Read Sidama_Qullaawa _Maxaafa SOQQAMAASINETE LOOSO 6 Bible Online

SOQQAMAASINETE LOOSO 6 - Sidama_Qullaawa _Maxaafa bible

SOQQAMAASINETE LOOSO 6

¹Shiima yanna gedensaanni ammanaanote kiiro ledde ledde batidhuta, Giriikete afiinni coyidhanno Ayihudooti Yihudu gobbara ilantinorira gunguntu. Gunguntinohu, barru barrunkunni beenkanni kaa'lo galte shii'rino meentira iilla hoogginohuraati.

²Kunnira tonaa lamenti soqqamaasine ammanaano baala gamba assite, «Sagale beehate yine Maganu qaale kula agura dihasiissannonke.

³Kunnira roduuwa'ya, Qullaawu Ayyaaninna egenno noonsare lamala manna ki'ne giddonni doorre. Insa kunni loosira worreemmo.

⁴Ninke kayinni huuccattotenna Maganu qaale kulate jaanteemmo» yitu.

⁵Kuni coyi wo'manka hagiirsiiseennansa, Qullaawu Ayyaani wo'minonsare Isxifaanoosi, Filiphoosi, Phirokoroosi, Niqarooni, Ximooni, Pherimeeni, Ayihudootu amma'na widira higinoha Antsookiyunniha Niqolawoosi doortu.

⁶Konne manna doorte soqqamaasinete albaanni uurrissu. Soqqamaasineno huuccatto assite, anga aanaho wortunsa.

⁷Kunni garinni Maganu qaali lede lede hala'lino daafira, Yerusaalamete ammanaanote kiiro lowo geeshsha batidhu. Lowo geeshsha batinyu qeesootino ammana adhitu.

⁸Isxifaanoosira eltonna wolqa wo'miteennasi mannu mereero dhaggenna maalale loosi.

⁹Hatte yannara, wolaphote xaadi mini mannaati yinanniri, Qereenunna Alekisaanderiyu manni, Kiliqiyunna Issiyunni daggannori mitu mitu ka'e Isxifaanoosi ledo yekkeerantu.

¹⁰Isxifaanoosi coyi'ranni noo hayyo uyinosi Ayyaana gibburono iso kayinni ittisa didandiitino.

¹¹Hatte yannara, «Kuni manchi Musenna Magano xonanna macciishshinoommo» yitannore kaphu naqaashshe hirte wortu.

¹²Kunni garinni manna, geerranna Seeru rosiisaano kakkayissu. Isxifaanoosino haadhe abbite songote albira shiqishshu.

¹³Kapho naqqassannoreno haadhe abbitu. Kapho naqqassannorino, «Kuni manchi Qullaawa Minenna Seera xona diaguranno.

¹⁴Qoleno, ‹Naaziretete Yesuusi konne Qullaawa Mine diiganno; Muse uyino Seerano soorranno› yee coyi'ranna macciishshinoommo» yitu.

¹⁵Hatte yannara hakko songote gamba yee noo manni baalu Isxifaanoosi seekke la"anno woyite albisi sokkaasinenniha lawanno.