Read Sidama_Qullaawa _Maxaafa UMI QORONTOOSI 12 Bible Online

UMI QORONTOOSI 12 - Sidama_Qullaawa _Maxaafa bible

UMI QORONTOOSI 12

¹Roduuwa'ya, xa Qullaawu Ayyaani afanshi daafira baddine affinara hasi'reemmo.

²Ammantinoonnikki waro, batinyu garinni coyi'ra dandiitannokki maganna hoode hadhinoonnita egentinoonni.

³Maganu Ayyaaninni coyi'ranni Yesuusa rumannohu dino. Qullaawu Ayyaaninni ikka hoogiro, «Yesuusi Mootichaho» yaannohu mittuno nookkita affinara kuleemmo'ne.

⁴Addi addihu Qullaawu Ayyaani afanshi no. Qullaawu Ayyaani kayinni mittoho.

⁵Addi addi soqqansho no; soqqammanni Mootichi kayinni mittoho.

⁶Soqqammanni gari babbaxxinoho; baalanka looso wo'munku manni giddo loosanno Magani kayinni mittoho.

⁷Mittu mittunkura Qullaawu Ayyaani xawishsha uyinannihu wo'munku qiniitiraati.

⁸Qullaawu Ayyaani mitoho coye coyi'rate hayyo aanno. Hakko Ayyaaninni, mitoho egenno giddo afidhino sokka aanno.

⁹Hakko Ayyaaninni mitoho ammana, mitoho hursate wolqa,

¹⁰mitoho maalale loosate wolqa, woleho qole himana, woleho ayyaanna bade afate egenno, mitoho haaru afiinni coyi'rate dandaa, woleho addi addi afiinni coyi'noonni coye tire kulate dandaa aanno.

¹¹Konne baala assannohu hakku mittu Ayyaani, mittu mittunkura afansha hedino garinni aanno.

¹²Mittu manninati batinye biso afi'rino. Kuni baalu bisi, mittu manninati aana no. Kiristoosino hattooti.

¹³Ninke Ayihudeno dagano, borojje woy gobbate ayiddeno ikkino, mitto biso ikkinammora Qullaawu Ayyaaninni cuuammoommo. Ninke baalunku mitto Ayyaana angoommo.

¹⁴Mannimma addi addi bisinni ikkinnina, mittu bisi callunni dikalaqantino.

¹⁵Lekka, «Ani anga ikka hoogoommahura, manninatu biso di"ikkoomma» yituro, biso ikkase gattannoni?

¹⁶Maccano, «Ani ille ikka hoogoommahura, manninatu biso di"ikkoomma» yituro, biso ikkase gattannoni?

¹⁷Manninatu gudisame ille calla ikkoommero, mayinni macciishshinanni? Manninatu baalu macca calla ikkoommero, mayinni ulantanni?

¹⁸Maganu kayinni mitto mittonka biso manninatu giddo hasiisanno darga amade hee'ranno gede assino.

¹⁹Baalunku mitto biso calla ikkoommero, manninatu hiikko hee'ranno?

²⁰Bisu batinye ikkirono, manninatu kayinni mittoho.

²¹Ille anga, «Ani ate dihasi'reemma» yite diaffanno. Umu lekka, «Ani ate dihasi'reemmo» yee diafanno.

²²Mullare lawanno bisi baalu, wolunni roore hasiisanno.

²³Minshoonni bisira, wolunni roore ayirrinye uyineemmo. La"ate saallanni biso, wolunni roore ayirrinse diphineemmo.

²⁴Ayirrado lawe leellanno bisira kayinni kuri duuchu dihasiisanno. Maganu kayinni biso mimmitu ledo sufe, minshoonnirira roore ayirrinye uyino.

²⁵Hatto assinohu, manninatu mereero babbadooshshu hee'rikkinni, ku'u bisi ko'onne mararanno gede hedeeti.

²⁶Manninatu giddonni mittu bisi dhiwamiro, wolu bisi gudisame dhiwamanno. Mittu bisi ayirrinye afi'riro, wolu bisi qole hattennenni hagiidhanno.

²⁷Ki'neno Kiristoosi manninateeti; mitti mitti'ne manninatisi bisooti.

²⁸Kunnira, Maganu balaxe beetekiristaanete mito mito soqqamaasine, layinkita himanaano, sayikkita rosiisaano asse worino. Hakkiinni aanche, maalale loossannore, hursate wolqa afidhinore, manna kaa'litannore, gashshaanonna haaru afiinni coyidhannore worino.

²⁹Ikkollana, baalunku soqqamaasine ikkitannoni? Baalunku himanaano ikkitannoni? Baalunku rosiisaano ikkitannoni? Baalunku maalale loossannoni?

³⁰Baalunku dhiwantinore hursate wolqa afidhannoni? Baalunku haaru afiinni coyidhannoni? Baalunku qolte haaru afiinni coyi'noonniha tirtannoni?

³¹Baalanka roorino afansha afi'rate halche. Wo'manka roortino doogono leellisheemmo'ne.