Read Sidama_Qullaawa _Maxaafa SOQQAMAASINETE LOOSO 3 Bible Online

SOQQAMAASINETE LOOSO 3 - Sidama_Qullaawa _Maxaafa bible

SOQQAMAASINETE LOOSO 3

¹Mitto barra Pheexiroosinna Yohaannisi honse saatera huuccattote Qullaawu Minira hadhu.

²Hakkiicho, «Biifado» yinanni waalchi no. Mitto ilamihunni kayise laanshaawe hee'ranno mancho mannu barru barrunkunni haa're abbe hakkiicho wo'rannosi. Isino hakkiicho offolle Qullaawu Minira eanno manniwiinni woxe huucci'ranno.

³Kuni manchi Pheexiroosinna Yohaannisi Qullaawu Minira e'anna afe woxe huucci'ri.

⁴Insano mancho buuxxe la'u. Pheexiroosi, «Ninke widira higge lai!» yiisi.

⁵Manchu woxe uyitannosiha laweenna insa buuxe lai.

⁶Pheexiroosi kayinni, «Woxunna culku dinoe; nooeha kayinni eemmohe; Naaziretennihu Yesuusi Kiristoosi su'minni ka'e ha'ri!» yiisi.

⁷Qiniiticho angasi amade gotti assisi. Hakkawoyintenni mogolesinna koomeettosi jawaattu.

⁸Isino gotti yee uurri; qaafanni insa ledo Qullaawu Minira ei. Ha'ramanninna kukkubbanni Magano galati.

⁹Isi qaafannanna Magano galatanna mannu baalu lai.

¹⁰«Biifado» yinanni waalchira ofolle woxe huucci'ranno manchi iso ikkinotano affu. Isi aana ikkino coye la'e dhaggeeffatte maala'litu.

¹¹Manchu Pheexiroosinna Yohaannisi cu'mi're hee'reenna mannu afe maala'lanni, «Selemooni Nafarcho» yinanniwa hige dayi.

¹²Pheexiroosi hakkonne manna lae, «Israeelete manna, konne coye mayira maala'litinanni? Mayirano buuxxine la'inanninke? Ninke uminke wolqanni woy danchu loosinkenni konne mancho qaafe ha'ranno gede assinoommoha lawanno'ne?

¹³Annuwanke Abirihaami, Yisihaaqi, Yaiqoobi Magani, Beettosi Yesuusa ayirrisinosi. Ki'ne kayinni iso Philaaxoosi angara sayissine uyitinoonni; Philaaxoosi agurasira hasi'rita nafa, ki'ne macciishsha gibbinoonni.

¹⁴Ki'ne Qullaawanna keeraancho, ‹Dihasi'neemmo› yitine, mitto manna shaannoha tiranno'ne gede huuccidhinoonni.

¹⁵Heeshsho aannoha shitinoonni; Maganu kayinni reyotenni kayisinosi. Kunni coyira ninke naqaashshete.

¹⁶Kuni la'inannihunna affinoonni manchi hure jawaatinohu Yesuusinni afi'nanni amma'nanniiti. Yesuusa amma'nasinni ki'ne baalunku albaanni wo'ma fayyimma afi'rino.

¹⁷«Xa roduuwa'ya, ki'neno mootoolla'neno Yesuusi aana assitinoonni coyi afa hoogatenni assitinoonniha ikkinota afoommo.

¹⁸Maganu kayinni balaxe himanaano baalate afiira, ‹Kiristoosi qarra adha hasiissannosi› yee coyi'rino garinni wonshino.

¹⁹Kunnira, cubbi'ne aguramanno'ne gede aagintaabbine Maganunniwa higge.

²⁰Haaroo'mitinanni yanna Mootichuwiinni dagganno'ne; Maganu balaxe doorinoha Kiristoosa Yesuusa soyanno'ne.

²¹Maganu qullaawa himanaano widoonni qole balaxe coyi'rinonte gede, baalunku coyi haaro ikka geeshsha, Isi gordoho keeshsha hasiissannosi.

²²Muse, ‹Mootichu Magani'ne ane kayisinte gede gosa'ne giddonni himanaancho kayisanno. Isi kulanno'nere baala macciishshe!

²³Hakku himanaanchi yaannota macciishshannokkihu baalu horonta mannuwiinni baxxe ba"anno› yiino.

²⁴Saamueelinna isi kawa noo himanaano baala, tenne yannare ikkanni noore kultino.

²⁵Ki'ne himanaanote ragi'raasineeti. Maganu Abirihaamira, ‹Baattote aana noo manni baalu sirchikkinni maassamanno› yee annuwankera eino gondoorono ragidhinanni.

²⁶Maganu Soqqamaanchosi doore soyinohu balaxe ki'neraati. Hatto assinohu mittu mittunku bunshete doogonni higgineenna maassi'ra'neraati» yii.