Read Sidama_Qullaawa _Maxaafa SOQQAMAASINETE LOOSO 15 Bible Online

SOQQAMAASINETE LOOSO 15 - Sidama_Qullaawa _Maxaafa bible

SOQQAMAASINETE LOOSO 15

¹Shiimu manni Yihudunni daye, «Muse Seeri garinni barcima hoogginiro digattinanni» yaanni ammanaano rosiisa hanafi.

²Phaawuloosinna Barnabaasi kunni coyinni hakko manni ledo lowo geeshsha coyi'rantuhu gedensaanni Antsookiyunni wole boode ammanaasine haadhe Yerusaalame marte, konne coye soqqamaasinetenna cimeeyyete hasaabbanno gede malli.

³Kunnira beetekiristaanetenni sonkeenna Finqenna Samaariyu widoonni higge hadhinori daga Magano ammantanno gede kultu. Kuni coyi ammanaasine baala lowo geeshsha hagiirsiisi.

⁴Yerusaalame marte iillituta, beetekiristaane, soqqamaasinenna cimeeyye haadhunsa. Insano Maganu insa widoonni qole loosinore odeessitunsa.

⁵Farisootu widire ikkitino ammanaano ka'e, «Ammantino daga barcintannonna Muse Seera agadhitanno gede assa hasiissanno» yitu.

⁶Soqqamaasinenna cimeeyye konne coye masaaltara songitu.

⁷Lowo yanna hasaabbuhu gedensaanni Pheexiroosi kae, «Roduuwa'ya, daga ane widoonni Dancha Duduwo macciishshite ammantanno gede, kunni albaanni ki'ne mereerinni Maganu ane doorinoeta egentinoonni.

⁸Mannu wodana egennino Magani, Qullaawa Ayyaana ninkera uyinonte gede, insarano ee doorinonsata egensiisino.

⁹Wodanansa ammanatenni keereensino daafira, ninkenna insa mereero badooshshe diworino.

¹⁰Hatto ikkina, annuwankeno ninkeno duha dandiinoommokki duha ammanaasinete haxora woratenni Magano mayira jiffinanni?

¹¹Ninke gantoommohuno insante gede Mootichu Yesuusi eltonni ikkinota ammanneemmo» yii.

¹²Hatte yannara Phaawuloosinna Barnabaasi Maganu insa widoonni qole dagate mereero leellishino malaatenna maalale kultanna songo gudisante dhaggeeffattanni macciishshitu.

¹³Insa coyidhe ka'uta Yaiqoobi kae, «Roduuwa'ya, hanni macciishshe"e!

¹⁴Maganu su'misinni woshshino manna doorara daga hiitto asse towatinoro Simiooni Pheexiroosi coyi'rino.

¹⁵Tenne hedo ledo himanaanote qaali xaadanno; hakkuno,

¹⁶‹Kunni gedensaanni ani galagale dayemmo; diigaminoha Daawiti mine wirri asse mineemmo. Diigaminoha qole uurriseemmo.

¹⁷Hatto asseemmohuno, gatino manninna, su'mi'yanni woshshantino daga baala, Mooticha hasidhanno gedeeti.

¹⁸Konne coye bi're hundanni kuloommohu, ani Maganu, togo yoommo› yiino.

¹⁹«Kunnira ane hedo ikkiro, Maganunniwa higgino dagara konne duha duhisiisa dihasiissannonke.

²⁰Hatteentenni, ‹Kaphu magannara kakkalleenna battaabbino sagale ittinoonte; foorretewiinni xooqqe; gorrinikkinninna mundee fultukkinni qalxante reyitino saada maala ittinoonte; mundeeno agginoonte› yine borreessine sonkummoro woyyate.

²¹Muse Seeri, bi're hundinni kayise katamma baalate noo minna xaadunnitera Fooliishshote Barra tuqa kullanna keeshshino» yaannoho.

²²Hakkunni gedensaanni soqqamaasinenna cimeeyye Beetekiristaanete manni baalu, Phaawuloosinna Barnabaasi ledo shiima manna Antsookiya sonkiro woyyate yite maltu. Kunnira roduuwu giddonni Beetekiristaanete loosira umo ikkitinore Bersabaasi yinanni Yihudinna Silaasi doortu.

²³Borreessinoonni borrono insara sokku. Borro, «Ninke soqqamaasinenna cimeeyye roduuwi'ne Antsookiyaho, Sooriyahonna Kiliqiyaho heedhinanni dagara ki'ne roduuwinkera, keere sonkoommo'ne.

²⁴Ninke giddonni sonkummonsakkinni dagge kultino'ne coyi lowo geeshsha qarrisino'neta anfoommo.

²⁵Kunni coyira songine shiima manna doorre, lowo geeshsha banxeemmori Phaawuloosinna Barnabaasi ledo sonkoommo'ne.

²⁶Phaawuloosinna Barnabaasi heeshshonsa Mootichu Yesuusi Kiristoosira uyitinoreeti.

²⁷Borreessinoommo'ne coye afuunni ledde kultanno'ne gede Yihudinna Silaasi sonkoommo.

²⁸Kunninni aane noohu hasiisanno coyi gobbaanni wole lowo duha duhisiisa hooganke Qullaawu Ayyaaniranna ninkera dancha labbinonke.

²⁹Kaphu magannara kakkalleenna battaabbino sagale ittinoonte; gorrinikkinninna mundee fultukkinni qalxante reyitino saada maala ittinoonte; mundeeno agginoonte; foorretewiinni xooqqe. Konne coye agadhitiniro danchahona, keerunni heedhe!» yitannote.

³⁰Sonkoonniri geegiissineenna Antsookiya hadhu. Ammanaanono gamba assite sonkoonni borro uyitunsa.

³¹Ammanaanono sonkoonni borro la'e, jawaachishshannota ikkitinohura lowo geeshsha hagiidhitu.

³²Yihudinna Silaasi himanaano ikkitinohura, roduuwa lowo geeshsha seejjite jawaachishshunsa.

³³Yihudinna Silaasi shiima barra hakko keeshshituhu gedensaanni, ammantino roduuwi geegiissiteennansa galagalte sokkunsariwa higgu.

³⁴Silaasi kayinni hakkiicho gatara hasi'ri.[2]

³⁵Phaawuloosinna Barnabaasi wole haammata ammanaano ledo, Mootichu qaale rosiissanninna kultanni Antsookiyaho keeshshitu.

³⁶Shiimu barri gedensaanni Phaawuloosi Barnabaasi, «Amo galagalle hinge kunni albaanni Mootichu qaale kullummo katamma marre roduuwa towanto; noo garano la'no» yii.

³⁷Barnabaasi kayinni Maarqoosi yinanniha Yohaannisi ledonsa ha'ranno gede hasi'ri.

³⁸Phaawuloosi isi ledonsa ha'rara dihasi'rino. Giwinohuno, kunni albaanni isi insawiinni baxxe Phinfiiliyaho gate, loosoho ledonsa ha'rinokki daafiraati.

³⁹Kunninni kainohunni lamunku mereero lowo gibbo ikkeenna baxxitu. Kunnira Barnabaasi Maarqoosi adhe yowolotenni Qophiroosi ha'ri.

⁴⁰Phaawuloosi kayinni Silaasi doodhi. Roduuwu Phaawuloosi Mootichu eltora eeggo uyituhu gedensaanni fule ha'ri.

⁴¹Isino beetekiristaanete manna baala jawaachishanni Sooriyunna Kiliqiyu widoonni hige sai.