Read Sidama_Qullaawa _Maxaafa SOQQAMAASINETE LOOSO 7 Bible Online

SOQQAMAASINETE LOOSO 7 - Sidama_Qullaawa _Maxaafa bible

SOQQAMAASINETE LOOSO 7

¹Qeesootu roorrichi Isxifaanoosi, «Kuni yinanni coyi garaho?» yee xa'mi.

²Isxifaanoosino, «Roduuwa'yanna annuwa'ya, hanni macciishshe! Anninke Abirihaami Kaaraani gobba ha'rara albaanni Mesiphexoomiyaho hee'reenna, ayirrinyu Magani leellinosi.

³‹Gobbakkinni fulte, fiixikkiwiinni baxxite, ani leellisheemmohe gobba ha'ri!› yiinosi.

⁴Hatte yannara Keledootu gobba agure mare Kaaraani hee'rino. Annisi reyihu gedensaanni Maganu Kaaraani gobbanni kayise, kune techo ki'ne heedhinanni gobba abbinosi.

⁵Dayi yannara kaxxe uurranno darga nafa diuyinosi. Ikkollana hattenne gobba isiranna sirchisira iqqa asse aara xaarino. Xaarinohu Abirihaami ooso ilikkinniiti.

⁶Sirchisi allaggu gobbara wosi'ne hee'rannotanna hakkiichono shoole xibbe diro borojje ikke, kadame galannota kulinosi.

⁷Maganu qole, ‹Insa borojje asse gashshi'ranno manni aanano yoo yeemmo. Hakkunni gedensaanni borojjimmatenni fulte, hakkiichonni magansidhannoe› yee coyi'rino.

⁸Hakkunni gedensaanni barcimate gondooro uyinosi; kunnira Yisihaaqi ilamihunni settikki barra barcimshiishino. Yisihaaqino beettosi Yaiqoobi barcimshiishino. Yaiqoobino gosate annuwa ikkitinore tonaa lamenta oososi barcimshiishino.

⁹«Yaiqoobi ooso rodoonsa Yooseefi hinaasse Gibitsete gobbara borojjicho ikke hee'ranno gede hirtinosi. Maganu kayinni ledosi no.

¹⁰Qarru baalunkunnino fushshe, Gibitsete moote Feriooni albaanni ayirrinyenna egenno uyinosi. Mooteno Gibitsetenna minisira baalaho hajajaancho assinosi.

¹¹Hatte yannara Gibitsetenna Kana"aani gobba baalate lowo qarra abbitino hude ubbino. Annuwankeno sagale afi'ra didandiitino.

¹²Yaiqoobi Gibitsete gobbara gidu noota macciishshe, umo asse annuwanke hakkiichira soyino.

¹³Layinkimeeshsho Gibitse hadhu yannara Yooseefi roduuwisira isonoo egensiisino. Ayiddesino Ferioonira egensiisino.

¹⁴Hakkunni gedensaanni Yooseefi annasi Yaiqoobinna ayiddesi baala isiwa dagganno gede assino. Kiironsa lamalayina onte mannaati.

¹⁵Yaiqoobino kae Gibitsete gobba ha'rino; isino annuwankeno hakko reyitino.

¹⁶Miqqansa Sekeemi haa'ne ha'ne Abirihaami Hamoori oosowiinni woxunni hidhino waammara madaarroonni.

¹⁷«Maganu Abirihaamira xaare uyino hexxo wo'mitanno yanna gambissuta, Gibitsete hee'rannohunniti manninke kiiro batidhino.

¹⁸Kuni ikkinohu Yooseefi egenninokkihu wolu moote Gibitsete gobbara mooha geeshshaati.

¹⁹Kuni haaru moote manninkera gano gane annuwanke gadadisino. Qaaqquullinsa reyara fushshite gobba huntanno gede annuwanke qarrisino.

²⁰Muse hatte yannara ilamino. Isi Maganu illera xuma qaaqqooti. Sase agana annisi mine lophino.

²¹Gobba fushshine hunni yannara Feriooni beetto affe adhite ilase gede assite lossidhino.

²²Isi Gibitsete gobba egenno baala rose, coyinninna loosunni jawaata ikkino.

²³«Muse shoyilloo diro ikkisita fiixasi Israeele towata hasi'ri.

²⁴Insa giddonni mitto, mittu Gibitsete manchi gawajjannanna tuganna afe, rabbate hakkonne Gibitsicha gane shiino.

²⁵Maganu isi widoonni qole borojjimmatenni fushshannonsata gosasi qaaggannoha lawinosi. Insa kayinni tenne diqaaggino.

²⁶Layinki soodono lamu Israeelooti mimmitu ledo giwantanna afe araarsara hasi're, ‹Ki'ne diroduuwaho, mayira giwantinanni?› yiinsa.

²⁷Roduu ledo giwamanni noohu Muse ka'a qole tuge, ‹Ate ninkera gashshaanchonna yoo yaattoha asse worinohehu ayeti?

²⁸Be'ro Gibitsicha shiitto gede aneno shaattoeraati?› yii.

²⁹Muse konne coye macciishshe, Gibitsete gobbanni xooqe Midiyaami gobba ha're hakko wosinchimma hee'rino. Hakkiicho lame labballi ooso ilino.

³⁰«Muse hatte gobbara shoyilloo diro hee'rihu gedensaanni, Siina Ilaalira nootera halallitte gobbara, buwanni noo citi giddo Maganu sokkaasinchi leellisi.

³¹Muse konne coye lae lowo geeshsha maala'li. Citunniwa shiqqi yee la"anni hee'reenna,

³²‹Ani annuwakki Abirihaami, Yisihaaqi, Yaiqoobi Maganooti› yitanno huuro macciishshi. Lowo geeshsha masino daafira, hakka qole la"a waajji.

³³Mootichu, ‹Uurrootto dargi Qullaawahona lekkakki koatte fushshi.

³⁴Gibitsete gobbara noohunniha manni'ya qarra addinta afoommo; qarrunnita raarensano macciishshoommo. Kunnira gatisammonsara dirroommo. Xa ate Gibitsete gobba soyammoheraatina amo› yii.

³⁵«Israeelete manni Muse, ‹Ate ninke aana gashshaanchonna yoo yaattoha assihehu ayeti?› yite gibbinosi. Maganu kayinni hakko Musenni citi giddo leellisi sokkaasinchi widoonni qole gashshaanchonna wolassannoha asse insawa soyino.

³⁶Gibitsetenna Duumu Baari aana dhaggenna maalale leellishanni Gibitsetenni fushshe shoyilloo diro massaginonsahu isooti.

³⁷‹Maganu ane kayisinte gede roduuwi'ne giddonnino himanaancho soyanno'ne› yee coyi'rino Muse isooti.

³⁸Halalla songe noo manni ledonna Siina Ilaali aana coyi'ri sokkaasinchinna annuwanke ledo noohu isooti. Maganunniha heeshshote qaale ninkera sayisinonkehu Muse isooti.

³⁹«Annuwanke kayinni hajajama gibbinosi; wodaninsanni galagalte Gibitse higgara halchitino.

⁴⁰Aaroonira, ‹Hakku Gibitsetenni fushshinkehu Muse maikkinoro dianfoommona, albankeenni hadhanni massaggannonke maganna seekkinke› yitino.

⁴¹Hatte yannara siitu misile seekkite isera kakkalo shiqishshino. Angansanni seekkidhinorira hagiidhite jila ji'litino.

⁴²Maganu kayinni insawiinni fafino. Gordu beeddahe magansidhanno gede assinonsa. Hakkuno himanaanote maxaafira, ‹Ki'ne Israeelete manna, shoyilloo diro wo'ma, halalla kakkalonna fushshaate, shiqishshinoonnihu aneraatini?

⁴³Haadhine hadhinoonnihu Molooki dukkanaatinna, Rafaani magani beeddakko misileeti. Insa, magansidhinansara yitine, anga'nenni seekkidhinoonni misillaati. Kunni daafira qafadote Baabilooni gobba soyemmo'ne› yiino.

⁴⁴«Annuwankera halalla farci'rote dukkani noonsa. Hakko dukkana Muse Maganu kulinosinna leellishinosi garinni seekkino.

⁴⁵Maganu albinsanni shorre huni daga gobba ragidhu yannara, annuwanke hakkonne dukkana Iyyaasu ledo hakkiichira haadhe massitino. Daawiti yanna geeshshano hakkiicho keeshshino.

⁴⁶Daawitino Maganu albaanni ayirrinye afi're, Yaiqoobi Magani Kaaliiqi galanno mine minara huuccatto assi'rino.

⁴⁷Maganu mine mininohu kayinni Selemooniiti.

⁴⁸«Ayirradu Magani kayinni mannu minino mine digalanno. Hakkuno himanaanchu,

⁴⁹‹Gordu ayirrinyu barcima'yaati; baatto lekka'yanni kaxxoommowaati. Anera mintinannie mini hiittoohoyya? Fooliishshi'reemmo dargino hiittoohoyya?› yaanno Mootichu.

⁵⁰‹Konne baala dianga'ya loossino?› yaanno» yee borreessino gedeeti.

⁵¹Qoleno, «Ki'ne mokkookkootu wodananna macca beebbinoonniri! Ki'ne Annuwa'nente gede Qullaawa Ayyaana gibbinanni.

⁵²Annuwa'ne xiibbinokki himanaano nooni? Insa Qullaawu daannota umo assite kultinore shitino. Ki'neno xa konne Qullaawa sayissine uyitine shitinoonni.

⁵³Ki'ne sokkaasinete widoonni Seera adhitinoonni; ikkollana diagadhitinoonni» yii.

⁵⁴Songote miilla konne coye macciishshite lowo geeshsha hanqite, Isxifaanoosira suume ga'midhu.

⁵⁵Isi kayinni Qullaawu Ayyaani wo'meennasi iima hige lae Maganu ayirrinye lai. Yesuusano Maganoho qiniiteenni uurre nooha afi.

⁵⁶Kunnira, «Kuneeti, gordu fa'nameenna Manchi Beetti Maganu qiniiteenni nooha la"anni noommo» yii.

⁵⁷Hatte yannara insa lowo geeshsha cancitu. Macca cu'midhe mitteenni isiwa higge doddu.

⁵⁸Katamu gobbaanni fushshite kinnatenni awwaaltusi. Naqqassannori uddannansa Saawuli yinanni wedellichi lekka mule wodhitu.

⁵⁹Isxifaanoosi kinnatenni awwaaltanni heedheennasi, «Mooticha'ya Yesuusa, lubbo'ya atewa haa'ri!» yee huucci'ri.

⁶⁰Guluphe lowo qoonqonni raare, «Mooticha'ya, tenne sao kiirtootinsa!» yee kae reyi.