Read Sidama_Qullaawa _Maxaafa SOQQAMAASINETE LOOSO 2 Bible Online

SOQQAMAASINETE LOOSO 2 - Sidama_Qullaawa _Maxaafa bible

SOQQAMAASINETE LOOSO 2

¹Phenxeqosxe yinanni ayyaani barri iilli yannara, soqqamaasinesi baalanti mitto darga gamba yite no.

²Hedeweelcho lowo hombobolatte gede ikke luulu iiminni dayi; insa noo mineno wo'mi.

³Giirate buwani arrawo lawannori leellinsa; hakkiinni beehame mittu mittunku aana dirri.

⁴Baalunkura Qullaawu Ayyaani wo'minsa; Qullaawu Ayyaani uyinonsa jawaante garinni addi addi qaalinni coyidhu.

⁵Hakkiicho, gobba baalatenni dagge Yerusaalamete heedhannori Magano waajjitanno Ayihude no.

⁶Konne luulo macciishshe gamba yiinohu lowo manni, insa qaalinni coyidhanna macciishshe lowo geeshsha maala'le,

⁷«Kuri togoo coyidhannori baalu Galiilu manna di"ikkitino?

⁸Ninke baalunku gobbanke qaalinni coyidhanna macciishshineemmohu hiittoonniitiyya?

⁹Ninke Pharte, Meedi, Elaami Mesiphexoomiyu, Yihudu, Qaphadooqu, Phanxoosi, Issiyu,

¹⁰Firigiyu, Phinfiiliyu, Gibitsete, Qereenu mule Liibiyu gobbara hee'neemmo mannaati. Roomu gobbanni dangoommo Ayihudootinna dagate giddonni fulle Ayihudete widira hingoommorino hee'noommo.

¹¹Qerxeesinna Arabete mannino no; kuneeti, hakkuri baalunku Maganunniha jawa looso ninke qaalinni coyidhanna macciishshinoommo!» yitu.

¹²Kunnira baalunku yitannore habbe maala'litanni, «Kuni coyi maati?» yite mimmito xa'mitu.

¹³Mitu mitu kayinni, «Haaro woyinete xajje agge dimbite ikkitanno» yitu.

¹⁴Hatte yannara Pheexiroosi tonaa mitunku ledo uurre qaalesi naggi asse mannaho, «Ki'ne Yihudu gobba manninna Yerusaalamete heedhinanniri baalu, konne ikkino coye afate coyi'reemmore macciishshe.

¹⁵Xa soodihunni sase saateeti; ki'ne heddini garinni kuni manni didimbino.

¹⁶Kuni coyi ikkinohu kayinni himanaanchu Iyueeli,

¹⁷‹Maganu goofimarchu barra, Ayyaana'ya mannu baalu aana duneemmo; labballunna seennu ooso'ne himana coyidhanno; aju manni'neno ajuuja la"anno; geerri'neno haaqee haaqii'ranno.

¹⁸Hakko barra, labbaanna meyaa soqqamaano'ya aana, Ayyaana'ya duneemmo. Insano himana coyidhanno.

¹⁹Iima gordoho dhagge, uulla baattote aana malaate leellisheemmo; mundee, giiranna wiliilete tunnuuqi leellanno.

²⁰Jawunna dhaggennihu Mootichu barri daara albaanni, arrishsho tunsitanno; aganu mundeete soorramanno.

²¹Mootichu su'ma woshshannohu baalu gatanno› yaanno himani wo'manno gedeeti.

²²«Israeelete manna! Konne qaale macciishshe; affininte gede Naaziretete Yesuusi ewelumma, Maganu Isi widoonni qole giddo'ne assinohu jawu coyi, maalalenna dhagge xawo fultino.

²³Hakkuno Maganu umisi balaxe hedinonna egennino garinni, ki'nera sae aamamino; ki'neno haxawarrootu angara sayissine uyitinoonni. Insano dawete aana sutte shitino.

²⁴Maganu kayinni reyote wolqa hune reyotenni kayisinosi. Kunnira reyo amadde hooltasira didandiitino.

²⁵Daawiti isire, ‹Wo'manka woyite Mooticha alba'yaanni nooha afoommo; qiniite'yaanni noo daafira dimaseemmo.

²⁶Kunnira wodani'ya hagiidhanno; arrawi'yano hisatanno. Reyannohu maali'yano hexxo afi'ranno.

²⁷Lubbo'ya jeennaateho diaguratto; Qullaawakki waammate giddo hoqara worte dila"atto.

²⁸Heeshshote doogo egensiisoottoe; ane ledo hee'rakkira hagiirri'ya wo'ma ikkanno› yaanno.

²⁹«Roduuwa'ya, albi annuwanke giddonni Daawiti ree waamaminota, moogisi techo geeshsha ninkewa noota xawise kuleemmo'ne.

³⁰Ikkollana Daawiti konne coyi'rinohu, himanaancho ikkinohuraatinna Maganu, ‹Sirchikki giddonni mitto ate darga amadanno gede asseemmo› yiinoha hexxote qaale egennino daafiraati.

³¹Maganu albillitte assara noore balaxe afe, Kiristoosi reyotenni ka"annota coyi'rino.

³²Konne Yesuusa Maganu reyotenni kayisinosi; ninke wo'munku kunni coyira naqaashshete.

³³Maganu qiniiteenni ofollara gordo ha'ri woyitenna Qullaawu Ayyaani hexxo Annuwiinni adhi yannara konne la'inannihanna macciishshitinanniha ninke aana dunino.

³⁴Xa gordo fulinohu Daawiti ikkinokkita anfannihu, Daawiti umisinni, ‹Kaaliiqi Mootichi'yara, baarigaarrakki lekkakkira woroonni qolammo geeshsha, qiniite'yaanni ofolli› yee coyi'rino.

³⁵

³⁶«Xa konne ki'ne suttini Yesuusa, Maganu Mootichanna Kiristoosa assinosita Israeelete manni baalu halaalinta afo!» yii.

³⁷Mannu konne coye macciishshe wodanu maseennansa Pheexiroosiranna ledosi noo soqqamaasinera, «Roduuwa, xa ma assino?» yii.

³⁸Pheexiroosino, «Aagintaabbine higge; cubbo'ne agurranni'ne gede, mitti mitti'ne Yesuusi Kiristoosi su'minni cuuamme; Qullaawu Ayyaani eltono adhitinannina.

³⁹Hexxote qaali ki'neranna ooso'nera, Mootichu Maganinke isiwa woshshannonsarira xeertote noori baalahooti» yii.

⁴⁰Wolu addi addi qaalinni farci'ranni, «Tenne shokkashsho ilama aana daanno qorichinni umo'ne gatisidhe!» yee seejjinsa.

⁴¹Insa giddonni lowo manni qaale macciishshe cuuami. Hakko barra sase kume ikkanno manni ammane lexxi.

⁴²Insano soqqamaasinete roso macciishshite, mitteenni heedhanni, sagale mitteenni ittanni, huuccattotennino jawaattu.

⁴³Hatte yannara soqqamaasinete widoonni lowo maalalenna dhagge loosantanni noo daafira baalunku waajjitu.

⁴⁴Ammanaano baala mitteenni heedhu; afidhinori baalu wo'munkura gutoho.

⁴⁵Uullansanna jajjansa hirte, woxe mittu mittunkura hasiisi deerrinni beekkanno.

⁴⁶Barru barrunkunni Qullaawa Mine mitteenni gamba yitanno. Minensa sagale ittanni, hagiirrunninna hisatu wodaninni heedhanni,

⁴⁷Magano galaxxitanna mannu baalu ayirrisinsa. Mootichu gattannore barru barrunkunni mittimmansa aana ledanni no.