Read Sidama_Qullaawa _Maxaafa ROOMU SOKKA 14 Bible Online

ROOMU SOKKA 14 - Sidama_Qullaawa _Maxaafa bible

ROOMU SOKKA 14

¹Ammana shaqqinoha ki'newa haadhesi ikkinnina hedosira yoo yitinoonte.

²Mitu wo'mankare ita dandaannota ammananno. Ammana kaajjinokkihu kayinni gati laalcho calla itanno.

³Wo'mankare itannohu itannokkiha mishoonke; wo'mankare itannoha Maganu haa'rinosi daafira, itannokkihu itannoha bushiishoonkesi.

⁴Wole soqqamaancho bushiishattohu ati ayeti? Isi uurrirono uwirono Mootichisi hajaati. Mootichu uurrisasira dandaanno daafira uurranno.

⁵Mitu, mitu barri wolu barrinni roore ayirrado ikkino gede asse hedanno. Wolu qole, baalunku barri taalo ikkino gede asse hedanno. Mittu mittunku, hakko garinni mayira hedinoro seekke afa hasiissannosi.

⁶Mitto barra wolu barrinni roorse ayirrisannohu hee'riro, Mootichu ayirrinyira yeeti. Wo'mankare itannohuno Mootichu ayirrinyira yee itanno. Itanno sagale daafirano Magano galatanno. Wo'mankare itannokkihuno Maganu ayirrinyira yee aguranno. Isino Magano galatanno.

⁷Ninke giddonni ayino umisira calla hee'rannohu dino; umisira calla reyannohuno dino.

⁸Lubbotenni hee'nummoro Mootichaho hee'neemmo; reyinummorono Mootichaho reyineemmo. Kunnira, hee'nummorono reyinummorono Mootichunnireeti.

⁹Konne ikkinohura, Kiristoosi reyotenni kainohu, nooriranna reyitinorira Mooticha ikkaraati.

¹⁰Ati rodookki mayira bushiishatto? Woy mayira mishatto? Mitto barra ninke wo'munku Maganu yoo barcimi albaanni uurrineemmo.

¹¹Hakkuno, «Maganu, ‹Halaali'ya afanna, mannu baalu guluchisinni ane albaanni guluphanno; arrawu baalu ani Magano ikkoommota farci'ranno› yaanno» yine borreessinoonni garinniiti.

¹²Kunnira, mittu mittunku loosinke garinni Maganu albaanni shinqe xa'mammeemmo.

¹³Mimmitonke bushiisha agurro! Hatto assa agurre, ledo ammanaasinchi gufi're cubboho uwannokki gede qorophino.

¹⁴Mootichu Yesuusinni hee'ra'yanni, batte ikkinori nookkita seekke egennoommo. Ikkollana, mittu manchi mittoricho batte ikkino gede asse hediro, hakku isira battete.

¹⁵Sagaletenni kainohunni rodookki dadillisattoha ikkiro, baxillu noohekkita leellishatto. Kiristoosi reyinosi mancho intanni sagalenni kainohunni ba"anno gede assitooti.

¹⁶Giddo'ne danchaho yitine heddinoonni coyi mishamanno gede assitinoonte.

¹⁷Maganu Gashshooti, Qullaawu Ayyaani aanno keeraanchimmaati, keereetinna hagiirreeti ikkinnina, itunna agu haja di"ikkino.

¹⁸Kunni garinni Kiristoosira soqqamanno manchi, Magano hagiirsiisannohonna mannuno galatannosiho.

¹⁹Mannu ledo keere hee'nanni garanna mimmito dhaambanni doogo ha'rate diinaggaambo.

²⁰Sagaletenni kainohunni Maganu loosi diigamoonke. Wo'munkuri lago diafi'rinoho. Wole manna cubboho eessitanno sagale ita kayinni so'rote.

²¹Ledo ammanaasine gufisannoha ikkiro, maala ita woy woyinete xajje aga, woy wole coye assano agura woyyate.

²²Kunnira, kunni coyi daafira noohe amma'na atenna Maganu mereero heedho. Ammanino coye assanna wodanisi huluullamannokki manchi ba'raa'rinoho.

²³Huluullamanni itanno manchi kayinni amma'natenni ikkinokki daafira, yoo yinoonniho. Amma'natenni ikkinokki coyi baalu cubboho.