Read Sidama_Qullaawa _Maxaafa SOQQAMAASINETE LOOSO 20 Bible Online

SOQQAMAASINETE LOOSO 20 - Sidama_Qullaawa _Maxaafa bible

SOQQAMAASINETE LOOSO 20

¹Cancu hawacci yiita, Phaawuloosi ammanaano gamba asse jawaachishshanno amaale amaalinsahu gedensaanni, insa keerunni yee Meqedooniya ha'ri.

²Giddoonni hige sa"anno gobba baalate ammanaano gamba asse lowo amaalenni jawaachishanni sae Giriike ha'ri.

³Hakkiicho sase agana hee'ri. Hakkunni gedensaanni yowolote ofolle Sooriyu gobba ha'rara hede hee'reenna, Ayihudootu isira gano gantinota afe, Meqedooniyu widoonni hige ha'rara kai.

⁴Beeriyunni Phirihuusi beetti Sophaxiroosi, Teselonqenni Arisxirokoosinna Sikonduusi, Derbenni Gayiyoosi, Issiyunni Ximootewoosi, Tikiqoosinna Xirofimoosi ledosi hadhu.

⁵Insa umo ikkite hadhe Xiroaadaho agartunke.

⁶Ninke kayinni Timu Ayyaana ayirrinsihu gedensaanni, Filiphisiyusinni yowolote ofolline ontikki barra insa noowa Xiroaada iilline, insa ledo lamala barra keeshshinummo.

⁷Lamalate umi barra sagale intammora gamba yinummo. Phaawuloosi soodo ha'ranno daafira, gamba yiino mannira qaale kulanni hashshu taaloote iilli.

⁸Ninkeno minu aana minnoonni mini giddo ofolline hee'noommo. Hakkiicho lowo caabbiyye no.

⁹Awuxekiisi yinannihu mittu beetti masikootete aana ofolle no. Phaawuloosi qaale kulanni keeshshinohura, goxichu amadeennasi sayikkihu minu aana minnoonni mini aaninni uwi. Mannu mare kayisanno woyite reyino.

¹⁰Phaawuloosino dirre beetto hanqafe, «Lubbotenni noona massinoonte» yii.

¹¹Phaawuloosi galagale minu aana minnoonni minira fule, ammanaasinete ledo sagale iti. Hashsha mannu ledo hasaawanni gale soodo ha'ri.

¹²Mannu hakkonne gati beetto haa're minira masse, kunni coyinni lowo geeshsha jawaati.

¹³Ninke Phaawuloosi geegiissinammora yine balanxe markaawetenni Asoosi yinanniwa ha'nummo. Hatto assinoommohu, Phaawuloosi Asoosi geeshsha lekkatenni ha'ra hasi'rino daafiranna hatto assinammora hajajinonkehuraati.

¹⁴Isi ledo Asoosi xaande, ledosi Milixiini ha'nummo.

¹⁵Layinki soodo hakkiinni ka'ne, markaawetenni Kiyosira albaanni noo darga marrummo. Aane noo barra Samoosi marre, soodo Milixiini iillinummo.

¹⁶Phaawuloosi Issiyaho yanna huna giwe, sae Efesooni ha'rara hasi'ri. Tenne hedinohu, Phenxeqosxete Ayyaana Yerusaalamete ayirrisara halcheeti.

¹⁷Phaawuloosi Milixiini hee're manna soye Efesooni Beetekiristaane cimeeyye woshshi.

¹⁸Insano daggeenna, «Issiyunni dayummo barrinni kayise ki'ne ledo hiitto ikke hee'roommoro affinoonni.

¹⁹Ayihudootu gantinoe ganonni qarru iilliero nafa, lowo geeshsha umo'ya heeshshi asse hindiiddotenni Mootichaho soqqamoommo.

²⁰Gudumaalehono mine mine'neno rosiisummo'ne yannara, hasiisanno'nere baala kuloommo'ne ikkinnina mittoreno digatisoommo.

²¹Ayihudeno dagano aagintaabbe Maganunniwa higgannonna Mooticha Yesuusa ammantanno gede farci'roommo.

²²Xaano hakkiira iillummoro mayi daggannoero afummokkinni Qullaawu Ayyaanira hajajame Yerusaalame ha'ranni noommo.

²³Katamma baalate usurunna qarru agare nooeta Qullaawu Ayyaani kulinoe.

²⁴Ani kayinni Mootichu Yesuusi uyinoeha Maganu eltoha Dancha Duduwo kulate looso gudammo geeshsha lubbo'ya nafa dimarareemmo.

²⁵«Xaa geeshsha ki'ne mereero Maganu gashshootire kulanni keeshshoommo. Kunni ka'a kayinni ki'ne giddonni mittuno afannoekkita afoommo.

²⁶Kunnira, ki'ne giddonni mittuno bairo, ani xa'mameemmokkita techo huwachisheemmo'ne.

²⁷Togo yeemmohuno, Maganu hedinore mittoreno gatisummokkinni kuloommo'ne daafiraati.

²⁸Qullaawu Ayyaani ki'ne hoshshate allaalaasine asse worino'nena, umi'neranna hoshshate seekkitine qorophe. Isi mundeesinni woxxinota Maganu Beetekiristaane allaalle.

²⁹Ani ha'rummohu gedensaanni hoshsha marartannokki hiyyeeyye daggannota afoommo.

³⁰Ki'ne giddonnino mitu mitu shokkashsho coye rosiissanni, lowo ammanaasine insawa qoltanno.

³¹Kunnira, sase diro wo'ma hashsha barra hindiiddi'ranni farci'rummo'neta qaagginanni umo'ne agadhe.

³²Xaano ikkiro Maganohonna lossannohura, qoleno qullaawootu ledo iqqa aanno'nehura eltote qaalira eeggo oommo'ne.

³³Ani mittuwiinnino womaashsha, culkanna imaana yore diegennoommo.

³⁴Anga'yanni loosoommo uduunninni umo'yanna ledo'yare kaa'loommota ki'nenni affinoonni.

³⁵Mootichu Yesuusi, ‹Adhannonkunni aannohu ba'raa'rinoho› yiinonte gede, angankenni loonse wolqa hoogginore kaa'la hasiissannonketa batinye doogonni kuloommo'ne» yii.

³⁶Hakkunni gedensaanni, Phaawuloosi baalunku ledo guluphe Magano huucci'ri.

³⁷Baalunku Phaawuloosi cu'midhe wi'litanni sunqitusi.

³⁸Roorsite dadillitinohu, «Kunni ka'a diaffinannie» yiino daafiraati. Yowolo noo dargi geeshshano geegiissitusi.