Read Sidama_Qullaawa _Maxaafa ROOMU SOKKA 16 Bible Online

ROOMU SOKKA 16 - Sidama_Qullaawa _Maxaafa bible

ROOMU SOKKA 16

¹Kinikiriyu Katami beetekiristaanera ammanamatenni soqqantannota rodoonke Febeni egensiiseemmo'ne.

²Ise anenna wole lowo manna kaa'litannota ikkitinohura, Maganu manni garinni Mootichu su'minni wosinchimma haadhine hasiisannosere baala kaa'litinannise gede eegameemmo'ne.

³Kiristoosi Yesuusi soqqanshora kaa'litinoerira Phirisiqilaranna Aqiilira keere iillishshe"e.

⁴Insa ane daafira yite reyote nafa qixxaabbinoreeti. Kunnira, lowo geeshsha galateemmonsa. Ane calla ikkummokkinni Dagate giddonni higge amma'nitino beetekiristaanna baala galattannonsa.

⁵Minensa xaaddanno beetekiristaanera keere iillishshe"e. Issiyu gobbara Kiristoosa balaxe amma'ninohura baxeemmo manchira Aphenetusira keere iillishshe"e.

⁶Ki'ne daafira lowo geeshsha daafurtinotera Maariyaamira keere iillishshe"e.

⁷Ane ledo usurantinorira ane gedee Ayihudera Andironiqoosiranna Yoniyaasira keere iillishshe"e. Insa Kiristoosa ane balaxxe amma'nitino. Soqqamaasinenniwano lowo geeshsha egennantinoreeti.

⁸Mootichunni baxeemmohura Pheliyatusira keere iillishshe"e.

⁹Kiristoosi loosira kaa'lo ikkinonkehura Urbaanoosiranna baxeemmohura Isixakusira keere iillishshe"e.

¹⁰Fonqolame fulasinni Kiristoosiha ikkasi egensiisinohura Apheliisira keere iillishshe"e. Arisixobuloosi mini mannira keere iillishshe"e.

¹¹Ane gedee Ayihudichira Heroodiyoonira keere iillishshe"e. Mooticha amma'nitinorira Narisiisi mini mannira keere iillishshe"e.

¹²Mootichu soqqanshora daafurtinorira Tirufaanaranna Tirufoosara keere iillishshe"e. Mootichu soqqanshora lowo geeshsha daafurtinotera Mootichunni lowo geeshsha baxeemmotera Phersiidara keere iillishshe"e.

¹³Mootichu soqqanshora egennaminohura Rufoosira keere iillishshe"e. Isirano anerano amate gede ikkitannoetera amasirano keere iillishshe"e.

¹⁴Asinqiritoosira, Filegoonira, Hermeesira, Patirobaasira, Hermaasiranna insa ledo noo ammanaanora keere iillishshe"e.

¹⁵Filologoosira, Yuuliyara, Neriyaranna rodoosira, Olumbaasiranna ledonsa noo ammanaasine baalate keere iillishshe"e.

¹⁶Rodiimmate baxillinni sunqantinanni mimmito'ne keere haadhe. Kiristoosi beetekiristaane baala keere sokkino'ne.

¹⁷Roduuwa'ya, afidhinoonni rosiwiinni baxxinoha gurcho coye doogo'nera worte mereero'ne babbadama kalaqqannore agadhe. Insawiinni xooqqe.

¹⁸Hattoo manni kokkensara calla ikkinnina Mootichinke Kiristoosira soqqamannoha di"ikkino. Owaatunna awishshu qaalinni beebbaataamo manna dogganno.

¹⁹Danchu Duduwira hajajama'ne manna baalaho leeltinohura lowo geeshsha hagiidhoommo. Ikkollana danchu coyira busuloota bushu coyira dussoota ikke.

²⁰Keere aanno Magani Sheexaane rahe lekka'nera woroonni cancananno. Mootichinke Yesuusi elto ki'ne ledo heedho.

²¹Ledo'ya soqqamannohu Ximootewoosi, keere dhaamino'ne. Ane gedee Ayihudichi Luqiyoosi, Iyasooninna Sosiphaxiroosi keere dhaantino'ne.

²²Tenne sokka borreessoommohu ani Xerxiyoosino Mootichu su'minni keereho yeemmo'ne.

²³Anenna gudisama beetekiristaane towatanni noohu Gayiyoosino keere dhaamino'ne. Katamu hajara sooreessa ikkinohu Erasixoosinna rodiinke Quwarxoosi keere dhaantino'ne.

²⁴Mootichinke Yesuusi Kiristoosi elto ki'ne baalunku ledo heedho! Hamii'ni.[6]

²⁵Maganoho galata uyino. Ani Yesuusi Kiristoosire kuleemmohu Danchu Duduwiranna lowo diro maaxame keeshshe xa xawo fulino halaalira, Maganu amma'natenni jawaattine uurritinanni gede assa'nera dandaanno.

²⁶Kuni halaali xa himanaanote borro widoonni xawe leellino. Mannu baalunku amma'ne hajajamara, hegere Magani hajajo garinni afanno gede assinoonni.

²⁷Callisi egennaamo ikkinohura mittu Maganira Yesuusi Kiristoosinni hegere ayirrinyi iillosi! Hamii'ni.