Read Sidama_Qullaawa _Maxaafa SOQQAMAASINETE LOOSO 23 Bible Online

SOQQAMAASINETE LOOSO 23 - Sidama_Qullaawa _Maxaafa bible

SOQQAMAASINETE LOOSO 23

¹Phaawuloosi songo duu're lae, «Roduuwa'ya, techo geeshsha Maganu albaanni wodani'yanni dancha hedannilla noommo» yii.

²Qeesootu roorrichi Hanaaniya kayinni Phaawuloosi mule uurrite noore, gante afoo beeshshitanno gede hajaji.

³Phaawuloosi qole Hanaaniya, «Ati noora buurroonni huxxi, ateno Maganu ganannohe. Ane coyira seeru garinni yoo yaattora ofolte heedhe, seerimale mayira gansiisattoe?» yii.

⁴Hakko uurre noo manni Phaawuloosi, «Maganunniha qeesootu qara xonatto?» yii.

⁵Phaawuloosino, «Roduuwa'ya, qeesootu qara ikkinota diafoommo. ‹Gashshinohu aana busha coyidhooti!› yine borreessinoonnina» yii.

⁶Phaawuloosi hakko noo manni gamisu Farisoota, gamisu qolte Saduqoota ikkitinota afe, «Roduuwa'ya, ani Farisichaho; Farisichu beettooti. Xa ani konniicho uurroommohu, reyitinori ka'annota afoommohuraati» yee qaalesi naggi asse coyi'ri.

⁷Phaawuloosi konne coye coyi're kaita, Farisootunna Saduqootu mereero gibbo ka'eenna, songono lamewa baxxitu.

⁸Hatto ikkinohu Saduqootu, «Kao dino; sokkaasineno dino; ayyaanuno dino» yitanno. Farisootu kayinni, kuni sasunku coyi noota ammantanno daafiraati.

⁹Hatte yannara lowo canci kai. Farisootu widiri gamu Muse Seeri rosiisaano ka'e, «Ninke kunni manchi aana busha coye dianfoommo. Mayi afino? Sokkaasinchu woy ayyaanu kulinosiha ikkanno» yite moromantu.

¹⁰Gibbo batidhuta olantote hajajaanchi, Phaawuloosi gawajjitannosikki gede, «Haadhine olantote qacha masse!» yii.

¹¹Layinki hashsha Mootichu Phaawuloosi mule uurre, «Jawaati! Anere Yerusaalamete farci'rittonte gede Roomahono farci'ratto» yiisi.

¹²Layinki barra Ayihudootu gamba yite, «Phaawuloosi shinummokkinni, sagaleno di"inteemmo; waano diangeemmo» yite xaartu.

¹³Tenne ganora gamba yiino manni shoyilluu aleenniiti.

¹⁴Insano qeesootu roorrootiwanna cimeeyyenniwa marte, «Phaawuloosi shinummokkinni sagaleno inteemmokki gede xaarroommo.

¹⁵Kunnira ki'ne songote ledo amaalantine ‹Iso seekkine qorreemmo coyi no› yitine lawissine, haa'ne abbinanni gede olantote hajajaancho xa'me! Hakka woyite isi kawiira iillikkinni, doogo agarre shineemmona» yitu.

¹⁶Ikkollana Phaawuloosira rodoote beetti tenne gano macciishshe olantote qacha mare, Phaawuloosira kulisi.

¹⁷Phaawuloosino xibbu olanto roorricha woshshe, «Konne beetto olantote hajajaanchiwa massi; kulannori noona» yii.

¹⁸Xibbu olanto roorrichino haa're masse, «Konne beetto usuru mine noohu Phaawuloosi, ‹Isira kulannori noona massi!› yeenna abboommo» yii.

¹⁹Olantote hajajaanchino beetto anga amade qacce fushshe callichosi, «Ma kulattoeraati?» yee xa'mi.

²⁰Beettuno, «Ayihudootu Phaawuloosi coye seekkite qortannoha labbe, ga'a songonniwa shiqishattonsa gede ma'litino.

²¹Ati kayinni, ‹Maahoyye› yitooti. Insa, ‹Iso shinummokkinni sagale di"inteemmo; waano diangeemmo› yite shoyilluu ale ikkanno manni doogote iso shaate gaa'lite agarte no. Kune xa ati yaattore calla agarte no» yii.

²²Olantote hajajaanchino, «Konne coye anera kuloottota wolu mittuno afoonke» yee beetto ha'risi.

²³Hakkunni gedensaanni olantote hajajaanchi lame xibbu olanto roorroota woshshe, «Konne hashsha sase saatenni Qiisaariya hadhannore 200 olanto, 70 faradaasinenna urde amaxxinoha 200 manna qixxeesse!

²⁴Phaawuloosirano farashsho qixxeessitineenna, keerunni gobba gashshinohuwa Filikisiwa iillanno gede asse!» yii.

²⁶«Ayirradu, gobba gashshoottohu Filikisi, ane Qelawudewoosi Lusiyoosiwiinni keeru iillohe!

²⁷Konne mancho Ayihudootu shite hooggino; Roomu qansicha ikkinohura olanto'ya ledo iille gatisoommo.

²⁸Mayira gibbinosiro afammora songonsawano haa're massoommo.

²⁹Gibbannosihu, ‹Seeranke hunino› yitanniiti. Ikkollana reyotenna usuraho iillishannosi coyi dino.

³⁰Konne mancho shitara gantino gano macciishshanni hee'renni atewa soommona, gibbusirino atewa shiqqe coyi'rantanno gede kuloommonsa» yee borreesse soyi.

³¹Olantono hajajinonsa garinni Phaawuloosi hashsha haadhe Antiphaxiriisi yinanniwa iillishshu.

³²Layinki barra Phaawuloosi faradaasinete ledo ha'ranno gede assite insa olantote qacha higgu.

³³Faradaasine Qiisaariya iillite, borro massite gobba gashshinohura uyitu. Phaawuloosino isiwa shiqishshu.

³⁴Gobba gashshinohu borro laihu gedensaanni, Phaawuloosi, «Gobbakki mamaati?» yee xa'mi. Kiliqiyu gobbaha ikkinota afe,

³⁵«Gibbuheri dagguro coyekki afeemmona» yee Heeroodisi hoowe giddo agarranni gede hajaji.