Read Sidama_Qullaawa _Maxaafa ROOMU SOKKA 5 Bible Online

ROOMU SOKKA 5 - Sidama_Qullaawa _Maxaafa bible

ROOMU SOKKA 5

¹Kune ninke keeraanchimma ammanatenni afi'noommo daafira, Mootichinke Yesuusi Kiristoosi widoonni Maganu ledo keere hee'noommo.

²Xa tenne uurrine hee'noommo eltowa e'noommohuno iso amma'natenniiti. Maganu ayirrinye gutamate hexxonnino hagiirraamma ikkineemmo.

³Kunni callunni ikkikkinni, qarrunni cinca afi'neemmo daafira, qarranke hagiirrunni adhineemmo.

⁴Cincatenni fonqolo sa'nannita, fonqolo sa"atenni hexxo afi'nannita egenninoommo.

⁵Uyinoonninkehu Qullaawu Ayyaani widoonni Maganu baxilli wodaninkera wo'minohura, hexxo di"irraawissannonke.

⁶Ninke wolqa afi'noommokki waro, Maganu hedino yanna iillituta Kiristoosi ninke cubbaataammaho reyino.

⁷Keeraanchu daafira reyanno mancho afi'ra lowo geeshsha qarraho; miteekke danchu shaqqadu manchi daafira reyannohu hee'rannoha ikkanno.

⁸Ikkollana, ninke cubbaataamma ikkine hee'neenna Kiristoosi ninke daafira reyino. Kunni garinni Maganu lowo geeshsha baxannonketa leellishino.

⁹Keeraa'minoommohu Yesuusi Kiristoosi mundeenni ikki geeshsha, roorenka isi widoonni hinge Maganu hanqinni ganteemmo.

¹⁰Ninke Maganu diina ikkine hee'ne, Beettisi reyonni Maganu ledo araarammummoha ikkiro, Maganu ledo araarammummohu gedensaanni, Beettisi heeshshonni roorenka ganteemmo.

¹¹Konne calla ikkikkinni, Maganu ledo araarsinonkehu Mootichinke Yesuusi Kiristoosi widoonni hinge Maganunni hagiidhineemmo.

¹²Mittu manchinni kainohunni cubbu tenne alame eino; reyo cubbu widoonni higge daggino. Mannu baalu cubbo loosino daafira, reyo manna baala amaddino.

¹³Muse Seeri aamamara albaanni cubbu alamete aana no. Ikkollana, seeru nookki waro cubbo ikke dikiiramino.

¹⁴Ikkeennano Addaami gede hajajo hunte cubbo loossinokkiri aana nafa, reyo Addaaminni kayisse Muse geeshsha noo manni baalaho wolqissino. Addaami albillitte daanno Kiristoosi lawishshaati.

¹⁵Maganu elto kayinni mannu cubbi gedeeta di"ikkitino. Mittu manchi cubbinni lowo manni reyannoha ikkiro, Maganu eltonna afanshi mittu manchi Yesuusi Kiristoosi elto widoonni lowo mannira bati're aamamanno.

¹⁶Maganu afanshi mittu manchi cubbi ledo taalo di"ikkino. Mittu manchi cubbinni kainohunni yinoonni yoo qoricha abbitino; lowo manni cubbi gedensaanni dayino afanshi keeraanchimma abbanno.

¹⁷Mittu manchi cubbinni reyo mannu aana wolqissino. Mittu Yesuusi Kiristoosi widoonni Maganunnita lowo eltonna keeraanchimma afidhinori roore qeellete heeshsho heedhanno.

¹⁸Mittu Addaami cubbi qorichi yoo mannu baalu aana abbinte gede, mittu Kiristoosihu keeraanchimmate loosi manna baala qorichunni gatise heeshsho aanno.

¹⁹Mittu manchi Addaami hajajama giweenna lowo manni cubbaataamo ikkinte gede, Kiristoosi hajajamanni lowo manni keeraa'manno.

²⁰Seeru aamama cubbu bati'ranno gede assitino; cubbu bati'rinowa kayinni Maganu elto roore batidhino.

²¹Kuni ikkinohuno, reyote widoonni cubbu moohinonte gede, Mootichinke Yesuusi Kiristoosi loosinni hegere heeshsho afi'rate, keeraanchimmate widoonni Maganu elto mookkaraati.