoonqo ikkitinota buuxxe affe, hagiirru batinyinni cufana fantukkinni galagalte giddora higge, «Pheexiroosi nafara uurre no» yite kultu.

¹⁵Insano, «Macharaarootta!» yituse. Ise kayinni, «Halaaleho isooti» yite kaajjishshe kultunsa. Insano hattootiro, «Iso agaranno sokkaasincho ikka dihoogino» yitu.

¹⁶Pheexiroosi kayinni cufana gangana diagurino. Insa cufana fante, iso ikkinota affe lowo geeshsha maala'litu.

¹⁷Isi kayinni insa cancitannokki gede, angatenni malaatise Maganu usuru mininni hiitto asse fushshinosiro kulinsa. Qoleno, «Konne coye Yaiqoobiranna wole ammanaanora kullensa!» yee insa agure wolewa ha'ri.

¹⁸Soodita agaraasine, «Pheexiroosi hiikka higi ikka?» yite lowo geeshsha masse raataabbu.

¹⁹Heeroodisi, Pheexiroosi hasanno gede manna wore hase hooge, agaraasine fonqole laihu gedensaanni insa shinanni gede hajaji. Hakkunni gedensaanni Heeroodisi Ayihudete gobba agure Qiisaariya ha're hakko hee'ri.

²⁰Heeroodisi Xiroosinna Sidoonu mannira lowo geeshsha hanqe no. Insa mitteenni dagge mootete ledo gashshaanchi Bilasixoosi mootete ledo araarsannonsa gede xa'midhu. Isino maahoyye yiinsahu gedensaanni moote araara xa'midhu. Hatto assitinohu gobbansa sagale afidhannohu mootete gashshooti giddonni ikkinohuraati.

²¹Dinye assinoonni barra moote Heeroodisi mootete uddano uddi're ayirrinyu barcimira ofolle gamba yiino mannira coyi'ri.

²²Mannuno, «Tini Maganu huurooti ikkinnina mannunnita di"ikkitino!» yaanni canci.

²³Heeroodisi Maganoho ayirrinye aa hooginohura, hakkawoyintenni Mootichu sokkaasinchi ganeenna da'muule reyi.

²⁴Maganu qaali kayinni wo'manka woyite lede lede ha'la'li.

²⁵Barnabaasinna Saawuli soqqanshonsa gudde, Yerusaalametenni Antsookiya higgu. Maarqoosi yinanniha Yohaannisi ledonsa haadhe daggu.