Read Sidama_Qullaawa _Maxaafa ROOMU SOKKA 9 Bible Online

ROOMU SOKKA 9 - Sidama_Qullaawa _Maxaafa bible

ROOMU SOKKA 9

¹Kiristoosinni noommo daafira halaale coyi'reemmo ikkinnina dikapheemmo. Kapheemmokkita Qullaawu Ayyaani massagannohu tii"i'ya kulannoe.

²Lowo dadillinna agurannokki qarri wodani'ya giddo no.

³Maalu fiixa'ya ikkitinorira gosa'ya daafira yee, Kiristoosiwiinni badameenna Maganu rumo iillitoomme"ero nafa digiwoommo.

⁴Israeele Maganu doorino gosaati. Maganu insa oososi assi'rino; ayirrinyesi leellishinonsa; gondoorono einonsa; Seerano uyinonsa; halaalaancho magansi'ranna hexxo uyinonsa.

⁵Insa albi annuwawiinni dagginoreeti. Kiristoosino maalunni dayinohu insawiinniiti; wo'munkura aliidi Magani Kiristoosi, hegere geeshsha galatamo![2] Hamii'ni.

⁶Ikkollana Maganu coyi'rino coyi ikkikkinni gatino yaa di"ikkino. Israeele baala Maganu doorino mannaati yaano di"ikkino.

⁷Abirihaami ooso baala Maganu uyino hexxote yaa di"ikkino. Maganu Abirihaamira, «Sirchikki sirannohu Yisihaaqi widoonniiti» yiino.

⁸Kunnira, ronsoonni garinni calla ilantinori Maganu ooso di"ikkitino; Maganu uyino hexxo garinni ilantinori Abirihaami sirchooti.

⁹Tini Maganu uyino hexxo, «Daanno diro techonte gede atewa galagale higeemmo; Saarano labbaa qaaqqo afidhanno» yitanno.

¹⁰Konne calla ikkikkinni, Ribiqari lamenti ooso mittu annira ahaahinke Yisihaaqira ilantinoreeti.

¹¹Maganu doorshi loosunni ikkikkinni woshshattosinni ikkinota leellishate, lamenti ooso ilantukkinni busha woy dancha coye assitukkinni,

¹²Maganu Ribiqara, «Bayiru maa'neho soqqamaancho ikkanno» yiinose.

¹³Kuni ikkannohu, «Yaiqoobi baxoommo; Eesawu giwoommo» yine borreessinoonni garinniiti.

¹⁴Xa ma yineemmo? «Maganu ditaashshanno» yinammora dandiineemmo? Dee'ni! Horonta hatto yaa didandiineemmo!

¹⁵Maganu Musera, «Marareemmoha marareemmo; maareemmoha maareemmo» yiino.

¹⁶Kunnira Maganu doorshi maarosinniiti ikkinnina, mannu halchinonna loosino garinni di"ikkino.

¹⁷Kunnira Qullaawu Maxaafi giddo Feriooni daafira, «Ani ate kayisoommohu,[3] (wolqa'ya ate aana leellishateetinna su'mi'ya gobba baalate ayirranno gede assateeti» yine borreessinoonni.)

¹⁸Maganu maarara hasi'rinoha maaranno; mito kayinni mokkookku wodaniha assanno.

¹⁹«Hatto ikkannoha ikkiro, Maganu manna mayira bushiishannoyya? Isi hedo ittisannohu nooni?» yaannohu hee'rannoha ikkanno.

²⁰Koo mancho! Maganu ledo xa'mamate mayi taalleenyi noohe? Doru uduunnichi ganannosiha, «Togo assite mayira loosittoe» yaa dandaannoni?

²¹Woy doru uduunne gananno manchi mitto tuutira, wole minira ikkanno gede asse gana didandaanno?

²²Maganu hanqosi leellisharanna wolqasi xawisara hasi're, baote qixxaawinohura hanqu uduunnira lowo geeshsha cincino.

²³Hatto assinohuno, umo asse ayirrinyeho qixxeessinorira maarote uduunnira ayirrinyisi batinye leellishara yeeti.

²⁴Ninke Ayihudete giddonni calla ikkikkinni Dagate giddonnino woshshe maarote uduunne assinonke.

²⁵Maganu Himanaanchu Hoosei widoonni, «Manna'ya ikkitinokkire, ‹Manna'yaati› yeemmo; banxoonnikki gosa, ‹Banxannireeti› yeemmo» yiino.

²⁶«Manna'ya di"ikkitinoonni» yinoonninsa darga, «Heeshshote Magani oosooti» yinanninsa.

²⁷Isayaasino qaalesi naggi asse Israeelete daafira, «Israeelete manni baaru shaafi gede kiiro batidhurono, insa giddonni shiimu manni callu gatanno.

²⁸Mootichu baattote aana keeshshikkinni gudisama yoo yaanno» yiino.

²⁹Isayaasi umo asse, «Olantote Mootichi Kaaliiqi taraare gatisa hoogoommenkero, ninkeno Soddoomunna Gomooru Katami gede, ba'ne hoongoommo» yee coyi'rino.

³⁰Xa ma yineemmo? Keeraanchimma hasidhinokki daga keeraanchimma afidhino. Tenne keeraanchimmano amma'natenni afidhino.

³¹Ikkollana, keeraanchimma aanno Seeri hoode hadhannoti Israeelete gosa, Seera wonsha hooggino daafira keeraanchimma diafidhino.

³²Afi'ra hoogginohu, insa keeraanchimma amma'natenni ikkikkinni loosunni hasidhanno daafiraati. Kunnira, guficho ikkinonsa kinchinni gufidhino.

³³Kunino, «Kuneeti Tsiyooni kincho woreemmo. Kuni kinchi, manna gufi'ranno gede assanno; manna gane karanno. Ikkollana iso amma'nannohu disaalfatanno» yine borreessinoonni gedeeti.