Read Sidama_Qullaawa _Maxaafa SOQQAMAASINETE LOOSO 22 Bible Online

SOQQAMAASINETE LOOSO 22 - Sidama_Qullaawa _Maxaafa bible

SOQQAMAASINETE LOOSO 22

¹«Annuwa'yanna roduuwa'ya, ku'leemmo'nere macciishshe"e!» yii.

²Ibiraawootu afiinni coyi'rita, wonawiinni roore sammi yitu. Phaawuloosino,

³«Ani Kiliqiyaho Xerseesi Katamira ilamoommo; ilama'yano Ayihudete. Lophoommohu kayinni kunni Yerusaalamete Katamiraati. Rosiisaanchi'yano Gamaaliyaaliiti. Annuwanke Seerano seekke rosoommo. Techo ki'nente gede Maganoho laalaate soqqameemmoho.

⁴Mootichu doogo hadhannore baala qarrise shaate hasi'reemmoho. Meyaa labbaaha amade usuru minira eesseemmoho.

⁵Kuni coyi halaale ikkinota qeesootu qarinna songo gudisante farcidhanno. Demaasiqote noo roduuwansa qorichishantanno gede amade Yerusaalame abbate borro adhoommohu insawiinniiti.

⁶«Ani Demaasiqo ha'ranni katama iilla rahummota, hedeweelcho barru taalootira lowo xawaabbi gordu iiminni mule'ya bilicci yii.

⁷Hakka woyite ani uulla uwe, ‹Saawuli, Saawuli, mayira xiiwattoe?› yitanno huuro macciishshummo.

⁸Anino, ‹Mooticha'ya, ati ayeti?› yee xa'mummo. «Isi qole, ‹Xiiwattoehu ani Naaziretete Yesuusaati› yii.

⁹Ledo'ya noo manni xawaabballa afinona, ledo'ya hasaawanni noohu huuro dimacciishshino.

¹⁰Anino, ‹Mooticha'ya, ma asso?› yee xa'mummo. «Mootichuno, ‹Gotti yite Demaasiqo ha'ri. Assattora hendoonnire baala hakkiicho kullannihena› yiie.

¹¹Hakko bilicceessinni kainohunni ille la"a gibbeennae, ledo'ya noo manni massage Demaasiqo iillishie.

¹²«Hakkiicho Hanaaniya yinanni manchi no. Kuni manchi Demaasiqote heedhanno Ayihudooti ayirrissannoho. Seerano seekke agadhanno manchooti.

¹³Isi mule'ya daye uurre, ‹Rodoo'ya Saawuli, illekki galagalte fa'nito› yiie. Hakkawoyintenni ille'ya fa'nitu; isono laummo.

¹⁴Isi qole, ‹Annuwanke Magani isi hedinore afattora, Keeraancho Soqqamaanchosi afattoranna huurosi macciishshattora balaxe doorinohe.

¹⁵Hatto assinohuno, isire afoottorenna macciishshoottore mannu baalu albaanni farci'rattoha ikkatto gedeeti.

¹⁶Xa mayiraati keeshshattohu? Gotti yite su'masi gantanni cuuami; cubbokkino hayishshi'ri!› yiinoe.

¹⁷«Hakkunni gedensaanni Yerusaalame hige Qullaawa Mine huucci'ranni hee're ajuuja afoommo.

¹⁸Mootichano, ‹Ati anere farci'ratto woyite macciishsha gibbannohe daafira, keeshshittokkinni rakke Yerusaalametenni fuli› yee coyi'ranna ille'yanni afoommo.

¹⁹Anino, ‹Mooticha'ya, xaadu minna ha'ranni ate ammantinore baala usursiisoommotanna ganoommota insa affino.

²⁰Ate naqaashshe ikkinoha Isxifaanoosi kinnatenni ganne shini barra ani ledo noommo. Shituri uddanna agaroommohuno aneeti› yoommo.

²¹Mootichuno, ‹Ani xeertote noo dagawa soyemmohe daafira, kai ha'ri!› yiinoe» yii.

²²Tenne coyi're guda geeshsha hakko noori baalu sammi yite macciishshitu. Hakkunni gedensaanni qaalensa naggi assite, «Togoo manchi gobbate aaninni bao! Lubbotenni hee'ra dihasiissannoho» yite cancitu.

²³Imaanansa hurguffanni buko iima qolte fincitanni cancitu.

²⁴Olantote hajajaanchi, Phaawuloosi olantote qacha haadhe hadhanno gede hajaji. Mannu kageeshshi geeshsha isi aana mayira cancannoro afate, gannanni xa'minanni gede hajaji.

²⁵Sunchunni wiqqi assite usurte gantara ka'uta, mulesi uurre nooha xibbuu olanto hajajaancho, «Ani Roomu qansicha ikke hee'reenna, assoommori nookkiha gana garaho?» yee xa'mi.

²⁶Xibbuu olanto hajajaanchi, isira aliidihuwa mare, «Kuni manchi Roomu qansichaatina ma assiniro woyyate?» yii.

²⁷Hakku olantote hajajaanchi Phaawuloosiwa shiqqi yee, «Koo mancho, ati Roomu qansichaati?» yee xa'mi. Phaawuloosino, «Ee hattoonti» yee qoli.

²⁸Olantote hajajaanchino, «Ani tenne qansichimma afi'rate lowo woxe baaxxoommo» yii. Phaawuloosi qole, «Ani isinni tenne qansichimma giddo ilamoommoho» yii.

²⁹Kunnira, wona qortara qixxaabbe noori ka'a shiqqi yitu. Olantote hajajaanchino cagaagetenni usurrihu Phaawuloosi Roomu qansicha ikkinota huwati yannara waajji.

³⁰Layinki soodo olantote hajajaanchi, Ayihude Phaawuloosi amaddinohu mayiraatiro afara hasi'ri. Qeesootu roorrootinna songo gudisante gamba yitanno gede hajaji. Phaawuloosino usurunni tire haa're insa albira massi.