Read Sidama_Qullaawa _Maxaafa ROOMU SOKKA 8 Bible Online

ROOMU SOKKA 8 - Sidama_Qullaawa _Maxaafa bible

ROOMU SOKKA 8

¹Kiristoosi Yesuusinni noorira xaate qorichu yoo diyinanninsa.

²Kiristoosi Yesuusinni afi'nanni heeshsho aanno Ayyaani Seeri, cubbunna reyote seerinni keere fushshinoe.

³Mannu maali wolqa hoogino daafira, Seeru assara dandiinokki coye Maganu assino. Maganu Beettosi cubbaataamu manni lawishshinni cubboho kakkalo asse soyino. Kunni garinni Maganu cubbu aana yoo yee qorichishino.

⁴Konne assinohu maalu hedo garinni ikkikkinni, Ayyaanu hedo garinni hee'neemmori ninke, Seeru hajajo wonshineemmo gedeeti.

⁵Maalu garinni heedhannori, maalu halchonni amadantanno. Ayyaanu garinni heedhannori kayinni, Ayyaanu halchonni amadantanno.

⁶Maalu hedonni amadama reyo abbitanno; Ayyaanu hedonni amadama kayinni heeshshonna keere uyitanno.

⁷Maalu coyinni amadamino manchi Maganu ledo gibbote; Maganu Seerirano dihajajamanno; hajajameno diafanno.

⁸Maalu coyinni amadantinori, Magano hagiirsiisse diaffanno.

⁹Maganu Ayyaani giddo'ne hee'rannoha ikkiro, Ayyaanu hedo ikkinnina maalu hedo diamaddanno'ne. Kiristoosi Ayyaani noosikkihu, Kiristoosi fiixa di"ikkino.

¹⁰Kiristoosi ki'ne giddo hee'riro, maali'ne cubbunni kainohunni reyannoha ikkiro nafa, keeraa'mitinoonni daafira Ayyaanu heeshsho aanno'ne.

¹¹Yesuusa reyotenni kayisinohu Maganu Ayyaani giddo'ne hee'riro, Kiristoosa reyotenni kayisi Magani giddo'ne noohu Ayyaanisi widoonni hige reyanno maali'nera heeshsho aanno.

¹²Kunnira roduuwa'ya, ninkera asalu noonke. Asalinke kayinni maalu hedo garinni hee'nammora di"ikkino.

¹³Maalu hedo garinni heedhiniro reyitinanni. Ayyaanu wolqanni maalu looso shitiniro kayinni lubbotenni heedhinanni.

¹⁴Maganu Ayyaani hoode hadhannori, Maganu oosooti.

¹⁵Kunnira, «Anna Annaanna» yitine woshshidhinanniha oosichimmate Ayyaana adhitinoonni ikkinnina, galagaltine waajjatenni heedhinanni gede borojjimmate ayyaana diadhitinoonni.

¹⁶Maganu Ayyaani ninke ayyaani ledo Maganu ooso ikkanke farci'ranno.

¹⁷Maganu ooso ikkinummoro, Maganu ragi'raasineeti; Kiristoosi ledo ragi'neemmoreeti. Kiristoosi qarra beeqqinummoro, gedensaanni ayirrinyesi beeqqineemmo.

¹⁸Xaa qarri, albillittete daankera noo ayirrinyi ledo taashshiniro, mite nafa yinannikkiha ikkinota egennoommo.

¹⁹Kalaqamu baalu, Maganu ooso la"ate quqquxame agadhe no.

²⁰Kalaqamu haafu coyira sae aamamino; hakkuno umisi halchonni ikkikkinni, hexxotenni agadhanno gede Maganu yiino garinniiti.

²¹Hexxono kalaqamu baote borojjimmanni gate, Maganu oosota ayirrinyu wolapho gutamanno gedeeti.

²²Kalaqamu baalu mitteenni techo geeshsha gametenni amadame uranni noota anfoommo.

²³Uranni noohu kalaqama calla di"ikkino; umi afansha ikkinoha Qullaawa Ayyaana adhinoommori ninkeno, mannimmate wolapho afi'neemmota oosichimmanke quqquxamatenni agadhinanni, giddoyidi mannimmankenni urranni hee'noommo.

²⁴Gantoommohu hexxotenniiti; hexxinanni coyi illetenni leellannoha ikkiro hexxo di"ikkanno. Illete leellannore ayino dihexxanno.

²⁵Illete leellannokkire hexxinummoro kayinni, cincine agadhineemmo.

²⁶Huucci'nanni gara egenninoommokki daafira, wolqa hoogankera Qullaawu Ayyaani kaa'lannonke. Qullaawu Ayyaanino, kulle dandiineemmokki hinciiccamanni ninke afoo ikke huuccannonke.

²⁷Mannu wodana egennino Magani, Qullaawu Ayyaani hedo maatiro afino. Hatto ikkannohu, Qullaawu Ayyaani qullaawu mannira Maganu hedo garinni huuccanno daafiraati.

²⁸Magano baxxannorira, hedosi garinni woshshantinorira Maganu coye baala danchummate assannota anfoommo.[1]

²⁹Beettisi lowo roduuwi mereero umiha ikkanno gede Maganu balaxe egenninore alba asse doore, Beettisi dana afidhanno gede hirqino.

³⁰Balaxe doorinore woshshinsa; woshshinonsareno keereensinsa; keereensinonsareno ayirrisinsa.

³¹Xa kunni coyira ma yineemmo? Maganu ninke ledo hee'riro, qeelankera dandaannohu ayeti?

³²Mitto Beettosi mararikkinni sayise uyinonke Magani, Beettisi ledo wole coye baala aa hiikke hoogannonke?

³³Maganu doorinore, «Sao assitinoonni» yaannonsahu ayeti? Keereensannonsahu Maganoho.

³⁴«Ki'nera qorichu malino» yaannohu ayeti? Reyinohu Kiristoosi Yesuusi, saeno reyotenni kainohu, Maganu qiniiteenni ofolle noohu ninke daafira huuccanno.

³⁵Maahoyyena, Kiristoosi baxilliwiinni badankera dandaannohu ayeti? Qarru, shetto, dartu, hude, kallimma, waajjillunso bagadu badannonke?

³⁶Kuni ikkannohu, «Ate daafira wo'ma woyite shinoonninke; gorrinanni ge'reewi gedeno ikkinoommo» yine borreessinoonni gedeeti.

³⁷Kunni baalunku coyinni kayinni baxinonkehu Kiristoosinni qeeltinore roorreemmo.

³⁸Kunnira, reyono ikkito heeshsho, sokkaasineno ikkito gashshaano, xa noohano ikko gedensaanni daannohu, aye wolqano ikkito,

³⁹iimiidino ikko woriidi, wole kalaqamano ikkiro, Mootichinke Kiristoosi Yesuusi widoonni afi'noommohu Maganu baxilliwiinni badankera dandaannori nookkita afoommo.