Read Sidama_Qullaawa _Maxaafa ROOMU SOKKA 15 Bible Online

ROOMU SOKKA 15 - Sidama_Qullaawa _Maxaafa bible

ROOMU SOKKA 15

¹Ninke amma'natenni jawaantoommori, shaqqaddu daafuro duqqa hasiissannonke ikkinnina umonke hagiirsiinsoonke.

²Mitti mittinke, ledo ammanaasine amma'natenni dhaawate danchanna hagiirsiisannonsa coye assino.

³Kiristoosi isonoo dihagiirsiisino. Kuni ikkinohu, «Xontannoheri xonono, aana'ya ubbino» yine borreessinoonni gedeeti.

⁴Umo assine Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afi'neemmo cincanna jawaante hexxo uyitannonke.

⁵Kiristoosi Yesuusi hoode hadhinanna, cincanna jawaante aanno Magani mittimmate ayyaana oo'ne.

⁶Kunni garinni, Mootichu Yesuusi Kiristoosi Anni Maganu mittu wodaninninna mittu afiinni ayirrissinannisire asso'ne.

⁷Kiristoosi ki'ne Maganu ayirrinyira yee haa'ri'nente gede, ki'neno mimmito'ne haadhe.

⁸Hatto yaa'ya, akaakkate uyinoonni hexxo wo'mitanno gedenna Maganu ammanaminoha ikkinota leellishate Kiristoosi Ayihudete soqqamaancho ikkino yaate.

⁹Kiristoosi Ayihudete soqqamaancho ikkinohu wolu kaimi, daga maarosi daafira Magano galattanno gedeeti. Kunino: «Dagate mereero galateemmohe; su'makkino faarsotenni guwiseemmo» yine borreessinoonni garinniiti.

¹⁰Qoleno, «Ki'ne Daga, mannisi ledo hagiidhe!» yine borreessinoonni.

¹¹Lendeno, «Daga baala Kaaliiqa galattesi; gosa baala iso galattesi!» yine borreessinoonni.

¹²Isayaasino, «Isseyi sirchinni ilamannohu daanno; dagate sooreessa ikkara ka"anno; insano iso hexxitanno» yaanno.

¹³Hexxo'ne Qullaawu Ayyaani wolqanni lophitanno gede, hexxo aanno Magani amma'nitinoonnisi daafira hagiirrenna keere wonsho'ne.

¹⁴Roduuwa'ya, giddo'ne danchumma wo'miteenna, egennotennino duroo'mitine mimmito'ne seejja dandiitinannire ikkitinoonnita ani umi'ya buuxoommo.

¹⁵Mito mito coye qaagiissammo'nera hasi're, Maganu uyinoe eltonni kainohunni tenne sokka waajjummokkinni borreessoommo'ne.

¹⁶Maganu tenne elto uyinoehu Dancha Duduwo Dagate kulanni, qeesichu gede ikke Yesuusi Kiristoosira soqqamammoraati. Kunnira, Daga Qullaawu Ayyaaninni qullaawoota ikkite Magano hagiirsiissanno kakkalo ikkitanno gede assateeti.

¹⁷Kiristoosi Yesuusiha ikkoommo daafira, Maganoho soqqama dandaa'yara naaxxeemmo.

¹⁸Daga Maganoho hajajantanno gede assate Kiristoosi coyi'roommo qaalinninna assoommo coyi widoonni loosinore agurranna wolere coyi'ra dihasi'reemmo.

¹⁹Hakku coyi ikkinohu, Qullaawu Ayyaani wolqanni addi addi maalalenninna malaattanniiti. Kunnira, Yerusaalametenni kayise Iliwariqooni[5] geeshsha Kiristoosiha Dancha Duduwo gudise duduwoommo.

²⁰Wolu safinohu aana looseemmokki gede, wo'ma woyite Kiristoosire macciishshitinokki gobbara Dancha Duduwo kula halcheemmo.

²¹Kuni ikkannohu, «Isire kulloonninsakkiri affanno; macciishshitinokkirino wodanchitanno» yinoonni gedeeti.

²²Xaa geeshsha ki'newa daa hoogoommohu, tenne soqqansho daafira yeeti.

²³Xa kayinni kawiicho noo looso gudeemmona, lowo diro ki'newano daate halchanni keeshshoommo daafira,

²⁴Isipeene ha'reemmo woyite ki'ne widoonni daammora hedoommo. Shiima yanna ki'ne ledo keeshshe hedoommowa ha'reemmo woyite kaa'litinaera hasi'reemmo.

²⁵Xa kayinni hakko nooha Maganu manna towatate Yerusaalame ha'reemmo.

²⁶Hakka ha'reemmohu, Meqedooniyunna Akkayu ammanaano Yerusaalamete ammanaano giddo noo buxanera baxxe woxe soyate maltinohuraati.

²⁷Kaa'lo baxxe uyitino; aano hasiissannonsate. Daga Ayihudenniha ayyaanaamo atoote beeqqitino daafira, insarano Ayihudete maalu atoote beehate asali noonsa.

²⁸Gamba assinoonninsata wo'ma kaa'lo haa're Yerusaalame iillishummohu gedensaanni, Isipeene ha'ranni ki'ne lae saeemmo.

²⁹Ki'newa dayemmo woyite Kiristoosita wo'ma maasso haa're dayemmo'neta afoommo.

³⁰Roduuwa'ya, anera seekkitine Magano huuccatenni hale ikkitinannie gede, Mootichinke Yesuusi Kiristoosinninna Qullaawu Ayyaani baxillinni huucci'reemmo'ne.

³¹Huuccitinanniehuno Yihudaho noohu amma'ninokki manni anganni gateemmo gedenna soqqansho'ya Yerusaalamete heedhanno ammanaasine hagiirsiissanno gedeeti.

³²Maganu yiiro, ki'newa hagiirrunni daye ledo'ne fooliishshi'rammora hasi'reemmo.

³³Keere aanno Magani ki'ne wo'munku ledo hee'ro! Hamii'ni.