Read Sidama_Qullaawa _Maxaafa ROOMU SOKKA 4 Bible Online

ROOMU SOKKA 4 - Sidama_Qullaawa _Maxaafa bible

ROOMU SOKKA 4

¹Maahoyyena, maalunni annanke ikkinohu Abirihaami ma afi'rino yineemmoyya?

²Abirihaami loosunni keeraa'minoha ikkoommero, adawadhannori noosihu baino. Maganu albaanni kayinni adawadhannore diafi'rino.

³Maganu Qaali, «Abirihaami Magano amma'ni; amma'nasino keeraanchimmate kiirantusi» yaanno.

⁴Loosanno manchi afi'rannohu hunkiisi gumi, isira malinosiho ikkinnina afansha di"ikkino.

⁵Mannu loosa hoogirono, cubbaataamma keereensanno Magano amma'niro, amma'nasi keeraanchimmate kiirantannosi.

⁶Daawitino Maganu loosiweello keereensannosi manchi ba'raa'rinoha ikkinota coyi'ranni,

⁷«Saonsa agurroonninsarinna, cubbonsa haa'ne hoolloonninsari, ba'raadhinoreeti.

⁸Maganu cubbosi kiirannosikki manchi ba'raa'rinoho» yiino.

⁹Kuni ba'raa'ri barcintinori callunnihonso barcintinokkirirano ikkannoho? Lamunkunniho. Hatto ikkannohuno, «Abirihaami Magano amma'ni; amma'nasino keeraanchimmate kiirantusi» yinoommo daafiraati.

¹⁰Abirihaami amma'na keeraanchimmate kiirantusihu mamooteeti? Barcimikkinniitinso barcimihu gedensaanniiti? Barcimikkinniiti.

¹¹Gedensaanni Abirihaami barcimino; barcimasi kayinni albaanni noosi amma'nanni keeraa'minota leellishshanno malaateeti. Kunnira, Abirihaami barcintukkinni amma'nitannoriranna amma'nansa keeraanchimmate kiirantannonsarira baalaho annaho.

¹²Abirihaami barcintinorirano annaho; anna ikkinohuno, barcimansa callatenni ikkikkinni, isi barcimara albaanni afi'rino amma'na hoode hadhino daafiraati.

¹³Maganu, Abirihaami sirchisi ledo tenne alame ragi'ranno gede hexxo uyinosihu, Seera agadhino daafira ikkikkinni amma'natenni afi'rino keeraanchimmanniiti.

¹⁴Hexxote ragi'raasine Seera agadhitannoha ikkiro, amma'na haafaho. Hexxono mullare ikkite gattanno yaate.

¹⁵Seeru Maganu hanqo abbanno; Seeru nookkiwa, sao diheedhanno.

¹⁶Kunnira, hexxo amma'nate aana rumuxxitinote. Tenne hexxo Abirihaami sirchi baalaho Maganu eltonni uyinoonnita ikkasera huluullo dino. Kunino Seera agadhitannorira calla ikkikkinni, Abirihaami gede amma'nitinorira baalahooti. Amma'nate widoonni Abirihaami ninke wo'munku annaati.

¹⁷Maganu Qaali giddo, «Lowo gosa anna assoommohe» yine borreessinoonni. Abirihaami, reyitinore kayisannohanna nookkiha hee'ranno gede assanno Magano amma'nino daafira, Maganu albaanni isi ninkera annankeeti.

¹⁸Abirihaami amma'ninohunna hawaqi'rinohu hexxinanniri mitturi nookki yannaraati. Kunnira, «Sirchikki hatto ikke bati'ranno» yinoonninte gede lowo gosa anna ikki.

¹⁹Xibbu diriha ikke noo yannara, bisisi reyino daafira ila dandaannokkitanna Saarano gaananna geercho ikkasenni ilte affannokkita afe hee'reennanni ammanasi didaafurtino.

²⁰Amma'nasinni kaajje Maganoho ayirrinye uyino ikkinnina, ammanasi dishoshshoggitino; Maganu uyinosi hexxono dihuluullamino.

²¹Maganu uyino hexxo wonshannoha ikkinota seekke buuxino.

²²Abirihaamira amma'na keeraanchimmate kiirantinosihu kunniraati.

²³«Keeraanchimmate kiirantinosi» yaanno qaali Abirihaami callaho borreessinoonniha ikkikkinni,

²⁴ninkerano ledooti. Mootichanke Yesuusa reyotenni kayisino Magano amma'nineemmorira ninkerano, ammananke keeraanchimmate kiirantannonke.

²⁵Mootichinke Yesuusino, cubbinke daafira sae aamaminohonna ninkeno keereensate reyotenni kainoho.