Read Sidama_Qullaawa _Maxaafa SOQQAMAASINETE LOOSO 17 Bible Online

SOQQAMAASINETE LOOSO 17 - Sidama_Qullaawa _Maxaafa bible

SOQQAMAASINETE LOOSO 17

¹Phaawuloosinna Silaasi Anfipholisinna Apholooniyu widoonni higge Teselonqe hadhu. Hakkiicho Ayihudennihu xaadu mini no.

²Phaawuloosino rosinonte gede xaadu minira ei. Hakkiicho sase aane noo Fooliishsho Barri geeshsha mannaho qullaawa borro fane kuli.

³Kiristoosi qarramanna reyotennino ka"a agartinosita seekke kulanni, «Kuni kuleemmo'ne Yesuusi Kiristoosaati» yee coyi'ri.

⁴Kunnira gamu Ayihudooti, Magano waajjitanno Giriikootinna mitu mitu egennamino meenti konne coye ammante Phaawuloosiwanna Silaasiwa higgu.

⁵Ayihude kayinni hinaasse loosiweelo mullawa doyitannore gamba assite gibbo kayissanno gede assitu. Katamano cancishshu. Phaawuloosinna Silaasi gamba yiino mannira sayisse uyitara Iyasooni mine doyissitu.

⁶Insa hoogguti kayinni, Iyasooninna wole roduuwa amadde goshooshshanni katamu gashshaanowa massite, «Gobba baala huntinori xa kuneeti kawa daggino.

⁷Haa're gashshannonsahuno Iyasooniiti. ‹Yesuusa yinannihu wolu moote no› yitanni jawu Roomu moote hajajo ajishshanno» yitu.

⁸Songonna katamu gashshaano konne coye macciishshite lowo geeshsha yaaddu.

⁹Iyasooninna wole roduuwa waase woshshiishshe tirtu.

¹⁰Roduuwu hakkawoyintenni Phaawuloosinna Silaasi hashsha Beeriya fulte hadhanno gede assitu. Hakkiira iillite Ayihudootu xaadi minira e'u.

¹¹Beeriyaho noo Ayihudooti Teselonqe noorinni roore wodana hala'ladda ikkitinohura, qaale hagiirrunni adhitu. Kulloonninsa qaali halaale ikkinota buuxidhara yite, barru barrunkunni qullaawa borro seekkite la'u.

¹²Hakko manni giddonni lowo Ayihude ammantu. Giriikennihu dureeyye lowo meentinna labballuno ammantu.

¹³Ikkollana Teselonqe noo Ayihude Phaawuloosi Beeriyaho Maganu qaale kulanni noota macciishshite, dagge manna gamba assite gibbo kayissu.

¹⁴Hakkawoyintenni roduuwu Phaawuloosi baaru qacce ha'ranno gede assitu. Silaasinna Ximootewoosi kayinni hakkiicho keeshshitu.

¹⁵Phaawuloosi geegiissituri, massite Ateena iillishshusihu gedensaanni, Silaasinna Ximootewoosi rakke Phaawuloosiwa iillitanno gede isi soyino hajajo haadhe Beeriya higgu.

¹⁶Phaawuloosi Ateenaho Silaasinna Ximootewoosi agare hee're, hakko katamira kaphu maganna batidhinota afe wodanisinni lowo geeshsha caaccaawi.

¹⁷Kunnira xaadu mine afi Ayihudootinna Magano waajjitanno daga ledo, qoleno gudumaaleho gamba yiino manni ledo barru baala xa'mami.

¹⁸Epikoronootahonna Isitoyikootaho yinanni hayyoole dagge isi ledo xa'mantu. Mitu mitu, «Kuni coyi'rammichi mayaanno?» yitu. Xaano insa giddonni wolu Yesuusirenna reyotenni ka"asire kulannonsa woyite, «Wole magannare kulannoha lawanno» yitu.

¹⁹Kunnira Phaawuloosi Ariyofagoosi yinanniwa songino manniwa massite, «Konne ati rosiisattoha haaro roso afa hasi'noommo.

²⁰Gamu coyi ati yaattohu ninkera haarohona xawisse kulinke» yitu.

²¹Ateenu manninna hakko hee'rannohu wole gobba manni baalu konne haaro coye macciishshanninna hasaawanni hakkiicho hosa baxanno.

²²Hatte yannara Phaawuloosi Ariyofagoosi gamba yitino songora albaanni uurre, «Ki'ne Ateenu manni, baalunku coyira duudhine maganna ha'runsitinannire ikkitinoonnita afoommo.

²³Katama'ne gaangaawe magansidhinannire laeemmo woyite, ‹Egenninoonnikki Maganira› yine borreessinoonniha kakkalote darga afoommo. Xa kune ani affinikkinni magansidhinanni heedhini Maganire kuleemmo'ne.

²⁴Alamenna giddose noore baala kalaqino Magani, gordunna baattote Mootichaati. Isi mannu minino mine dihee'ranno.

²⁵Heeshshonna foole, qoleno wolere manna baalaho aannohu iso ikkinohura, mittoreno diqarramanno. Mannu kaa'lono dihasi'ranno.

²⁶Isi mitto mancho kalaqe sirchosi halashshe, gobba baala wo'manno gede assino. Kunni mannira hee'ranno diro bikke, dannano qase worino.

²⁷Maganu hatto assinohu mannu iso hasi'rannonna xiinxalle iille afi'rannosi gedeeti. Ikkollana isi ninkewiinni dixeerti'rino.

²⁸Lubbotenni hee'noommohunna milli yineemmohu isinniiti; hee'neemmohuno isinniiti. Hakkuno geewaano'ne, ‹Ninke baalunku isi oosooti› yitino gedeeti.

²⁹Xa ninke isi ooso ikkinummoro, ‹Magano mannu ogimmanninna hayyonni daashshine seekkinoonni culka woy birra, qoleno kincho bonce seekkinoonni uduunnicho lawanno› yine heda dihasiissanno.

³⁰Kunni albaanni hambetenni assinoonniha Maganu agure saino; xa kayinni gobba baalate noo manni aagintaawe higanno gede hajajino.

³¹Isi doodhino manchi widoonni qole manna baalaho halaalu yoo yaanno barra hirqino. Konne coye manna baalaho egensiisinohu, isi doodhinoha reyotenni kayiseeti» yii.

³²Reyotenni ka"annire macciishshite mitu mitu haariintino; mitu mitu kayinni, «Konne coye wole yannara kulattonkena» yitino.

³³Hakkunni gedensaanni Phaawuloosi songotewiinni kae ha'ri.

³⁴Gamu manni isi ledo sumuu yee ammani. Ammani manni giddo, Ariyofagoosi songora miilla ikkitinori Diyonasiyusi yinanni manchi, Damariisi yinanni manchonna wolu mannino no.