Read Sidama_Qullaawa _Maxaafa SOQQAMAASINETE LOOSO 28 Bible Online

SOQQAMAASINETE LOOSO 28 - Sidama_Qullaawa _Maxaafa bible

SOQQAMAASINETE LOOSO 28

¹Keerunni baattote aanira iillinummo woyite, marre hee'noommo giddicho Maalta yinannita ikkitinota buunxummo.

²Hatte giddicho manni dhaggeeffantanni garinni wosinchimma haa'rinke. Xeena ganeenna qiidino daafira giira iibbishshe giwaa'neemmo gede assitunke.

³Phaawuloosi xigiro haa're giirate tuganna iibbillunni kainohunni buute fulte angasira qa'mitu.

⁴Maalta Giddicho manni buute Phaawuloosi anga aana qa'mite noota afe mimmitoho, «Kuni manchi halaalinta manna shiinoho. Baaru dambaliwiinni gate fulirono, halaaluwiinni gate fula didandiino» yii.

⁵Phaawuloosi kayinni buute giirate aanira wixe tuge, mittoreno ikkikkinni gati.

⁶Mannuno, «Mamootinni mamoote biso darshanno woy uwe reyanno» yee agari. Ikkollana lowo yanna agarte, mittoreno ikka hoogita affe, albi hedonsa soorrite, «Kuni maganoho!» yitu.

⁷Hakkiicho hee'noommohura mule giddichote gashshaanchira Pupiliyoosira baatto nosi. Kuni manchi minisira haa're masse sase barra seekke wosinsinke.

⁸Hatte yannara Pupiliyoosi anni iibbabbisheennasinna godowa gobbara qolannasi dhiwame goxe no. Phaawuloosi isiwa shiqqi yee huuccatto assisi. Angano aanaho wore hursisi.

⁹Hakkunni gedensaanni giddichote heedhannori wole dhiwamaanono dagge hurtu.

¹⁰Mannu lowo geeshsha ayirrise afanshano uyinke. Ha'nammora ka'nummota, hasiisannonkere baala markaawete hogobbunke.

¹¹Sase agana Maalta keeshshinummohu gedensaanni, hawado ledonke keeshshitino Markaawe Alekisaanderiyunnitera ofolline ha'nummo. Tini markaawe Diyosiqoroosi yinanniri lakkuwu maganna sumudi aanaho noote.

¹²Serakuusi yinanni katama iilline hakko sase barra honsummo.

¹³Hakkiinni ka'ne baaru qacceenni hinge Regiyumi yinanni katama iillinummo. Hakko mitto barra honsummohu gedensaanni wodiidi bubbe ka'eenna layinki barra Putiyoluusi yinanni katama ha'nummo.

¹⁴Hakkiicho xaandoommo roduuwi lamala barra insawa keeshshineemmo gede huuccidhunke. Hakkunni gedensaanni fulle Rooma ha'nummo.

¹⁵Roomaho heedhanno roduuwi ninke duduwo macciishshite, Afiyoosi yinanniwanna Sase Wosinu Minna yinanniwa shiqqunke. Phaawuloosi insa afe Magano galati; wodanisino hagiidhi.

¹⁶Rooma iillinummota, Phaawuloosi mittu agarannosi gaaddichi ledo callisi hee'ranno gede assitu.

¹⁷Sasu barri gedensaanni Phaawuloosi Roomaho heedhannore Ayihudete jajjabba woshshiishi; gamba yituta, «Roduuwa'ya, Israeeletenna akaakkanke budi aana assoommo sao dino. Kayinni kune amadde usurte Roomaho sayisse uyitinoe.

¹⁸Roomootu qorte affanno woyite, reyote iillishanno coyi nookki daafira tirtaera heddino.

¹⁹Ayihude kayinni tirrannieta gibbeenna, ‹Coyi'ya jawu mootewa saoe› yoommo. Ikkirono gosa'ya aana ku'leemmo coyi dinoe.

²⁰Xa woshshoommo'nehu la"ammo'neraatinna konne coye kulammo'neraati. Ani tenne cagaagenni usuramoommohu, Israeelete uyinoonni hexxo daafira yeeti» yii.

²¹Insa qolte, «Yihudunni atere kultanno borro di"iillitinonke. Kawa dayino manni giddonnino ate su'ma bushatenni kayisinohu dino.

²²Ati amadootto amma'no mannu darga baalaho giwinota anfoommona, hanni hedokki maatiro macciishshineemmona kulinke» yitu.

²³Xaaddanno barra amaxxite hadhe, kiirono lexxite isi noowa ka'e daggu. Isino soodinni hawarro geeshsha Maganu gashshootire farci'ranni hedosi xawise kulinsa. Insa ammanchiishate Muse Seerinna himanaanote borro giddo noo coye kulanni Yesuusire egensiisinsa.

²⁴Mitu mitu kulino coye ammantu. Gamisu kayinni diammantino.

²⁵Kunnira mimmitinsa ledo afoo xaaddukkinni billaallitara ka'u. Billaallitara albaanni Phaawuloosi, «Qullaawu Ayyaani himanaanchu Isayaasi widoonni qole akaakka'nera kulinori halaaleho.

²⁶Coyi'rino qaalino, «Hakkunni manniwa marte, ‹Aye geeshshano macciishshitine dihuwattinanni; aye geeshshano la'ine dibuuxxinanni!› yaannoho.

²⁷Kunni manni wodani dillaawino; maccansa beebbino; illensa tunsitino. Hatto ikka hooggoommero, illensanni la'e, maccansanni macciishshite, wodaninsanni wodanchite, anewa higgeenna hurseemmonsahu gatino.

²⁸«Xa kayinni tenne Maganunnita gatisaanchimmasi sokka dagate sonkoonnita affe; insano, ‹Maahoyye› yite adhitanno» yii.

²⁹Konne coye coyi'rihu gedensaanni Ayihudootu mimmitinsa ledo xa'mantanni hadhu.[4]

³⁰Phaawuloosi kiru mine lame diro hee'ri. Hakkiicho hee're isiwa daanno manna baala haa'ri.

³¹Maganu gashshootire kulanni, Mootichu Yesuusi Kiristoosireno ittisannohu nookkiha ruxxi yiikkinni rosiisi.