Read Sidama_Qullaawa _Maxaafa ROOMU SOKKA 10 Bible Online

ROOMU SOKKA 10 - Sidama_Qullaawa _Maxaafa bible

ROOMU SOKKA 10

¹Roduuwa'ya! Wodani'yara nooti lowo halchonna Maganoho shiqishi'reemmo huuccatto manni'ya Israeele gattanno gedeeti.

²Halaalu egennota ikka hoogginota ikkinnina, insara Maganu laala noonsata aninni farci'reemmo.

³Maganu keereensanno doogo afa hoogansara, uminsanni keeraanchimma hasidhanni, Maganu keeraanchimma hoode dihadhino.

⁴Mannu baalu amma'natenni keeraa'manno gede Kiristoosi Seeraho gawalote.

⁵Seera agadhatenni afi'nanni keeraanchimma daafira Muse borreessinohu, «Seera agadhannohu lubbotenni hee'ranno» yaanno.

⁶Maganu manna amma'natenni keereensannota kulate, «Wodanikkinni, ‹Gordu iimira ayi fulanno?› yitooti!» yinoonni. (Hatto yaa Kiristoosa gordunni dirrisate gedeeti).

⁷Woy, «Wodanikkinni, ‹Jeennaate ayi dirranno?› yitooti!» yinoonni. (Hatto yaano Kiristoosa reyotenni kayisate gedeeti).

⁸Ikkollana, amma'natenni keeraa'mitinori daafira, «Ninke lallambeemmohu amma'nate qaali mulekki no; isinni afiikkiranna wodanikkira no» yinoonni.

⁹Yesuusi Mooticha ikkinota, afiikkinni farci'rittoronna Maganu reyotenni kayisinosita wodanikkinni ammanittoro gatatto.

¹⁰Mannu wodanisinni ammane keeraa'manno; afiisinni farci're gatanno.

¹¹Qullaawu Maxaafira, «Iso hexxannohu baalu disaalfatanno» yine borreessinoonni.

¹²Mittu Mootichi wo'munkuha ikkino daafira, Ayihudetenna dagate mereero badooshshu dino. Isi huuccidhannorira baalaho atootesi batise aanno.

¹³Qullaawu Maxaafira, «Kaaliiqi su'ma woshshannohu baalu gatanno» yine borreessinoonni.

¹⁴Maahoyyena, amma'nitukkinni hiitto assite woshshitasira dandiitanno? Isire macciishshitukkinni hiitto assite amma'nitanno? Kulannohu nookkiha hiitto assite macciishshitanno?

¹⁵Dancha Duduwo kultannori sonkikkinni hiitto assite kula dandiitanno? Qullaawu Maxaafira, «Dancha duduwo massitannori lekka hiitto biiffinote!» yine borreessinoonni.

¹⁶Ikkollana Isayaasi, «Mooticha'ya, coyi'noommo qaale ayi ammanino?» yee coyi'rinonte gede, baalunku Dancha Duduwo diadhitino.

¹⁷Amma'na macciishshatenni dagganno; macciishshinannihuno Kiristoosi qaaleeti.

¹⁸Ani mitto coye xa'meemmona, insa dimacciishshitino? Macciishshitinowe! «Qoonqonsa gobba baalate leeltu; sokkansa gobbate qacce geeshsha iillitu» yinoonni.

¹⁹Qoleno, «Israeelete manni qaale diafino» yaateni? Hatto yinannikki gede Muse umo asse, «Manna'ya ikkitinokki daganni hinaasiise gaabbiseemmo'ne; wodanchitannokki daganni hanqiseemmo'ne» yiino.

²⁰Isayaasino, «Ane hasidhinokkirira leelloommo; ‹Maganu hiikko no?› yitinokkirira anenee xawisoommo» yaanni be'e yiikkinni coyi'rino.

²¹Israeelete daafira coyi'ranni, «Hajajantannokkirenna haxawarra gosa barra wo'ma anga'ya fane agaroommo» yaanno.