Read Sidama_Qullaawa _Maxaafa SOQQAMAASINETE LOOSO 27 Bible Online

SOQQAMAASINETE LOOSO 27 - Sidama_Qullaawa _Maxaafa bible

SOQQAMAASINETE LOOSO 27

¹Ixaaliyu gobba ha'nammora ka'nummota, Phaawuloosinna wole usuranyoota Awugisxoosi bagadaano ledo noohu xibbu hajajaanchi Yuliyoosi yinannihu anga wortu.

²Issiyaho baaru malkuwa hadhannotera Adiramixiyooni yinanni markaawera ofolline ha'nummo. Teselonqe hee'rannohu Meqedooniyu manchi Arisxirokoosino ledonke no.

³Layinki soodo Sidoona iillinummo. Yuliyoosi Phaawuloosi mararino daafira, jaallasiwa mare Phaawuloosira hasiisannosire kaa'litannosi gede assi.

⁴Hakkiinni ka'ne albankeenni bubbe bubbissanni noo daafira, Qophiroosi giddicho laayyo amande ha'nummo.

⁵Kiliqiyunna Phinfiiliyu mule noo baara sa'ne Muura yinanniha Liqiyu gobba katama iillinummo.

⁶Hakkiicho xibbu olanto hajajaanchi Ixaaliya hadhannota Alekisaanderiyu yowolo afi're, isenni ha'neemmo gede assinke.

⁷Lowo barra suutunni ha'nanni shente, Qenidoosi yinanni katami mulira iillinummo. Bubbe alba hige ha'ra ho'liteennanke, Salimoona qacce widoonni sa'ne, Qerxeesi giddicho gaa'line ha'nummo.

⁸Lowo qarrinni qacce qacce amande ha'nanni Laasiyu Katami mule, «Dancha Malka» yinanni darga iillinummo.

⁹Doogote aana lowo yanna gooffinohuranna qatumete yanna sa'inohura, hatte yannara baaru aana ha'ra waajjishshannota ikkitinohura, Phaawuloosi manna,

¹⁰«Konne manna, kunni ka'a ha'neemmo ha'rinsho aana lowo qarri iillannoti leeltannoe. Markaawetenna hogowu aana calla ikkikkinni, mannu aanano lowo qarri iillanno» yee qorophisiisi.

¹¹Xibbu olanto hajajaanchi kayinni Phaawuloosi yiinontenni roore markaawe laaqannohunna yowolote anni kultannore macciishsha roorsino.

¹²Hatti malka hawado hakko sayisate injiitinokkihura, rooru manni, «Alba hinge ha'ne dandiinanniha ikkiro, aliyye galchiminna wodiidi galchimi farora Finqe yinannita Qerxeesi malka iilline hawado hakko sayinso» yee mala shiqishi.

¹³Manaado wodiidinni dagganno bubbe affe, heddino gede ikkinoha laweennansa markaawete cificho buqqisse hadhara ka'u. Malkatewiinni ka'e, Qerxeesi muleenni higge qacce amadde sa'u.

¹⁴Ikkollana shiima yanna gedensaanni, «Aliyye soojjaati hombobolatteeti» yinanniti wolqaataame bubbe giddichotenni ka'e aanansa daggu.

¹⁵Markaawe diilallo shaffanni qarrissino daafira, bubbe xiibbanna ha'nummo.

¹⁶Qeeda yinanni giddicho gaa'line ha'nanni hee'ne, markaawete yowolo lowo qarrinni gatinsoommo.

¹⁷Markaawete giddo loossannori yowolo goshooshshe markaawete aanira fushshite siiwotenni xaxxe usurtu. Markaaweno Surtiisi yinanniwa shaafaamo darga ubbanno yite waajjite, shara dirrisse bubbe xiibbanna hadhu.

¹⁸Hombobolatte batidhanni hadhinohura, layinki soodo markaawete aana hogomboonni uduunne baaru giddo tuttuga hanaffu.

¹⁹Sayikki barra markaawete giddo loonsanni uduunneno fushshite tuttuggu.

²⁰Lowo barra arrishshonna beeddahe anfummokkinni bubbe lexxitanni hadhinohura, ganteemmo yineemmo hexxo ba'unke.

²¹Mannuno sagale itikkinni lowo barra iillino. Phaawuloosino kae uurre, «Manna, ani yoommota macciishshitine Qerxeesinni ka"a hoogginoommero, kuni qarrinna tini bao di"iillitanno.

²²Xaano ikkiro markaawennita ikkinnina, ki'ne mittuno diba'inannina waajjitinoonte!

²³Sai hashsha isiha ikkoommohu magansi'reemmo Magani soyino sokkaasinchi daye mule'ya uurre,

²⁴‹Phaawuloosi, waajjitooti! Jawu moote albaanni uurra hasiissannohena. Ledokki hadhanni nooreno Maganu angakkira sayise uyino› yee kulinoena waajjitinoonte.

²⁵Kunnira, manna waajjitinoonte! Maganu kulinoere baala wonshannota ammaneemmo.

²⁶Ikkirono bubbe massite mitte giddicho aana tuggannonke» yii.

²⁷Tonaa shoolki hashsha Adiriya Baari [3] aana bubbe daassitannanke ha'nanna hashshu taalootira markaawete giddo loossannorira baaru qacce iillitinoha lawinsa.

²⁸Kunnira, bikkinanni siiwo baaru giddora tugge la'anno woyite giddo 80 cigile ikki. Xaano shiima geeshsha keeshshite bikkaasincho tugganno woyite giddo 60 cigile ikki.

²⁹Markaawe baaru gama noo kinnara tu'mitannokki gede, badheenni qolte markaawe usurrannita shoole ciffa baaru giddora qolte tugge, hashshu rahe soodannonsa gede huuccidhu.

³⁰Markaawete giddo loossannori mereerinni fulte xooqqara hedde, markaawete ciffa tuggannoha labbe, markaawete aaninni yowolo haadhe baaru giddo tuggu.

³¹Hakko mereero Phaawuloosi olantote hajajaanchonna olanto woshshe, «Kuni manni sammi yee ofolla hoogiro, ki'ne digattinanni» yiinsa.

³²Kunnira olanto yowolo usurroonni siiwo murte wayi duhanno gede assitu.

³³Sooda rahita, Phaawuloosi sagale ittanno gede kulanni, «Sagale ittinikkinni techo tonaa shoolki barraati.

³⁴Kunnira xa ballo sagale itte! Ittiniro lubbo assidhinanni. Umi'ne dananchi nafa tae diuwannona» yii.

³⁵Hatto yiihu gedensaanni tima haa're wo'munku albaanni Magano galati. Timano hiiqqaqqe ita hanafi.

³⁶Hatte yannara baalunku jawaatte sagale ittu.

³⁷Markaawete giddo hee'noommori mitteenni 276 mannaati.

³⁸Baalunku itte ka'uhu gedensaanni, markaawete aana hogomboonni qamade fushshite baaru giddo tugge markaawe shottanno gede assitu.

³⁹Soodita, hiikkiira iillite nooro diaffino. Ikkollana baaru qaccera noohu shaafaamu dargi leellinsa; dandiitoommero markaawe xiibbe qacce fushshitara heddu.

⁴⁰Markaawete ciffa tirte baaru giddo agurtu. Hakkawoyintenni markaawete laaqaasinchu siibba tirte, shara hoolte bubbe bubbissanno widoonni qolte uurrisse, qacce higge hadhu.

⁴¹Ikkollana markaawe shaafu duunora tu'mite eela higge galchantu. Albiido shaafaho qasidhe millo gibbu. Badheenni kayinni bubbe lowo geeshsha xiibbanni noohura markaawe hiiqqaqqantu.

⁴²Olanto, mittuno daahe fule ba"annokki gede hasidhe, usuranyoota shite guddara heddu.

⁴³Xibbu roorrichi kayinni Phaawuloosi gatisara hasi'rino daafira, heddinore assitannokki gede hooli. Dandiitannori baaru giddora kubbite e'e, daakke baattote aanira iillitanno gede hajaji.

⁴⁴Wolootu kayinni markaawete cufananna hiiqqantino haqqe cu'midhe fultanno gede kuli. Kunni garinni baalunku keerunni baattote aanira iillitu.