Read Sidama_Qullaawa _Maxaafa SOQQAMAASINETE LOOSO 14 Bible Online

SOQQAMAASINETE LOOSO 14 - Sidama_Qullaawa _Maxaafa bible

SOQQAMAASINETE LOOSO 14

¹Phaawuloosinna Barnabaasi Iqooniyaho noohu Ayihudete xaadi minira e'u. Maganu qaaleno kulteenna, lowo Ayihudenna daga amma'nitu.

²Ammantinokki Ayihude kayinni daga kunni roduuwi aana kayisse gibbo kalaqqu.

³Phaawuloosinna Barnabaasi mittoreno bashshi assitukkinni Mootichunnire kultanni hakko lowo barra keeshshitu. Mootichuno angansa dhaggenna maalale loosantanno gede asse eltonnihu qaalisi halaalaancho ikkinota leellishi.

⁴Katamu giddo noo mannino lamewa garo baxxe, gamu Ayihudootu widira gamu qole soqqamaasinete widira higi.

⁵Daganna Ayihude gashshaanonsa ledo Phaawuloosinna Barnabaasi shetissaranna kinnatenni awwaaltara hasidhu.

⁶Phaawuloosinna Barnabaasi tenne gano macciishshite, Lisxiranna Derbe yinanniwa Liqooniyu Katamanna qooxeessisira noo gobba fulte ba'u.

⁷Hakkiichono Dancha Duduwo kultu.

⁸Lisxiraho mittichu lekka naafichu manchi no. Ilami waronni naaficha ikkino daafira, lekkatenni ha're diegennino.

⁹Kuni manchi Phaawuloosi coyi'rannore ofolle macciishshanni no. Phaawuloosino mancho xunse lae, hursitanno geeshshi amma'na noosita afe,

¹⁰«Koo mancho, gotti yite uurri!» yee jawaatu qaalinni coyi'ri. Manchuno kubbe kae lekkasinni ha'ri.

¹¹Hakko songino manni Phaawuloosi assi dhagge lae, lowo qaalinni, «Maganna manna labbe ninkewa dirritino» yee Liqooniyu afiinni coyi'ri.

¹²Barnabaasira su'ma, «Diya» yite fushshitu. Coyeho umo ikkinohu Phaawuloosi ikkinohura isira su'ma, «Hermesi» yite fushshitu.

¹³Katamaho gobbaanni noohu Diya Galmi qeesichi boottanna daraaro haa're katamu waalcho abbe, manna sumuu yaanno gede assi're Phaawuloosiranna Barnabaasira kakkalara hasi'ri.

¹⁴Phaawuloosinna Barnabaasi kayinni konne coye macciishshituhu gedensaanni dadillite uddanonsa dartu. Raartanni mannu widira higge doddanni marte,

¹⁵«Manna, togo mayira assitinanni? Ninkeno ki'ne gedee mannaati. Ninke ki'ne kunni kaphu coyiwiinni faffine gordonna baatto, baaranna kuri giddo noore baala kalaqinohuwa Heeshshote Maganiwa higginara Hagiirru Duduwo kullammo'nera dangoommo» yitu.

¹⁶Leddeno, «Albi yannara Maganu mannu baalu hasi'ri doogo ha'rara facci asse agurino.

¹⁷Ikkollana shaqqado Magano ikkasi leellishannoha dancha looso loosa diagurino. Gordunni xeena soyanno'ne; gideno yannatenni aanno'ne; sagaletenninna hagiirrunni wodana kassi assanno'ne» yitu.

¹⁸Tenne kulte heedheennanni mannu qarriseennansa, kakkaltannonsakki gede hooltinohu lowo daafurinniiti.

¹⁹Ayihudootu kayinni Antsookiyunninna Iqooniyunni ka'e dagge manna kakkayisse, Phaawuloosi kinnatenni awwaallanni gede assitu; reyinoha laweennansa goshooshshe katamaho gobbaanni fushshitu.

²⁰Rosaano dagge doyissite mulesi uurrituta, Phaawuloosi gotti yee kae katama ei. Layinki barra Barnabaasi ledo Derbe Katama ha'ri.

²¹Phaawuloosinna Barnabaasi Derbe marte Dancha Duduwo kulteenna lowo manni ammani. Hakkunni gedensaanni Lisxirunna Iqooniyu widoonni higge Phisidiya yinanniwa Antsookiya martu.

²²Martuwa baala ammanaano seejjitanninna jawaachishshanni, «Maganu gashshoote eate lowo qarra adha hasiissannonke» yitanni rosiissunsa.

²³Beetekiristaannateno cimeeyye wortunsa. Ita aga agurte Magano huuccituhu gedensaanni, amma'nitino Mootichira eeggo uyitu.

²⁴Phisidiyu widoonni higge Phinfiiliya yinanniwa martu.

²⁵Pherge yinanniwa Maganu qaale kultuhu gedensaanni Axaaliyu gobba dirritu.

²⁶Hakkiinni yowolote ofolte Sooriyu gobba Antsookiya higgu. Hakkiichino loossino loosira Maganoho eeggo uyitino dargaati.

²⁷Martinowa ammanaano gamba assite, Maganu insa widoonni qole loosino loosonna dagate ammanate doogo asse faninonsa gara kultu.

²⁸Hakkiicho noo ammanaano ledono lowo yanna keeshshitu.