Read Sidama_Qullaawa _Maxaafa ROOMU SOKKA 1 Bible Online

ROOMU SOKKA 1 - Sidama_Qullaawa _Maxaafa bible

ROOMU SOKKA 1

¹Tini sokka, Maganunniha Dancha Duduwo kulate bandoonnihu Soqqamaasincho ikkara woshshaminohu Kiristoosi Yesuusi borojjichi Phaawuloosi soyinote.

²Kuni Danchu Duduwi, Maganu himanaanosi widoonni qole Qullaawa Borro giddo balaxe uyino hexxooti.

³Kuni Danchu Duduwi Maganu Beetti mannimmate danisinni, Daawiti sirchinni ilaminota kulanno.

⁴Mootichinke Yesuusi Kiristoosi, qullaawa ikkasi ayyaaninni reyotenni ka"asinni, Maganu Beetto ikkasi wolqatenni leeltino.

⁵Kiristoosi widoonninna isi su'mi daafira, manna daga baalate giddonni amma'nate hajajama widira qoleemmo gede, Maganu soqqamaasinchimmate elto uyinoe.

⁶Ki'neno Yesuusi Kiristoosire ikkitinanni gede, dagate giddonni Maganu woshshino'ne.

⁷Tini sokka, Phaawuloosi Maganu baxino'neriranna qullaawoota ikkitinara woshshantinoonnirira Roomaho heedhinannirira baalaho soyinote: Maganu Anninkenna Mootichu Yesuusi Kiristoosiwiinni eltonna keeru iillo'ne!

⁸Amma'na'ne duduwi gobba baalate duduwaminohura, ki'ne baalunku daafira, Yesuusi Kiristoosinni Magano'ya galaxxeemmosi.

⁹Wo'manka woyite huuccatto'yanni qaageemmo'netera, Beettisiha Dancha Duduwo kulanni wo'mu wodani'yanni soqqameemmosi Magani naqaashshe'yaati.

¹⁰Maganu yiiro, ki'newa daate doogo fanannoe gede, wo'manka woyite huucci'ranni noommo.

¹¹Amma'natenni kaajjishanno'neha ayyaanaamo afansha beehammo'nera hasi'roommo daafira la"ammo'nera quqquxamoommo.

¹²Hatto yaa'yano ani ki'ne ammananni, ki'neno ane amma'nanni mimmitonke jawaachinsheemmo gedeeti.

¹³Roduuwa'ya, wole daga rosiise giddonsanni lowo ammanaasine afi'roommo. Ki'ne mereerinnino ammanaano afi'rate hasi'roommo. Ikkollana, ki'newa daate batinye hige hedeenna injaa hoogeennae gatoommota affinara hasi'reemmo.

¹⁴Qajeeltinorenna qajeeltinokkire, egenno afidhinorenna afidhinokkire rosiisate asalu nooe.

¹⁵Kunnira, ki'ne Roomaho heedhinannirirano Dancha Duduwo kulate quqquxamoommo.

¹⁶Danchu Duduwi amma'nitinore baala balaxe Ayihude, aancheno daga gatisate Maganu wolqaati. Kunnira, ani Danchu Duduwinni disaalfateemmo.

¹⁷«Keeraanchu amma'natenni heeshsho afi'ranno» yine borreessinoonninte gede, Danchu Duduwi Maganu manna uminni kayise goofimarchu geeshsha amma'natenni keereensannota kulanno.

¹⁸Bunshensanni halaalu leellannokki gede assanno mannira, cubbinsanna bunshensanni kainohunni Maganu hanqi gordunni dirranno.

¹⁹Hatto ikkannohuno, Magano afate hasiisannonsa geeshshire Maganu xawise kulinonsa daafiraati.

²⁰Alame kalaqantuhunni kayise mannaho leellannokkihu Maganu dani, hegere wolqasinna Maganimmasi, isi kalaqino kalaqami aana xabbe leeltanno. Kunnira, affanni heedhe assitanno bunshera ku'lite gattannori dinonsa.

²¹Insa Magano affe heedhenni, Maganimmasira malino ayirrinyenna galata diuyitinosi. Hedonsa haafa ikkite gattu; jallaagu wodaninsano tunsi.

²²«Ninke egennaammaho» yitanni heedhenni gowwoota ikkitu.

²³Hegere Magano ayirrisa agurte, mannu, ceatenni, saadatenninna godowunni ha'ranno kalaqami suudinni seekkinoonni misillara ba'annotera ayirrinye uyitu.

²⁴Kunnira insa insanaawa manninatinsa aana saalsiisanno coye assitara, Maganu battaabbino hamaande giddo heedhanno gede facci asse agurinsa.

²⁵Hatto assinohu, Maganu halaale kaphunni soorritinohura, kalaqinoha agurte kalaqamaho kumbuultinohuranna soqqantino daafiraati. Maganu kayinni hegere geeshsha galataminoho! Hamii'ni.

²⁶Konne coye assitinohura, Maganu saalsiissanno yorto giddo facci asse agurinsa. Meentinsa nafa siimu xaadooshshira rosamino gara agure ronsoonnikki gara ikkanno.

²⁷Labballuno rosaminoha labbaahunna meyate xaado agure, insa insanaawa siimu xaadooshshe assate yortonni giirantu. Kunnira labballu labballu ledo saalsiisanno coye assitu; assitino so'rorano bisinsara malino qoricha adhitanno.

²⁸Mannu Magano afate hasi'rinokki daafira, saalsiisanno coye assanno gede, tidhitinokki hedo giddo facci asse agurinsa.

²⁹Giddonsa beebba, bunshe, hafuurre, xagarro, dhiibbe, manna shaa, gibbo, awaawura, woleho busha mala, heme,

³⁰mannu su'ma huna, Magano giwa, xono, boo'na, naaxxa, bunshe hasa, annahonna amate hajajama giwa,

³¹mayinae hooga, wodho diiga, baxama giwanna mararro hooga wo'mitino.

³²Togoore assitannorira baalaho reyo maltinonsata kulannoha Maganu Seera affanni heedhenni, konne coye assitanno. Konne coye assitanni nooreno jawaachishshanno.