Read Sidama_Qullaawa _Maxaafa SOQQAMAASINETE LOOSO 9 Bible Online

SOQQAMAASINETE LOOSO 9 - Sidama_Qullaawa _Maxaafa bible

SOQQAMAASINETE LOOSO 9

¹Hatte yannara Saawuli Mootichu rosaano shaara adawadhanni qeesootu qariwa ha'ri.

²Mootichu doogo hadhannore meyaa labbaaha amade usure Yerusaalame abbara, borro borreesse Demaasiqote noohura xaadu minira aannosi gede qeesootu roorricha xa'mi'ri.

³Ha'ranni Demaasiqo iillara rahe hee'reenna doogote aana hedeweelcho gordunni bilicci yaanno xawaabbi gaangaawasi doyissi.

⁴Hatte yannara uulla uwe hee're, «Saawuli, Saawuli, mayira xiiwattoe?» yitanno huuro macciishshi.

⁵Saawulino, «Mooticha'ya, ati ayeti?» yii. Isino, «Xiiwattoehu ani Yesuusaati.[1]

⁶Xa ka'e katama ha'ri; assattore hakko kullannihena» yiisi.

⁷Saawuli ledo ha'ranni noo manni yaannore hawe sammi yee uurre no; insa huuro macciishshitinota ikkinnina coyi'rannoha diaffino.

⁸Saawulino uwinowiinni kai; la"ara hedanno woyite illesi mittoreno diaffanno. Kunnira mannu anga amade massage Demaasiqo haa're ha'risi.

⁹Sase barra wo'ma mittoreno laikkinni, waa waasa yiikkinni keeshshi.

¹⁰Hatte yannara Demaasiqote Hanaaniya yinannihu mittu rosaanchi no. Mootichu iso ajuujatenni, «Hanaaniya!» yee woshshisi. Isino, «Mooticha'ya kune noommo» yii.

¹¹Mootichu qole, «Suwashsho yinanni doogo higge ha'ri. Hakkiicho Yihuda yinanni manchi mine Saawuli yinanniha Xersesi mancho xa'misiisi; isi xa huuccatto assi'ranni no» yiisi.

¹²Saawulino illesi fa'nitanno gede Hanaaniya daye anga aanaho worannasi ajuujatenni afi.

¹³Hanaaniya kayinni, «Mooticha'ya! Hakku manchi Yerusaalamete heedhanno ammanano aana lowoha busha qarra iillishinota lowo manniwiinni macciishshoommo.

¹⁴Kawiichono ate su'ma woshshitannore baala usurara qeesootu roorrootiwiinni roorre adhino» yii.

¹⁵Mootichuno Hanaaniyara, «Isi su'ma'ya dagate, moottoollatenna Israeelete mannira egensiisanno gede doodhoommo uduunnichootinna isiwa ha'ri.

¹⁶Isi ane daafira yee lowo qarra adhannota egensiiseemmosi» yii.

¹⁷Kunnira Hanaaniya hakkiichira mare isi noo minira ei. Angasino Saawuli aana wore, «Rodoo'ya Saawuli! Kawa dagganni heedheenna doogote aana leellihe Mootichi Yesuusi, galagalte la"a dandaatto gedenna Qullaawu Ayyaani wo'mannohe gede ane atewa soyinoe» yii.

¹⁸Hakkawoyintenni omolcho lawannorichi illesi aaninni uweenna ille fa'niteenna la"a dandii; gotti yee kae uurri.

¹⁹Sagaleno ite dhaabbati. Shiima barra Demaasiqote heedhanno rosaanowa taxxi yii.

²⁰Keeshshikkinni Saawuli Demaasiqote, «Yesuusi Maganu Beettooti» yaanni xaadu mine rosiisi.

²¹Macciishshituri baalu, «Kuni manchi Yerusaalamete konne su'ma woshshannoha baala qarrisannoha di"ikkino? Kawiira dayinohuno insa amade usure qeesootu roorrootiwa massara di"ikkino?» yitanni dhagge assidhu.

²²Saawulino lowo geeshsha jawaati; Yesuusi Buuramino Moote ikkinota kulanni, Demaasiqote heedhanno Ayihude haadhe coyidhannore hoogganno gede assi.

²³Lowo barri gedensaanni Ayihudootu Saawuli shitara ma'litu.

²⁴Isi kayinni gantino gano afi'ri. Insano iso shitara hashshanna barra faro baalate agarte no.

²⁵Umisi rosaano kayinni Saawuli hashsha gimboolaho worte kinchu huxxi xullo giddoonni qolte dirrissu.

²⁶Saawuli Yerusaalame mari woyite, wole rosaano ledo mitteenni hee'rara hasi'ri. Insa kayinni Kiristoosa amma'ninoti halaale lawa hooggeennansa baalunku waajjitu.

²⁷Barnabaasi kayinni Saawuli soqqamaasinenniwa abbe doogote aana Mootichu leellinosinna hasaawisinosi gara Demaasiqoteno Yesuusi su'mini jawaate rosiisinota kulinsa.

²⁸Kunnira Saawuli insa ledo Yerusaalamete ha'rami. Mootichu su'minni jawaate rosiisi.

²⁹Giriikete afiinni coyidhanno Ayihudooti ledo coyi'ramanni yekkeerami. Insa kayinni shitasira ma'litino.

³⁰Roduuwu konne coye macciishshite, iso Qiisaariya haadhe hadhu. Hakkiinnino Xersesi ha'ranno gede assitu.

³¹Yihudaho, Galiilahonna Samaariyaho noo beetekiristaane keere afidhe hagiidhitu. Magano waajjatenninna Qullaawu Ayyaaninni jawaatte hala'litu.

³²Pheexiroosi gobba baala tuqanni Liida heedhanno ammanaanowa mari.

³³Hakkiicho sette diro wo'ma daallasaho goxe hee'rannoha Eniya yinanniha laanshaawa mancho afi.

³⁴Pheexiroosi, «Eniya! Yesuusi Kiristoosi hursannohe; gotti yite daallasakki biddi assi'ri!» yiisi. Isino hakkawoyintenni kai.

³⁵Liidanna Sarooni hee'ranno manni baalu iso lae Magano ammani.

³⁶Iyophe Xabita yinanniti mitte ammanaancho no. Su'mise tiro Giriikete afiinni Dorqaati; hatto yaano bulaate yaate. Ise wo'manka woyite dancha looso loossanni buxane kaa'litanno.

³⁷Hatte yannara ise dhiwante reyitu. Reeshshase hayishshine minu aana minnoonni mini iima fushshine worroonni.

³⁸Liida Iyophera mule noo daafira Iyophe heedhanno rosaano Pheexiroosi Liida noota macciishshite, «Eeggate keeshshittokkinni rakke amonke!» yite lame manna fushshite sokku.

³⁹Pheexiroosino kae soqqame dayino manni ledo ha'ri. Hakkiira iilli yannara minu aana minnoonni mini iimira fushshitusi. Galte shii'rino meenti baalu reeshsha doyisse wi'lanni, Dorqa lubbotenni noo yannara uddidhanno uddanna leellishanni no.

⁴⁰Pheexiroosi kayinni baalanka gobbara fushshe guluphe huuccatto assi'ri. Reeshshu widira wirri yee lae, «Xabita! gotti yii!» yii. Iseno ille fa'niteennase Pheexiroosi la'u. Gotti yiteno ofoltu.

⁴¹Pheexiroosino angasinni amade gotti asse uurrisise. Galte shii'rino meentonna wole ammanaano woshshe lubbotenni noo beetto albansaanni uurrisi.

⁴²Kuni coyi Iyophe baala tuqi; lowo mannino Mooticha amma'ni.

⁴³Pheexiroosi, mittu goga duuganno manchi Simiooni ledo Iyophe lowo barra keeshshi.