Read Sidama_Qullaawa _Maxaafa SOQQAMAASINETE LOOSO 8 Bible Online

SOQQAMAASINETE LOOSO 8 - Sidama_Qullaawa _Maxaafa bible

SOQQAMAASINETE LOOSO 8

¹Saawuli Isxifaanoosi shaate sumuu yiino. Isxifaanoosi reyi barra, Yerusaalamete noo beetekiristaanera lowo xiiwama iillitu. Soqqamaasine calla agurranna ammanaano baala Yihudunna Samaariyu gobba billaallitu.

²Jawaata ammanaano Isxifaanoosi reeshsha haadhe madaartu. Lowo geeshsha raarte wi'litusi.

³Saawuli kayinni beetekiristaane hunara murci're kaino. Minunni mine sa"anni ammanaano meyaa labbaaha amade usuru minira eessanno.

⁴Billaallitino Ammanaano hadhuwa baala Maganu qaale kultu.

⁵Filiphoosi Samaariyu katama mare mannaho Kiristoosire rosiisi.

⁶Mannu Filiphoosi rosiisinorenna assino maalale baala lae, mittu wodaninni seekke macciishshi.

⁷Busha ayyaannano lowo qaalinni raarte lowo manni giddonni fultu. Lowo laanshaawootinna naafootu hurtu.

⁸Kunnira hakko katamira lowo hagiirre ikki.

⁹Hakko katamira Simiooni yinanni manchi no. Kuni manchi Samaariyu katamira kiilanni manna dheggeeffachishanni hee'ranno. Isonoo jawu manchi gede asse hedanno.

¹⁰Jawa shiima yinikkinni mannu baalu, «Konne mancho rooreho yinoonnihu Maganu wolqa noosi daafiraati» yaanni seekke macciishshannosi.

¹¹Seekke macciishshannosihu lowo yannanni kayise kiilanno woyite maala'litanno gede assinonsahuraati.

¹²Ikkollana Filiphoosi Maganu gashshootirenna Yesuusi Kiristoosi su'minni kulinoha Dancha Duduwo macciishshe meyaa labbaahu ammane cuuami.

¹³Simiooni nafa gatikkinni amma'ne, cuuame Filiphoosi ledo hee'ranni, leellinshanni malaatenna jajjabba maalale lae dhaggeeffati.

¹⁴Yerusaalamete heedhanno soqqamaasine Samaariyu gobba manni Maganu qaale adhinota macciishshite, Pheexiroosinna Yohaannisi hakkiira sokku.

¹⁵Pheexiroosinna Yohaannisi hakkiichira iillite Samaariyu manni Qullaawa Ayyaana adhanno gede huuccatto assitunsa.

¹⁶Samaariyu manni Mootichu Yesuusi su'minni cuuantinota ikkinnina Qullaawu Ayyaani mittu aana nafa didirrino.

¹⁷Kunnira Pheexiroosinna Yohaannisi anga aanaho wortunsata Qullaawu Ayyaani dirrinsa.

¹⁸Soqqamaasine anga aanaho worteenna mannu Qullaawa Ayyaana afi'rita lae Simiooni woxe abbe,

¹⁹«Anino anga aanaho woreemmo manni Qullaawa Ayyaana adhanno gede roorre uuyye"e!» yii.

²⁰Pheexiroosi kayinni, «Maganu elto woxunni afi'rate hedoottohura woxikki ate ledo bao!

²¹Wodanikki Maganu albaanni suwashsho ikkinokki daafira, ati tenne kaayyo beeqqaasincho ikka didandaatto.

²²Tenne bunshekkira gaabbite aagintaawi; miteekke wodanikki bunshe agurannoheha ikkannona Magano huucci'ri.

²³Ati bushu hinaasinna cubbu usuri giddo wo'minoheha ikkoottota afoommo» yiisi.

²⁴Simioonino, «Xa coyi'ritto coyi giddonni mittuno iillannoekki gede Magano ki'nenni huucce"e» yii.

²⁵Pheexiroosinna Yohaannisi farcidhuhunna Mootichu qaale kultuhu gedensaanni, Samaariyu qachi baalaho Dancha Duduwo kultanni Yerusaalame higgu.

²⁶Maganu sokkaasinchi Filiphoosi, «Yerusaalametenni kae Gaaza massitanno doogo amade Wodiidira hige ha'ri» yii. Hatti doogo halallittete.

²⁷Isino kae ha'ri. Hatte yannara Itiyophiyunnihu mittu mureessu manchi Magano magansi'rara Yerusaalame ha'rino. Isi Itiyophiyu mootitte Hindeke yinannitera muli amaalaanchootinna woxese baalaho hajajaanchoho.

²⁸Isi gobbasi higanni hee're faradi gaarete aana ofolle himanaanchu Isayaasi maxaafa nabbawanni no.

²⁹Hatte yannara Qullaawu Ayyaani Filiphoosi, «Marte hattenne faradi gaare mule uurri» yiisi.

³⁰Filiphoosino faradi gaarenniwa rahe mare, Itiyophiyu manchi himanaanchu Isayaasi maxaafa nabbawanna macciishshe, «Nabbawattoha buuxootto?» yii.

³¹Manchuno, «Kulannoehu nookkiha maminni buuxeemmo?» yii. Filiphoosi, «Faradi gaare'ya aanira giddite ane ledo ofolli» yiisi.

³²Nabbawanni noo maxaafi gafi, «Isi gorrinara haa'ne ha'nanni ge'rechi gede, orda hanxanna sammi yaanno wilii'lichi gede, afoo fa'nannokkiha sammi yiino.

³³Iso qarrinse halaale beeshshine, lubbosi baattote aaninni haa'ne hoolloonnita, ilamasi giddonni coyi'rannohu nooni?» yaannoho.

³⁴Manchu Filiphoosira, «Himanaanchu konne coye aye daafira coyi'rino? Umisireetinso wolunnireeti? Hanni ballo kulie» yii.

³⁵Filiphoosino Qullaawu Maxaafihu hakko gafinni kayise, Yesuusiha Dancha Duduwo kulisi.

³⁶Hadhanni heedhe doogote wayi noowa iillitu. Manchino, «Kuneeti kawiicho wayi no; cuuama hoolannoeri nooni?» yii.

³⁷Filiphoosi, «Wo'mu wodanikkinni amma'nittoro cuuama dandaatto» yiisi. Isino, «Yesuusi Kiristoosi Maganu Beetto ikkinota ammanoommo» yii.

³⁸Manchuno faradi gaare uurritanno gede hajaji. Lamunku wayi eelira dirriteenna Filiphoosi cuuisi.

³⁹Wayi giddonni fultuhu gedensaanni Maganu Ayyaani Filiphoosi wolewa haa're ha'risi. Manchu layinkita iso diafino; ikkollana tashshi yaannasi doogosi ha'ri.

⁴⁰Filiphoosi kayinni ha're Azoxoosi leelli. Qiisaariya daa geeshsha katamma baalate ha'ranni Dancha Duduwo kuli.