Read Sidama_Qullaawa _Maxaafa SOQQAMAASINETE LOOSO 5 Bible Online

SOQQAMAASINETE LOOSO 5 - Sidama_Qullaawa _Maxaafa bible

SOQQAMAASINETE LOOSO 5

¹Hanaaniya yinannihu mittu manchi galtesi Sephiira ledo baatto hiri.

²Galtesino affanna baatto hirino woxe gama gatise gama masse soqqamaasinete uyi.

³Pheexiroosi kayinni, «Hanaaniya, Qullaawa Ayyaana dogattonna baatto hirootto woxe gama gatisi'ratto gede Sheexaanu wodanikki giddora mayira ei?

⁴Hirattora albaanni baatto diatete? Hirittohu gedensaannino woxu diateho? Wodanikkinni konne coye mayira heditto? Magano ikkinnina manna didogootto» yii.

⁵Hanaaniya tenne macciishshanni hee'renni uwe reyi. Konne coye macciishshi manni baalu lowo geeshsha waajji.

⁶Wedellu ka'e reeshsha kafante massite madaartu.

⁷Sase saate gedensaanni Hanaaniya galte ikkinore affukkinni hakkiichira ka'e daggu.

⁸Pheexiroosino, «Hanni kulie, baatto'ne hirtinoonni woxi kageeshshaatilla» yee xa'mise. Iseno, «Ee! Geeshshiralla hirroommo» yitu.

⁹Pheexiroosi, «Maganu Ayyaana jifate mayira sumuu yitini? Kuneeti, galtekki madaare higino manni nafara no. Ateno masse madaarannohe» yiise.

¹⁰Iseno hakkawoyintenni lekkasi mule ubbe reyitu. Wedellu minira e'u yannara reyite noota affe, haadhe massite galtese waamma mule madaartuse.

¹¹Beetekiristaane gudisamantinna konne coye macciishshi manni baalu lowo geeshsha waajji.

¹²Soqqamaasine mannu mereero lowo dhaggenna maalale loossu. Baalunku mitto wodana ikkite Selemooni Daasira gamba yitanno.

¹³Mannu lowo geeshsha ayirrisinonsaha ikkiro nafa, insa widire ikkitinokkiri giddonni ledonsa hee'rate seyatinohu mittu nafa dino.

¹⁴Ikkollana Mooticha ammantinoriti labballunna meentu kiiro ledde ledde batidhu.

¹⁵Lowo manni dhiwamino manna daallasunninna reretenni haa're masse doogote gama woranno. Hatto assitannohu Pheexiroosi hakkaanni hige sa"anno woyite caalisi nafa aanaho uwansara hasidheeti.

¹⁶Mannu Yerusaalamete gaangaawira noo katammanni dhiwamaanonna bushu ayyaani qarrisannore abbitu. Abbiniri baalunku hurtu.

¹⁷Qeesootu roorrichinna isi ledo noori Saduqootu widire ikkitinori baalu hinaasse aanansa ka'u.

¹⁸Soqqamaasineno amadde usuru minira eessitunsa.

¹⁹Maganu sokkaasinchi kayinni hashsha usuru mini cufana fane fushshensa,

²⁰«Hadhine, Qullaawa Mine uurritine tenne haaro heeshsho sokka baala mannaho kulle!» yii.

²¹Soqqamaasineno hajajante soodo Qullaawu Minira marte rosiissu. Hatte yannara qeesootu qarinna ledosi noori songote miillanna Yihudu geerri baalu mitteenni gamba yite, soqqamaasine usuru mininni fushshe abbanno gede manna sokku.

²²Usuru mine agartannori roorrooti kayinni usuru minira marte soqqamaasine hakko hoogge galagalte higge,

²³«Usuru mini waalchi cufame, agaraasineno xullichoho uurrite noore anfoommo. Usuru mine fanne la'neemmo woyite kayinni giddo noonku dino» yite kultu.

²⁴Qullaawu Mini agaraasine hajajaanchinna qeesootu roorrooti konne coye macciishshite, «Kuni maati ikka?» yite amaddannore hooggu.

²⁵Hatte yannara mittu manchi daye, «Usuru minira eessitini manni kuneeti Qullaawa Mine marte rosiissanni no» yii.

²⁶Hakkawoyintenni roorrichu ledosi loossannori ledo mare soqqamaasine haa're abbi. Abbitinonsahu wolqatenni ikkikkinni dogisiissanniiti. Hatto assitinohu, mannu kinnatenni ganannonke yite waajjitino daafiraati.

²⁷Abbite songote albaanni uurrissunsa. Qeesootu roorrichino,

²⁸«Yesuusi su'minni rosiissinannikki gede seekkine kulloommo'ne. Ki'ne kayinni kune Yerusaalame rosi'nenni wonshitinoonni. Kunni manchi reyora ninke xa'mammeemmo gede assitinankera hasidhinanni» yiinsa.

²⁹Pheexiroosinna ledosi soqqamaasine kayinni, «Mannaho hajajamantenni Maganoho hajajama hasiissannonke.

³⁰Annuwanke Magani ki'ne haqqu aana suttine shitini Yesuusa reyotenni kayisino.

³¹Maganu Israeelete aagintaabbeenna cubbonsa agurara, Yesuusa Gashshaannanna Gatisaancho asse qiniitesiinni ayirrinyunni ofollanno gede assino.

³²Kunni coyira ninke naqaashshete. Maganu hajajantannosirira uyinohu Qullaawu Ayyaanino naqaashshete» yii.

³³Songote miilla konne coye macciishshite lowo geeshsha hanqite soqqamaasine shitara hasidhu.

³⁴Ikkollana mannu ayirrisannosihunna Seeru rosiisaancho ikkinohu Gemaaliyaali yinannihu mittu Farisootu widihu songote miili kae, soqqamaasine shiimare ka'a shiqqi assinanni gede hajaji.

³⁵Hakkunni gedensaanni songote miillara, «Israeelete manna! Kunni manni aana assitinannire layidhinanni asse.

³⁶Kunni albaanni Tewodaasi, ‹Ani jawaho› yee kaino. Shoole xibbe ikkanno manni isi ledo ma'le kaino. Ikkollana iso shinita miillasi billaallitino; hedonsano ba'ino.

³⁷Hakkunni gedensaanni manna kiirri diro Galiilunnihu Yihudi kae lowo manni ha'runsannosi gede assino. Iso shinita miillasi baala billaallitino.

³⁸Kunnira xa ani kunni manni aaninni ho'litinanni gedenna agurtinanni gede amaaleemmo'ne. Hedonsanna loosinsa mannunniha ikkinoro ba"anno.

³⁹Maganuwiinni dayino coye ikkiro kayinni insa huna didandiitinanni. Hakkiinnino sae, Maganu ledo giwantinanniha ikkanno» yii. Insano amaalesi adhitu.

⁴⁰Hakkunni gedensaanni soqqamaasine insawa woshshite lichetenni gansiisse, layinkita Yesuusi su'minni coyidhannokki gede hajajje agurtunsa.

⁴¹Soqqamaasine kayinni Yesuusi su'mira yite shollinye adha hasiissannonsata egentino daafira, tashshi yaannansa songote albinni fulte hadhu.

⁴²Barru barrunkunni Qullaawa Minenna wole minnara Kiristoosi Yesuusire rosiisanna Dancha Duduwo kula diagurtino.