Read Sidama_Qullaawa _Maxaafa ROOMU SOKKA 2 Bible Online

ROOMU SOKKA 2 - Sidama_Qullaawa _Maxaafa bible

ROOMU SOKKA 2

¹Ati woleho yoo yaatto manchi, ku'lite gatattori dinohe. Woleho yaatto yoo ate aanano daggannote. Hatto ikkannohu, woleho yoo yaattohu, atinni qolte hakkonne coye assatto daafiraati.

²Maganu hattoo coye assitannore qorichishasi gara ikkitinota egenninoommo.

³Hatto assitannorira yoo yitanni heedhe, insa assitannore assattohu ati manchu kayinni, Maganu yoowiinni gatattoha lawannohe?

⁴Woy Maganu danchumma, cincasinna dandaasi batinye mishattoni? Maganu shaqqillisinni maarote widira qolahera hede assinota diafootto?

⁵Aagintaawa hoogakkinninna mokkookka ikkakkinni, Maganu hanqinna halaalaancho yoo dagganno barrira hanqosi aanaho lexxatto.

⁶Isi mittu mittunkura loosi loosisi gede aanno.

⁷Dancha looso jaatte loosatenni galata, ayirrinyenna ba'annokki heeshsho hasidhannorira, Maganu hegere heeshsho aannonsa.

⁸Uminsare calla hasidhanno haxawarrootira, halaalaancho coye facci assite agurtannoriranna bunshe hassannori aana kayinni Maganu, hanqonna aara dirrisanno.

⁹Balaxxe Ayihudete, aanchite dagate bunshe hassannori baalu aana qarrunna shetto dagganno.

¹⁰Ayihudeno ikkito, dagate dancha looso loossannore baala galantanninsa; ayirrinyenna keereno uyinanninsa.

¹¹Hakku ikkannohuno, Maganu mannaho godowa hosannokkiha ikkino daafiraati.

¹²Muse Seeri noonsakkiha cubbo loossannori, Seeru hooginsarono ba'anno. Muse Seeri hee'reennanni cubbo loossannori kayinni, Seeru garinni qorichishantanno.

¹³Seera macciishshite agadhitannori Maganu albaanni keeraabbanno; macciishshite agadhitannokkiri kayinni dikeeraabbanno.

¹⁴Muse Seeri noonsakki daga kalaqaminsanni Seeru yaannore wonshitanno. Kunnira, Muse Seeri hooginsarono, kalaqamu seeri giddonsa noo daafira hasiisanno garinni heedhanno.

¹⁵Ikkitonsa Muse Seeri yaannore baala wodaninsara borreessinoonnita leellishshanno. Tii"insano farci'rannonsa; mito mito woyiteno hayi yaannonsa; mito woyite kayinni sumuu yaannonsa.

¹⁶Kuni ikkannohu ani kuleemmohu Danchu Duduwi garinni, Maganu Yesuusi Kiristoosi widoonni qole mannunnita maaxante noo hedo qorichishanno Barraati.

¹⁷Kuneeti ati, «Ani Ayihudete» yaattohu, Muse Seera ku'lattohu, Maganunniha ikkakkinni adawadhatto.

¹⁸Maganu hedono egennootto; Muse Seera rosootto daafira dancha coye badde afootto.

¹⁹Ati, «Ani ballootaho massagaanchoho; tunsote noorirano caabbichoho;

²⁰egenno nookkire qajeelcheemmo; qaaqquulle rosiiseemmo» yaatto. Qolteno, Seera afakkinni wo'ma egennonna halaalu noohehu gede assite hedatto.

²¹Woloota rosiisattohu atenee rosiisa mayira hoogittoyya? «Moortinoonte!» yite kultanni, ati mayira moorattoyya?

²²«Foortinoonte!» yaattohu, ati mayira foorattoyya? Kaphu maganna makki'ratto; galmuwansa mayira soqattoyya?

²³Ati Maganu Seera adawadhattohu, Seera sa"atenni Magano mayira saalfachishattoyya?

²⁴«Ki'nenni kainohunni Maganu su'mi dagate mereero xonamanno» yine borreessinoonnihu kunniraati.

²⁵Seera wonshattoha ikkiro, barcimakki kaa'litannohe; Seera sa"attoha ikkiro kayinni, barcimakki barcima hoogate ledo taalote.

²⁶Barciminokki manchi Seeru yaannore agadhiro, barcima hoogasi barciminohu gede kiirantannosi.

²⁷Borreessinoonni Seera afidhe barcinte heedhenni Seera sa"attoha ikkiro, barcimikkinni Seera wonshanno manchi, ate aana yoo yaanno.

²⁸Su'mu callunni Ayihude ikkinohu halaalaancho Ayihudicha di"ikkino. Illete leellanno biso mudha halaalaancho barcima di"ikkitino.

²⁹Halaalaancho Ayihudimma wodanunnite. Halaalaancho barcimano Maganu Ayyaaninni wodanu barcimaati. Muse Seeri giddo borreessinoonni garinni barcimmannita bisu barcima di"ikkitino. Hattoo mancho Magano agurranna mannu digalatannosi.