Read Sidama_Qullaawa _Maxaafa UMI QORONTOOSI 1 Bible Online

UMI QORONTOOSI 1 - Sidama_Qullaawa _Maxaafa bible

UMI QORONTOOSI 1

¹Maganu yiino garinni Yesuusi Kiristoosi soqqamaasincho ikkara woshshaminohu Phaawuloosinna rodiinke Sostenisi:

²Qorontoosi Katamira nootera Maganu Beetekiristaanera, Yesuusi Kiristoosinni qullaawootahonna qullaawoota ikkate woshshantinorira, qoleno darga baalaho insanna ninke Mooticha ikkinohunniha Yesuusi Kiristoosi su'ma woshshidhannorira baalaho,

³Anninke Maganunna Mootichinke Yesuusi Kiristoosi eltonna keeri ki'ne ledo hee'ro.

⁴Yesuusi Kiristoosi widoonni qole uyino'ne elto daafira, wo'manka woyite Magano galaxxeemmo.

⁵Baalunku coyinni hasaawunnino ikko egennotenni Kiristoosinni duroo'mitinoonni.

⁶Kiristoosi daafira farci'noommo coyi ki'ne giddo darga assi'rino.

⁷Kunnira, Mootichinke Yesuusi Kiristoosita layinkimeeshshi daa agadhitinanna, ayyaanaamu afanshi mittuno dixea"anno'ne.

⁸Mootichinke Yesuusi Kiristoosi daanno barra xe'o nookkire ikkitinanni gede, isi goofimarchu geeshsha kaajjitine heedhinannire assanno'ne.

⁹Beettisi Mootichinke Yesuusi Kiristoosi mittimmawa woshshino'nehu Maganu ammanammoho.

¹⁰Roduuwa'ya, mereero'ne babbadooshshu nookkiha, mimmiti'ne ledo sumuu yitine hee'ratenni mittu wodanirenna mitte hedore ikkitinanni gede Mootichinke Yesuusi Kiristoosi su'minni huucci'reemmo'ne.

¹¹Roduuwa'ya, mereero'ne babbadooshshu noota Qeloe mini manni kulinoe.

¹²Hattino ki'ne giddonni mitu mitu, «Ani Phaawuloosiho», «Ani Aphiloosiho», «Ani Keefaho», «Ani Kiristoosiho» yaa'neeti.

¹³Ikkina, Kiristoosi beehaminoni? Phaawuloosi ki'nera sutaminoni? Woy Phaawuloosi su'minni cuuantinoonnini?

¹⁴Qerisiphoosinna Gayiyoosi agurranna wole cuua hooga'yara Magano galaxxeemmo.

¹⁵Kunnira, «Phaawuloosi su'minni cuuamoommo» yaannohu mittuno dino.

¹⁶(Isxifaanoosi mini mannano cuuoommo; wolu cuuoommohu nooro diafoommo.)

¹⁷Kiristoosi, Dancha Duduwo lallawammora ikkinnina, cuuammora disoyinoe. Kiristoosi masiqali mullare ikkannokki gede, Dancha Duduwo mannu hayyonni coommishe dicoyi'reemmo.

¹⁸«Yesuusi masiqalu aana sutame reyino» yine kullanni qaali ba'annorira gowwimmate. Ninke ganteemmorira kayinni Maganu wolqaati.

¹⁹«Egennaammu egenno huneemmo; hayyoolete hayyo diigeemmo» yine borreessinoonni.

²⁰Hatto ikkiro, egennaamu hiikko no? Hayyichu hiikko no? Xiinxallu hiikko no? Maganu tenne gobba egenno gowwimma ikkitanno gede diassino?

²¹Tenne gobba manni Magano uminsa egennonni afa hoogino daafira, ninke kulleemmoha gowwimma lawannoha Dancha Duduwo ammantannori gattanno gede Maganu fajjino.

²²Ayihude malaate hasidhanno; Giriike egenno halchitanno.

²³Ninke kayinni sutaminonkeha Kiristoosa kulleemmo. Kuni coyi, Ayihudete gufichoho; Giriikete qole gowwimmate.

²⁴Woshshantinorira kayinni, Ayihude ikkito Giriikete mannira, Kiristoosi Maganu wolqaatinna Maganu egennooti.

²⁵Gowwimma lawannohu Maganu coyi mannu egenno rooranno. Maganu wolqiweelle lawanno coyi mannu jawaante rooranno.

²⁶Roduuwa'ya, woshshantini waro ki'ne hiittooreetiro qaagge. Mannu hedanno garinni, ki'ne giddohu rooru manni, egennaamo woy wolqaataamo woy ayirrado di"ikkino.

²⁷Maganu egennaamma saalfachishara yee, tenne gobbara gowwoota labbannore doorino; jawaatoota saalfachishara yee, tenne gobbara wolqiweeloota labbannore doorino.

²⁸Maganu tenne gobba mannira ayirrado lawino coye hunara hasi're, tenne gobbara shollinoha, mishaminohanna haafa coye doorino.

²⁹Hatto assinohuno, ayino Maganu albaanni naaxxannokki gede hasi'reeti.

³⁰Maganu kayinni ki'nera Yesuusi Kiristoosi ledo mittimma heedhanno'ne gede assino. Kunnira, Maganu Yesuusi Kiristoosi ninkera egennonke, keeraanchimmanke, qullaambenkenna wodonke ikkanno gede assino.

³¹«Adawadhannohu Magano adawadho!» yine borreessinoonnihu kunniraati.