Read Sidama_Qullaawa _Maxaafa SOQQAMAASINETE LOOSO 13 Bible Online

SOQQAMAASINETE LOOSO 13 - Sidama_Qullaawa _Maxaafa bible

SOQQAMAASINETE LOOSO 13

¹Antsookiyaho noo beetekiristaanera himanaanote yinanni rosiisaanonna qaale kultannori no. Insano Barnabaasi, kolishshu yinanni Simiooni, Qereenichu Lukiyoosi, shoolki anga gashshinohu Heeroodisi ledo lophinohu Maanahenna Saawuli no.

²Insa Maganoho soqqantanni, ita aga agurte heedheenna Qullaawu Ayyaani, «Ani doodhoommo loosira Barnabaasinna Saawuli badde"e!» yiinsa.

³Insano ita aga agurte anga aanaho worte huuccatto assitunsahu gedensaanni sokku.

⁴Barnabaasinna Saawuli Qullaawu Ayyaani soyennansa Selewuuqiya yinanni gobba hadhu. Hakkiinnino yowolotenni Qophiroosi yinanni giddichowa iillitu.

⁵Salamiisi katama iillitu yannara Ayihudootu xaaddanno minnara e'e Maganu qaale rosiissu. Yohaannisi Maarqoosi yinannihu insa kaa'lannoho.

⁶Qophiroosi giddicho tayisse Phafoosi iillitu yannara, Bari-Yesuusi yinanniha mitto Ayihudete kiilaancho affu. Isi kaphaancho himanaanchooti.

⁷Hee'rannohuno mittu gobba gashshino hayyichi Sergiyoosi Phaawuloosi yinannihu ledooti. Kuni gobba gashshino manchi Barnabaasinna Saawuli woshshe Maganu qaale macciishshara hasi'ri.

⁸Ikkollana Giriikete afiinni, «Elimaasi» yini kiilaanchi kuni, gobbate gashshaanchi ammanannokki gede hasi're, Barnabaasinna Saawuli giwi.

⁹Phaawuloosi yinannihu Saawuli kayinni Qullaawu Ayyaaninni afe iso geeqe lae,

¹⁰«Ati Sheexaanu beetti, halaalu baalu diini, bunshenna kaphu baalu giddo wo'minohehu, suwashsho Mootichu doogo dawisa diaguratto?

¹¹Xa Maganu anga gantannohe; ballicha ikkatto; yannate geeshsha arrishsho diafatto» yiisi. Hakkawoyintenni guunjonna tunsichu illesi beeshsheenna, haatate massagannosiha hasi'ri.

¹²Gashshaanchuno konne coye lae, Magano ammani; macciishshinoha Mootichu coye dhaggeeffati.

¹³Phaawuloosinna miillasi Phafoosi yowolora ofolte Phinfiiliyaho noo qacha Pharge martu. Maarqoosi yinannihu Yohaannisi kayinni insawiinni baxxe Yerusaalame higi.

¹⁴Insa kayinni Phargenni ka'e Phisidiyaho noo Antsookiya martu. Martuhu Ayihudete Fooliishsho barra ikkino daafira xaadu mine e'e ofoltu.

¹⁵Seerunna himanaanote maxaaffa nabbambihu gedensaanni xaadu mini roorrooti, «Roduuwa, jawaachishshanno seejjo noo'nero, mannaho kulle!» yite Phaawuloosiuuwa manna sokku.

¹⁶Phaawuloosino gotti yee angicho insa widira qole, «Ki'ne Israeelete manninna Magano waajjitinanni daga macciishshe.

¹⁷Israeelete Magani balaxe akaakkanke doodhino. Gibitsete manni gobbara noo yannara lowo gosa assinonsa. Lowo wolqanni hakkiinni haa're fushshinonsa.

¹⁸Shoyilluu diri geeshsha halallitte gobbara ikkitonsa cince keeshshino.

¹⁹Hakkunni gedensaanni Kana"aani heedhannota lamala gosa hune insa gobba insara ragisiisi.

²⁰Kuni coyi ikkinohu 450 diri giddooti. Hakkunni gedensaanni himanaanchu Saamueeli yanna geeshsha yoo yitanno gashshaano uyinonsa.

²¹Hakkiinni aanchite moote aannonsa gede xa'midhu. Maganuno Biiniyaami ga'renni Qiisi beetto Saaooli shoyilluu diri geeshsha moote asse uyinsa.

²²Saaooli mootimmatenni hoolihu gedensaanni, Daawiti moohisinonsa. Maganu Daawitire kulanni, ‹Wodani'yata wonshannoha, hedo'ya gedeeha Isseyi beetto Daawiti afi'roommo› yiino.

²³Kunni manchi sirchinni Maganu uyino hexxo garinni Israeelete Gatisaancho Yesuusa abbino.

²⁴Yesuusi daara albaanni Yohaannisi Israeelete manni baalaho, cubbinsawiinni higge cuuantanno gede lallawe kulinonsa.

²⁵Yohaannisi soqqame dayino haja gudara hee'reenna, ‹Ane ayeti yitine heddinanni? Agarre hee'noonnihu ane di"ikkoommo; koattesi suncho nafa tirate dandeemmokkihu, ane gedensaanni daanno› yiino.

²⁶«Ki'ne roduuwa'ya, Abirihaami sirchinni ilantinoonnirinna Magano waajjitinanni daga baala, kuni gatote qaali dayinohu ninkeraati.

²⁷Yerusaalamete manninna gashshaanonsa kayinni Yesuusi gatisaancho ikkinota diaffino. Fooliishshote Barra nabbambannita himanaanote maxaaffa wodanchitinokkihura, isi aana yoo yaansanni himanu wo'manno gede assitino.

²⁸Reyote iillishshanno sao aanasi afa nafa hoogguro, Yesuusa shaanno gede Philaaxoosi huuccidhu.

²⁹Isi daafira borreessinoonnire baala wonshituhu gedensaanni, iso masiqalu aaninni dirrisse waantu.

³⁰Ikkollana Maganu reyotenni kayisinosi.

³¹Ledosi Galiilunni Yerusaalame dagginorira batinye barra leellinonsa. Xa insa, mannu albaanni isira naqaashshesiiti.

³²Ninke abbinoommo'nehu Hagiirru Duduwi, Maganu annuwankera uyino hexxooti.

³³Yesuusa reyotenni kayisasinni, ninke oosonsara hattenne hexxo wonshino. Kuni ikkinohu layinki faarso aana, ‹Ati Beetto'yaati; Ani techo iloommohe› yine borreessinoonni garinniiti.

³⁴Maalisi hoqannokki gede, Maganu reyotenni kayisinosita xawisate, ‹Daawitira oommo hexxo, qullaawanna halaalaancho maasso eemmo'ne› yee coyi'rino.

³⁵«Qoleno wole faarsora, ‹Qullaawu Beettikki reenna, maalisi hoqanno gede worte diagurootto› yaanno.

³⁶Daawiti lubbotenni noo geeshsha Maganoho soqqamanni hee'rino. Hakkunni gedensaanni reenna annuwasiwa waammoonni; maalisi hakkiicho hoqino.

³⁷Maganu reyotenni kayisi Yesuusi maali kayinni dihoqino.

³⁸Roduuwa'ya, cubbu maaro Yesuusi widoonni higge daggannota lallambe kulloonni gede affe.

³⁹Iso ammaninohu baalu, Muse Seeri tirate dandiinokki cubbi baaluwiinni fule wolaphanno.

⁴⁰Kunnira alba himanaano,

⁴¹‹Ki'ne qacifataasine, la'e; maala'le! Ba'e! Ayino coyi'reenna ammantinannikki coye yanna'nera looseemmo› yine himanaanote widoonni kulloonni coyi daanno'nekki gede agadhe» yii.

⁴²Phaawuloosinna Barnabaasi xaadu mininni fultanna mannu insawa shiqqi yee, konne coye xaano daanno Barri Fooliishshonnihu soodono ledde kultansara huuccidhu.

⁴³Xaadu mininni songo billaallituta, Ayihudootunna Ayihudete amma'no widira higginori Phaawuloosinna Barnabaasi hoode hadhu. Insano hakko manni Maganu eltonni kaajje hee'ranno gede jawaachishshu.

⁴⁴Layinkihura Fooliishshote Barra hakko katamira hee'ranno manni giddonni rooru manni Mootichu qaale macciishshara dayi.

⁴⁵Hatte yannara Ayihude konne fulino manna la'e hinaassu. Coyi'rannore gibbe Phaawuloosi xontu.

⁴⁶Phaawuloosinna Barnabaasi bashshi assitukkinni, «Balanxe ki'nera Maganu qaale kula hasiissanno. Ki'ne kayinni gibbine ‹hegere heeshshono dihasiissannonke› yitine murcidhiniro, ki'ne agurre daganniwa ha'neemmo.

⁴⁷Hatto assineemmohu, Mootichu ‹Gato'ya gobbate qacce iillishatto gede, dagate caabbicho assoommohe› yee hajajinonke garinniiti» yite kultunsa.

⁴⁸Daga insa yituta macciishshite, lowo geeshsha hagiidhitu. Maganu qaaleno ayirrissu. Hegere heeshshora doorantinori baalu amma'nitu.

⁴⁹Mootichu qaalino hatte gobba baala tuqi.

⁵⁰Ayihude kayinni Ayihudete amma'no afi'rinoha ayirradda meentonna hakko katami jajjabba kakkayisse, Phaawuloosinna Barnabaasi aana gano gante hakkiichinni fushshite shorritunsa.

⁵¹Phaawuloosiuuno ikkitonsa baxxinokki daafira lekkansanni buko giggishshidhe fulte Iqooniya hadhu.

⁵²Rosaanote hagiirrunna Qullaawu Ayyaani wo'minsa.