Read Sidama_Qullaawa _Maxaafa SOQQAMAASINETE LOOSO 18 Bible Online

SOQQAMAASINETE LOOSO 18 - Sidama_Qullaawa _Maxaafa bible

SOQQAMAASINETE LOOSO 18

¹Hakkunni gedensaanni Phaawuloosi Ateenunni kae Qorontoosi Katama ha'ri.

²Hakkiicho Aqiila yinannihunni Phaanxoosi gobba Ayihudichinni xaadi. Aqiili galtesi Phirisqilla ledo Ixaaliyunni mulella daye no. Hakkiira dayinohu, Roomunnihu jawu moote Qelawudewoosi Ayihude Roomunni fultanno gede hajajinohuraati. Phaawuloosino insa ledo egennami.

³Isino insante gede dukkana gowannoha ikkinohura, ledonsa loosi'ri.

⁴Ayihudete Fooliishsho Barra baala xaadu mine Ayihudootunna Giriikootu ledo hasaawanni coye seekke kulinsa.

⁵Silaasinna Ximootewoosi Meqedooniyunni daggu woyite Phaawuloosi, «Yesuusi Kiristoosaati» yaanni isire Ayihudootaho farci'ranninna rosiisanni hosanno.

⁶Ikkollana, Ayihudootu gibbusitanna xontusita, uddanosi buko giggishshi're, «Xaate ani halaale gudoommo; kunni ka'a xa'mantinanniri ki'neeti. Ani xa daganniwa ha'reemmo» yiinsa.

⁷Hakkiinni kae, Magano magansi'rannohuwa mittu Tiito Iyosixoosi yinanni manchi minira ha'ri.

⁸Qerisiphoosi yinanni Ayihudichihu xaadu mini roorrichi minisi manni ledo Mooticha ammani. Phaawuloosi coyi'ranna macciishshihu Qorontoosi manni baalu ammane cuuami.

⁹Hashsha Mootichu Phaawuloosi ajuujatenni, «Waajjitooti; coyi'ri; sammino yitooti!

¹⁰Ani ledokki noommo daafira, gawajjannohehunna miicannohehu dihee'rannona waajjitooti. Anera kunni katami giddo lowo manni nooe» yiisi.

¹¹Kunnira, Phaawuloosi Maganu qaale rosiisanni mitto dironna darate hakkiicho keeshshi.

¹²Galiyoosi Akayu gobbara shoomami yannara, Ayihudootu gamba yite Phaawuloosi huntara ma'lite ka'u. Yoote dargira haadhe massite,

¹³«Kuni manchi seeraho nookki doogonni mannu Magano magansi'ranno gede assanno» yitu.

¹⁴Phaawuloosi qolara hede hee'reennanni Galiyoosi Ayihudootaho, «Ki'ne Ayihude! Saonna jaddo iillitino'neha ikkoommero, coye'ne cince macciishsheemmo.

¹⁵Qaaleho, su'muwatenna seeri'ne daafira coyi'rama ki'ne hajaati. Ani kunni coyira mittoreno diyeemmo» yii.

¹⁶Hatto yee kae insa yoote darginni ha'risi.

¹⁷Hatte yannara xaadu mini roorricha Sostenisi songote albaanni gantu. Galiyoosi kayinni mittoreno yiikkinni sammi yee lai.

¹⁸Phaawuloosi lowo barra roduuwu ledo Qorontoosi hee'rihu gedensaanni insa keerunni yee Sooriya ha'ri. Aqiilanna Phirisqilla ledosi no. Xano noosi daafira, Kinikiriya yinanniwa mare umo meexxi.

¹⁹Efesooni iillituta, Aqiilanna Phirisqilla hakko agure, xaadu minira e"e Ayihudootu ledo hasaawi.

²⁰Insa lowo yanna ledonsa keeshshanno gede xa'mitinosi. Isi kayinni dihasi'rino.

²¹Ikkirono, «Maganu yiiro wole yannara galagale dayemmo» yee Efesooninni fule yowolote ofolle ha'ri.

²²Qiisaariya iille, hakko noo ammanaasine keere haa're kae, galagale Antsookiya dirri.

²³Hakkiicho marinowa shiima barra keeshshi. Hakkunni gedensaanni Galaatiyunna Firigiyu gobbara dargunni darga sa"anni ammanaasine jawaachishi.

²⁴Mittu Alekisaanderiyaho ilaminohu Aphiloosi yinanni Ayihudichi Efesooni dayi. Isi qullaawa borro xunse afinoho; qoleno seekke coyi'ra egennino manchooti.

²⁵Mootichu doogore buuxe egenninoho; lowo geeshsha laalaate Yesuusire seekke kulanni rosiisi. Ikkollana isi Yohaannisi cuuare calla egennino.

²⁶Isi ruxxi yiikkinni xaadu minira e"e coyi'ri. Aqiilinna Phirisqilla isi coyi'rinore macciishshituhu gedensaanni, iso haadhe mininsara massite Maganu doogore isi afinohunni roorsite garunni kultusi.

²⁷Aphiloosi Akaya ha'rara hasi'rita, roduuwuno hedosi baxxe hakkiichi roduuwi haadhannosi gede borro borreessitusi. Hakkiira iille Maganu eltonni ammanaasine ikkitinore lowo geeshsha kaa'linsa.

²⁸Yesuusi, Kiristoosa ikkinota qullaawa borro giddonni fane kulanni, jawaatu hasaawinni Ayihude mannu albaanni gari.