Read Sidama_Qullaawa _Maxaafa SOQQAMAASINETE LOOSO 16 Bible Online

SOQQAMAASINETE LOOSO 16 - Sidama_Qullaawa _Maxaafa bible

SOQQAMAASINETE LOOSO 16

¹Phaawuloosi Darbenna Lisxira ha'ri. Lisxiraho mittu Ximootewoosi yinanni ammanaanchi no. Amasi Ayihudittete; ikkirono Magano amma'nitinote. Annisi kayinni Giriikichaho.

²Lisxirahonna Iqooniyaho noo roduuwi Ximootewoosi danchumma coyidhanno.

³Phaawuloosi Ximootewoosi ledosi adhe ha'rara hasi'rinohura barcimanno gede assi. Hatto assinohu hakko heedhanno Ayihude Ximootewoosi anni Giriikicha ikkinota affinohuraati.

⁴Phaawuloosinna Silaasi katamma baalate giddoonni sa'anni ammanaanote, Yerusaalamete noo soqqamaasineranna cimeeyyete, songo coyidhe wortino seera rosiisse agadhitanno gede seekkite kultunsa.

⁵Kunni garinni ammanaanote mittimma jawaattu. Kiironsano barru barrunni lexxitu.

⁶Phaawuloosinna Silaasi Issiyaho qaale kultannokki gede Qullaawu Ayyaani hoolinsa. Kunni daafira Firigiyunna Galatiyu gobba widoonni higge sa'u.

⁷Miisiyu danna iillituta Biitaaniya hadhara heddino. Ikkollana Yesuusi Ayyaani hakkiira hadhannota hoolinsa.

⁸Kunni daafira Miisiyu widoonni higge Xiroaada dirritu.

⁹Hashsha mittu Meqedooniyu manchi kae uurre, «Meqedooniya dagge kaa'linke!» yee huucci'ranna Phaawuloosi ajuujate afi.

¹⁰Phaawuloosi ajuuja afihu gedensaanni, hakkawoyintenni Meqedooniya ha'ra hasi'nummo. Tenne hendoommohuno, Meqedooniyu mannira qaale kullammora Maganu woshshinonketa ammannoommohuraati.

¹¹Xiroaadunni yowolote ofolline Samotiraaqe marrummo. Hakkiinni layinki soodo Naaphule ha'nummo.

¹²Hakkiinni ka'ne Filiphisiyusi yinanniwa iillinummo. Filiphisiyusi Meqedooniyu gobbara jawa katamaati; kuni katami Roomu gashshooti anga nooho. Hakkiicho shiima barra keeshshinummo.

¹³Fooliishshote Barra huuccattote gamba yinanniwa katamaho gobbaanni noo wayi gamira marrummo. Hakko ofolline gamba yee noo meentira hasaambummo.

¹⁴Macciishshanni noo meenti giddo Liidiya yinanniti Tiyaxirooni Katamira duume uddano daddaltanno mancho no. Ise Magano magansidhannote. Maganu wodanase faneenna Phaawuloosi coyi'ranno coye macciishshitu.

¹⁵Isenna minese noo manni baalu cuuamihu gedensaanni, «Mooticha ammana'ya affinoonniha ikkiro, amme mini'yara e'ine ofolle» yite lowo geeshsha huuccitunke.

¹⁶Mitto barra huuccattote dargira ha'nanni hee'ne, albillitte ikkara noore kiilunni kulanno ayyaana afidhinotenni mitte seemo soqqamaanchonni xaandummo. Tini beetto biillasera kiilunni lowo woxe gamba assitanno.

¹⁷Ise ninke faana hadhanni, «Kuni manni Wo'munkura Aliidi Magani soqqamaanooti; insa gatote doogo kultannoreeti» yitanni cancite coyidhu.

¹⁸Kunni garinni lowo barra marro marro higge coyidhu. Kunnira Phaawuloosi hanqe caaqqi yee lae konne ayyaana, «Yesuusi Kiristoosi su'minni tenne beetto giddonni fulatto gede hajajeemmohe!» yii. Bushu ayyaanino hakkawoyintenni fule bai.

¹⁹Beettote biilla abbitannonsa woxi bainsata affe, Phaawuloosinna Silaasi amadde goshooshshanni gudumaale massite roorrootunniwa shiqishshunsa.

²⁰Roomu roorrootiwa massite, «Kuni manni Ayihudete. Kataminkera qarra kalaqqanni no.

²¹Ninke Roomu manni adhineemmokkihanna assineemmokki coye rosiissanni no» yitu.

²²Kunnira mannu Phaawuloosinna Silaasi gawajjara kai. Roorrootuno Phaawuloosiuu uddanonsa mulqine gannanni gede hajajju.

²³Lowo geeshsha gantunsahu gedensaanni usuru minira eessite, agaraanchu seekke agaranno gede kultu.

²⁴Agaraanchu kulloonnita macciishshe insa usuru mine giddoyidi golira masse lekkansa biqe haqqaho usuri.

²⁵Hashshu taalootira Phaawuloosinna Silaasi huuccattotenninna faarsotenni Magano galaxxitanna, wolu usuranyino macciishshi.

²⁶Hakko mereero hedeweelcho baatto shafanteenna, usuru mini tenqe yii. Cufanna baala mitteenni fa'nantu. Usuranyu baalunku cagaageno tatta'u.

²⁷Agaraanchu baqqi yaanno woyite, usuru mini fa'name nooha afe, usuranyu fule bainoha laweennasi, isonoo shaara bise fushshi'ri.

²⁸Phaawuloosi kayinni, «Ninke baalunku konne hee'noommona umokki galaaffattooti!» yee qoonqosi naggi asse coyi'ri.

²⁹Agaraanchuno caabbicho abbisiisi're dodanni giddora e"e, qece yee huxi'ranni Phaawuloosinna Silaasi albaanni diriire uwi.

³⁰Insa gobbara fushshe, «Mootoolle'ya, gateemmo gede ma asso?» yii.

³¹Insano, «Atino minikki mannino gattinannina, Mooticha Yesuusa ammani» yitusi.

³²Mootichu qaale isiranna minesi noo manni baalaho kultu.

³³Hakko hashshanni usuru mini agaraanchi insa minisira masse madansa hayishshi. Isinna minisi manni hakkawoyintenni cuuantu.

³⁴Hakkunni gedensaanni Phaawuloosiranna Silaasira ittannore uyinsa. Usuru mini agaraanchi minisi manni ledo Magano amma'nino daafira hagiidhi.

³⁵Soodita gashshaano, «Hakkonne manna tirre» yite gaaddo sokku.

³⁶Usuru mini agaraanchino Phaawuloosira, «Roorrootu ki'ne ‹Tirre hadhona› yite manna sokkinona, keerunni mini'nera hadhe!» yiinsa.

³⁷Phaawuloosi kayinni, «Ninke Roomu gosa ikkine hee'neennanni, doogimale gudumaaleho gante halaale beeshshite usurtinonke. Xa kayinni badheenni tirtannonke? Di"ikkannona, insa dagge fushshitonke» yii.

³⁸Gaaddono konne coye roorrootaho marte kultuta, roorrootu Phaawuloosinna Silaasi Roomu manna ikkitinota affe, lowo geeshsha waajjitu.

³⁹Insano hakkawoyintenni dagge, konne coye sa'annonsa gede huuccidhe usuru mininni fushshitunsa. Katamunnino fulte hadhanno gede huuccidhunsa.

⁴⁰Phaawuloosinna Silaasi kayinni usuru mininni fulte Liidiya minira martu. Hakkiicho roduuwunni xaadde jawaachishshunsahu gedensaanni, fulte hadhu.