Read Sidama_Qullaawa _Maxaafa SOQQAMAASINETE LOOSO 26 Bible Online

SOQQAMAASINETE LOOSO 26 - Sidama_Qullaawa _Maxaafa bible

SOQQAMAASINETE LOOSO 26

¹Agiripha Phaawuloosi, «Umikkire ku'latto gede malloonnihe» yiisi. Phaawuloosino anga wixanni aanisinni coye hoo'lanno gede,

²«Moote'ya, Ayihudootu bushiishshinoe coyira aani'yanni coye hoo'late ate albira shiqa'yara lowo geeshsha hagiidhoommo.

³Ati Ayihudete seeranna amanyoote seekkite afoottona, cincatenni macciishshattoe gede huucci'reemmohe.

⁴«Anje'yanni kayise xaa geeshsha hiitto ikke hee'roommoro Ayihudootu egentino. Hundinni kayise xaa geeshsha gosa'ya giddonna Yerusaalamete hee'reemmo gara affino.

⁵Qolteno farcidhannoha ikkoommero, amma'nonkera lowo geeshsha xissiisi'reemmo Farisicha ikkoommota bi'renni egentino.

⁶Xa kayinni konne yoote albaanni uurroommohu, Maganu annuwankera uyino gondoori hexxo daafiraati.

⁷Kunni hagiirriwa iillate tonaa lamenti ga'renke Magano hashshanna barra magansidhanni agadhite no. Moote'ya! Ayihudootu bushiishshannoehu kunniraati.

⁸Maganu reyitinore kayisannota ki'ne mayira ammana hooggini?

⁹Ani umi'ya Naaziretennihu Yesuusi su'ma danduummo deerrinni giweemmo yee hedoommo.

¹⁰Yerusaalamete assoommohuno konneeti. Qeesootu roorrooti uyitinoe roorrenni lowo ammanaasine usurantanno gede assoommo. Shini woyiteno shituri ledo mala xaadoommo.

¹¹Lowo yanna xaadu minna ha'ranni qorichinshanninsa gedenna insano Mooticha xontanno gede assoommo. Lowo geeshsha giirame, wole katamma nafa ha'ranni insa xiiwoommo.

¹²«Kunni daafira qeesootu roorrootiwiinni roorrenna hajajo adhe Demaasiqo ha'roommo.

¹³Moote'ya, ha'ranni hee're barru taalootira arrishshote xawaabba roorino xawaabbi anenna ledo'ya noo manni gaangaawira xawanna afoommo.

¹⁴Baalunku baattote aana umbe hee'neenna Ayihudete afiinni, ‹Saawuli, Saawuli, mayira xiiwattoe? Gatima kadittoro umikkira bushshannohe› yaanno qaale macciishshoommo.

¹⁵Anino, ‹Mooticha'ya ati ayeti?› yoommo. «Mootichuno, ‹Xiiwattoehu ani Yesuusaati.

¹⁶Xa ka'e gotti yite uurri. Ani atera leelloommohu, xa afittonna kunni ka'ano leelleemmohe coyira soqqamaanchonna naqaashshe ikkattoe gede shoomammoheraati.

¹⁷Israeeletenna xa soyemmohe daga anganni gatiseemmohe.

¹⁸Illensa fanattonna tunsichunni xawaabba fushshattonsara, Sheexaanu gashshooti giddonni Maganunniwa qolattonsa gede asseemmohe. Insa ane ammanansanni cubbu maaro afidhanno; doorantinori ledono iqqa adhitanno.›

¹⁹«Moote'ya Agiripha, tenne gordunni daggino ajuujara hajajama digiwoommo.

²⁰Kunnira, umo asse Demaasiqote noo manna qoleno Yerusaalametenna Yihudu gobbara noorenna daga aagintaabbe Maganunniwa higganno gede rosiisoommo. Aagintaawansa leellishanno coyeno assitanno gede rosiisoommonsa.

²¹Kunninni kainohunni Ayihude Qullaawa Mine amadde shitaera ka'ino.

²²Xaa geeshsha kayinni Maganu kaa'lanni nooe; kunnira aju akkalira farci'ranni konne uurre noommo. Himanaanonna Muse ikkanno yitinore agurranna wolere dicoyi'roommo.

²³Insa, ‹Kiristoosi qarra adhanno; umiha ikke reyotenni ka"atennino Israeeletenna dagate xawaabba leellishanno› yitino» yii.

²⁴Phaawuloosi konne coye coyi'ranni hee'reenna Fisxoosi, «Phaawuloosi, xa sayisitto; lowore rosakki macharaarsitinohe!» yii.

²⁵Phaawuloosi qole, «Ayirrado Fisxoosi! Halaalenna taalo coyella coyi'roommo ikkinnina dimacharaaroommo.

²⁶Moote konne coye seekke egennino daafira, isira coyi'reemmo. Maanxe assinoonni coyi nookki daafira, mittuno go'lannosi coyi hee'rannokkita afoommo.

²⁷Moote Agiripha! Himanaano borreessitino coye diammanatto? Ammanattota afoommo» yii.

²⁸Agiriphano Phaawuloosi, «Ati tenne shiima yanna giddo ammanaasincho assattoeraatinso?» yii.

²⁹Phaawuloosino, «Harancho woy seeda yanna giddono ikkiro ate calla ikkittokkinni techo coye'ya macciishshituri baalu usurama'ya agurranna ane gede ikkitara Magano huucci'reemmo» yii.

³⁰Hakkunni gedensaanni moote, gashshaanchunna Beriniqe ledonsa ofolle noo manni baalu ledo gotti yee kai.

³¹Hakkiichinni fulte hadhanni mimmitoho, «Kuni manchi mittono reyote iillishanno coye diassino» yitu.

³²Agiriphano Fisxoosira, «Kuni manchi ‹Coye'ya jawu Roomu mootewa sayisse"e› yaa hoogoommero tidhamannohu baino» yii.