Read Sidama_Qullaawa _Maxaafa UMI QORONTOOSI 11 Bible Online

UMI QORONTOOSI 11 - Sidama_Qullaawa _Maxaafa bible

UMI QORONTOOSI 11

¹Ani Kiristoosi laweemmonte gede, ki'neno ane labbe.

²Baalunku coyinni qaagginanniehuranna rosiisoommo'ne coye seekkitine amaddinoonnihura, lowo geeshsha galateemmo'ne.

³Ikkollana, mitto coye affinara hasi'reemmo: Labballo baalaho Kiristoosi umoho; meyate umi labbaaho; Maganu qole Kiristoosira umoho.

⁴Umo guggu'le hee're huucci'rannohu woy Maganu sokka coyi'ranno manchi umosi shollishanno.

⁵Umo guggu'litukkinni huuccatto assidhannoti, woy Maganu qaale kultanno meyati, umose shollishshanno. Umo guggu'litannokki meyati, umo meexxitinote ledo mittete.

⁶Meyati umose guggu'la hoogguro, dananchose mudhitona. Danancho mudha woy meexxa saala ikkitusero umo guggu'litona.

⁷Labbaahu, Maganu daninna Maganu ayirrinyi aanasi leellannoha ikkinohura, umo guggu'loonke. Meyati kayinni labbaahu ayirrinyeeti.

⁸Meyati kalaqantinohu labbaahuwiinniiti ikkinnina, labbaahu meyatenni dikalaqamino.

⁹Meyati labbaahura kalaqantino ikkinnina, labbaahu meyatera dikalaqamino.

¹⁰Kunniranna sokkaasinete daafira, meyati ayiddaannise roorre leellishate umose guggu'lito.

¹¹Mootichunniwa kayinni meyati labbaahu nookkiha, labbaahuno meyati nookkiha diheedhanno.

¹²Meyati labbaahuwiinni kalaqantinonte gede, labbaahuno meyatenni ilamanno. Baalanka kalaqinohu kayinni Maganoho.

¹³Hanni ki'nenni yiiyye; meyati umo guggu'litukkinni Magano huucci'ra garahoni?

¹⁴Labbaahu umo lossi'ra saala ikkitinota, mannu kalaqamunni nafa diafanno?

¹⁵Meyatera kayinni dananchu ayirrinyeseeti. Seeda danancho uyinoonnisehu, umo diphitanno gedeeti.

¹⁶Konne coye adha giwannohu hee'riro, ninkerano ikko wole Maganu beetekiristaanera kawiinni baxxino seeri dinonke.

¹⁷Xaaddinanni woyite assitinanni coyi miicannoha ikkinnina kaa'lannoha ikkinokki daafira, xa eemmo'ne hajajonni naadammo'nera dihasi'reemmo.

¹⁸Umo asse, xaaddinanni woyite mereero'ne babbadooshshu noota macciishshoommo. Macciishshoommo coyi giddonni gamu halaale ikkinota ammanoommo.

¹⁹Halaalaano ayeootiro bade afate, mereero'ne babbadooshshu hee'ra digattannote.

²⁰Xaaddinanni woyite ittinannihu Mootichu hurbaate di"ikkino.

²¹Ittinanni woyite mimmito agartinikkinni abbidhinoonni sagale umu umunni saantinanni. Kunni garinni, mitu hudi're hee'reenna mitu dimbanno.

²²Maaho, ittinannihunna agginanni mini dino'neni? Woy kayinni Maganu beetekiristaane mishshineetini? Woy qoltine afidhinori nookkire saalfachishshinaraati? Hanni xa ma yoo'ne? Kunni coyira naado'neni? Horonta dinaadeemmo'ne.

²³Mootichu Yesuusiwiinni adhe ki'nera oommo'ne coyi konneeti: Mootichu Yesuusi reyote sayinse uyinisi hashsha tima haa're,

²⁴Magano galatihu gedensaanni tima hiiqqe, «Kuni ki'nera eemmohu maala'yaati; kunninni ane qaagge» yii.

²⁵Hurbaatu gedensaanni finiincho haa're, «Kuni finiinchi mundee'yanni haaro gondoorooti; agginanni yanna baalate, kunninni ane qaagge» yii.

²⁶Konne tima ittinanninna kunni finiinchinni agginanni yanna baalate, Mootichu daa geeshsha reyosire kultinanni.

²⁷Adha hasiissinosikkiha konne tima itannohunna kunni finiinchinni agannohu baalu, Mootichu maalanna mundee shotisanno daafira xa'mamanno.

²⁸Kunnira, ayino konne tima itaranna kunni finiinchinni agara albaanni umosi towaxxo.

²⁹Mootichu maala bade afikkinni, tima itannohunna kunni finiinchinni agannohu baalu, umisi aana yoo abbi'ranno.

³⁰Ki'ne giddonni lowo manni dhiwaminohunna wolqiweelinohu, qoleno gamu manni reyinohu kunniraati.

³¹Umonke balanxe towaxxinoommoro, aananke yoo didagganno.

³²Ikkollana, gedensaanni yoo tenne gobba ledo mitteenni daggannonkekki gede, Mootichu xa yoo yee seejjannonke.

³³Kunnira roduuwa'ya, Mootichu hurbaate ittinanni woyite, mimmito'ne agarre.

³⁴Xaaddinanni woyite yoo aana'ne dagganno'nekki gede, hudi'rinohu hee'riro mare minesi itona. Gatino coye dayemmo woyite kuleemmo'nena.