Read Sidama_Qullaawa _Maxaafa SOQQAMAASINETE LOOSO 4 Bible Online

SOQQAMAASINETE LOOSO 4 - Sidama_Qullaawa _Maxaafa bible

SOQQAMAASINETE LOOSO 4

¹Pheexiroosinna Yohaannisi mannaho coyidhanni heedheenna qeesootu, Qullaawa Mine agartannori hajajaanonna Saduqootu insawa dagge,

²lamunku soqqamaasine Yesuusi reyotenni kaino yitanni mannaho rosiissinohuranna reyotenni ka"a noota kultino daafira hanqitu.

³Kunnira amadde ka'e yanna hashshitinohura sooda geeshsha usuru mine gashshitunsa.

⁴Qaale macciishshitinori giddonni kayinni lowo manni ammani. Ammantinori kiirono onte kumeeti.

⁵Layinki barra Yihudu roorrootinna geerru, seeru rosiisaano Yerusaalamete songitu.

⁶Songino manni mereero qeesootu roorrichi Hannanna Qeyaafa, Yohaannisinna Alekisaanderi, hattono qeesootu qari mini manni baalu ledonsa no.

⁷Insano lamenka soqqamaasine mereeronsa uurrisse, «Konne assitinihu mayi wolqanniiti woy aye su'minniiti?» yite xa'mitunsa.

⁸Hatte yannara Pheexiroosira Qullaawu Ayyaani wo'meennasi, «Ki'ne gosate gashshaanonna geerru,

⁹ninke xa'mammeemmohu mittu laanshaawu manchira assinoonni danchumma daafiraatinna ikke hurino gara afateeti.

¹⁰Kuni manchi hure alba'neenni uurrinohu, ki'ne suttinihunna Maganu reyotenni kayisisihu Naaziretete Yesuusi Kiristooosi su'minni ikkinota ki'ne baalunkunna Israeelete manni baalu afo.

¹¹Ki'ne mine mintinanniri mishshine agurtinoonni kinchi isooti; isi dhaawate kincho ikkino.

¹²Gato wolewa ayewano dino. Gatote hasiisannonkehu mannaho uyinoonni su'mi gordoho woroonni wolu dino» yii.

¹³Pheexiroosinna Yohaannisi waajjitukkinni coyidhino daafira, songite noori roso afidhinokkire mulla manna ikkitinota affino daafira maala'litu. Yesuusi ledo keeshshitinotano huwattu.

¹⁴Huri manchi insa ledo uurre noota la'anni noo daafira, mittoreno yaa didandiitino.

¹⁵Kunnira songotewiinni ka'a shiqqi yitanno gede assite, insa insanaawa,

¹⁶«Xa konne manna hiissino? Tini lowo dhagge insa anga loosantinota Yerusaalamete hee'ranno manni baalu macciishshino.

¹⁷Kunni ka'a kayinni kuni coyi mannu mereero hala'lannokki gede, kunni ka'a konne su'ma gantanni ayerano kultannokki gede qorophisiinso» yite amaalantu.

¹⁸Hakkunni gedensaanni insa woshshite, Yesuusi su'ma kayisse coyidhannokki gede woy rosiissannokki gede duudhe hajajju.

¹⁹Pheexiroosinna Yohaannisi kayinni, «Maganoho hajajama agurre ki'nera hajajama Maganu albaanni dancha coyetini? Hanni Ki'nenni yiiyye.

²⁰Ninke anfoommorenna macciishshinoommore kula diagurreemmo» yite qoltunsa.

²¹Songono insa qorichisha dandiitannokkita affe, mannuno kunni coyira Magano galatanni noo daafira waajjite ledde qorophisiisse hadhanno gede assitu.

²²Tenne maalalenni huri manchira dirisi shoyillaaho.

²³Pheexiroosinna Yohaannisi tidhante jaallansawa higge, qeesootu roorrootinna Yihudu geerri yitinonsare baala kultunsa.

²⁴Insano konne coye macciishshite qoonqonsa naggi assite mitteenni Magano, «Gordonna baatto, baaranna baaru giddo noore baala kalaqoottohu Wo'munkura Aliidi Mooticha!

²⁵Qullaawu Ayyaani widoonni qolte borojjichikki anninke Daawitira, ‹Daga mayira hanqitu? Gosano mayira beebbatenni gano gantu?

²⁶Tenne gobba mootoolla ka'e, Mootoollano mitteenni songite, Kaaliiqinna Buuraminohu aana ka'u› yite coyi'roottohu ateeti.

²⁷«Halaaleho Heeroodisinna Phenxenichu Philaaxoosi dagatenna Israeelete manni ledo kunni katamira gamba yite, buuraminohu Qullaawu soqqamaanchi Yesuusi aana ka'ino.

²⁸Kuni ikkinohuno, ati balaxxe wolqakkinna hedoottori wo'manno gedeeti.

²⁹Xaano Mootichanke, assitannore afilla; soqqamaanokki qaalekki waajjitukkinni jawaatte kultanno gede assi.

³⁰Qullaawu soqqamaanchikki Yesuusi su'minni dhiwantinori hurtara, dhaggenna maalale assitanno gede angakki diriirsi» yite huuccidhu.

³¹Huuccidhe ka'uta, gamba yite noo dargi shashshafami. Baalunkura Qullaawu Ayyaani wo'meennansa Maganu qaale waajjitukkinni kultu.

³²Ammanaano baalate mittu wodaninna mitte hedo noonsa. Aye manchino, «Kuni aneho» yaannori dinosi. Afidhinori baalu gutoho.

³³Soqqamaasineno Mootichu Yesuusi kaore lowo wolqanni farcidhanni no. Baalunkura jawa Maganu elto noonsa.

³⁴Baattonna mine afidhinori baalu hirte woxe abbitanno daafira, giddonsa gadadaamu mittuno dino.

³⁵Woxeno abbite soqqamaasinete uyitanno. Mittu mittunkura hasiisanno bikkinni iillishshanno.

³⁶Qophiroosi ilama ikkinohu mittu Leewichu Yooseefi yinannihu no. Soqqamaasine iso, «Barnabaasi» yite woshshitannosi. Hatto yaano, «Jawaantete beetti» yaate.

³⁷Isino baattosi hire woxe abbe soqqamaasinete uyi.