Read Sidama_Qullaawa _Maxaafa UMI QORONTOOSI 14 Bible Online

UMI QORONTOOSI 14 - Sidama_Qullaawa _Maxaafa bible

UMI QORONTOOSI 14

¹Duuchunkunni roore baxillu faana hadhe. Ayyaanaamo afansha, wolunkunni roore Maganu sokka kulate hasidhe.

²Haaru afiinni coyi'rannohu Maganohooti ikkinnina dimannahooti. Go'lino coye Qullaawu Ayyaaninni coyi'ranno daafira, wolu afannohu dino.

³Maganu sokka kulannohu kayinni manna kaa'late, kaajjishatenna jawaachishate coyi'ranno.

⁴Haaru afiinni coyi'rannohu umosi calla dhaaphanno. Maganu sokka kulannohu kayinni, beetekiristaane dhaawanno.

⁵Baalunku haaru afiinni coyidhinara halcheemmo. Hakkunninni roore Maganu sokka kultinara baxeemmo. Maganu sokka kulannohu, haaru afiinni coyi'rannoha roorino. Hakkuyi ka'a kayinni, beetekiristaane dhaawantanno gede haaro afoo tirannohu hee'ra hasiissanno.

⁶Xa kayinni roduuwa'ya, ani ki'newa daye haaru afiinni coyi'rummoro, xawise woy egenno woy sokka woy mito roso kula hoogummo'nero, maricho kaa'leemmo'ne?

⁷Lubbo afi'rinokki uduunnicho, suusulle ufuunfiro woy gingilaate ganniro, hendoonnire kayinni malaatisa hoongiro ufuunfanninna gannanni hee'noonni uduunnichi qoonqo mayinni bande anfanni?

⁸Xurumba leellanno garinni ufuufa hoongiro, olaho ayi qixxaawanno?

⁹Hattonni ki'neno coyidhinanni coye xawissine kula hoogginiro, mannu hiitto asse buuxanno? Bubbete coyi'nannihu gede ikke gatanno.

¹⁰Baattote aana kiiro nookkihu duuchu afii no. Baalunkura kayinni tiro noonsa.

¹¹Coyi'nanni hee'noonni afoo egenna hoogummoro, coyi'rannohura wosincho ikkeemmo; isino anera wosincho ikkanno.

¹²Ki'neno Qullaawu Ayyaani afansha afi'rate halchitini geeshsha, roorsitine ammanaasine dhaawanno afanshi bati'ranno'ne gede hasidhe.

¹³Kunnira, haaru afiinni coyi'ranno manchi, coyi'rannore tira dandaanno gede huuccatto assi'ro.

¹⁴Haaru afiinni huucci'rummoro, ayyaani'yanni huucci'reemmo ikkinnina wodani'yara kaa'lannori dino.

¹⁵Hatto ikkiro ma assa woyyitannoe? Ayyaani'yanni huucci'reemmo; surre'yannino huucci'reemmo; ayyaani'yanni faarsi'reemmo; surre'yannino faarsi'reemmo.

¹⁶Hatto ikka hoogiro, ati ayyaanunni Magano galatatto woyite macciishshannohu yaattore afa hoogiro, galatakki mama afe, «Hamii'ni» yaanno?

¹⁷Shiqishattoti galatu huuccatto danchate. Ikkollana wole manna didhaabbanno.

¹⁸Ani ki'ne baalunkunni roore haaru afiinni coyi'reemmohura Magano galaxxeemmo.

¹⁹Ikkollana, haaru afiinni tonne kume qaale coyi'rammontenni, beetekiristaanete giddo manna rosiisate egenninoonni afiinni onte qaale coyi'ra baxeemmo.

²⁰Roduuwa'ya, qaaqquullu gede heda agurre. Bushu coyira kayinni qaaqquullu gedeere ikke. Hedo'nenni jajjabbu gedeere ikke.

²¹Qullaawa borro giddo, «‹Haaru afiinni coyi'ranno manninna, wole gobba manni afiinni tenne gosara coyi'reemmo; hatto ikkeennano dimacciishshitannoe› yaanno Mootichu» yine borreessinoonni.

²²Kunni daafira, haaru afiinni coyi'ra ammantinokkirira ikkinnina, ammantinorira malaate di"ikkitino. Maganu sokka coyi'ra ammantinorira ikkinnina ammantinokkirira malaate di"ikkitino.

²³Kunnira, ammanaasine gamba yiteenna mitu mitu haaru afiinni coyi'ranna, affinokkiri woy ammantinokkiri dagge la'uro, «Kuri macharaartinoreeti» diyitanno?

²⁴Baalunku Maganu sokka kulanni hee'reenna, ammantinokkiri woy buuxxinokkiri ka'e dagguro, coyi'nanni coye macciishshite seejjantanno; so'ronsawiinnino higganno.

²⁵Wodanaho go'le noonsa coyino xawannonsa; alba higge kumbuulte, «Halaalinta Maganu ki'ne ledo no» yite Magano magansidhanno.

²⁶Roduuwa'ya, xa ma assino? Huuccattote gamba yitinanni woyite, ki'ne giddonni mitoho faarso noosi; woleho rosiisate elto noosi; woleho qole go'lino coye tirate elto noosi; woleho haaru afiinni coyi'rate elto noosi; woleho qole haaru afiinni coyi'noonniha tirate elto noosi. Tini baalanti elto beetekiristaane dhaabbannota ikka hasiissanno.

²⁷Haaru afiinni coyidhannori heedhuro, lamu woy bati'riro sasu bado bado coyidhona; insa coyidhannoha wolu kayinni tirona.

²⁸Tirannohu hoogiro kayinni, haaru afiinni coyi'rannohu beetekiristaanete giddo sammi yee, umisiranna Maganoho calla coyi'rona.

²⁹Maganu sokka kultannori lame woy sase ikkite coyidhona; insa coyidhuha, macciishshanno manni hiince laona.

³⁰Xaadunniwa noo manchira go'lino coyi leellisiro, balaxe coyi'ranni noohu sammi yoona.

³¹Duuchunku rosannonna jawaatanno gede, Maganu sokka bado bado coyidhe.

³²Himanaanote ayyaanna himanaanote hajajantanno.

³³Maganu keeru Maganooti ikkinnina luulu Magano di"ikkino. Keeraanote xaadiwa baala ikkannonte gede,

³⁴meentu beetekiristaannate sammi yoona. Seeru yaannonte gede, meentu hajajamanno gede ikkinnina coyi'rara difajjinoonni.

³⁵Afara hasi'ranno coyi hee'riro, mine galtensa xa'mona. Meyati beetekiristaanete giddo coyi'ra seerimalete.

³⁶Isi anfina, Maganu qaali ki'newiinni dayino? Woy ki'newa calla iillino?

³⁷«Ani himanaanchoho» woy, «Anera ayyaanaamu afanshi nooe» yaannohu hee'riro, tini borreessoommoti Mootichu hajajo ikkitinota afona.

³⁸Konne coye egenninokkihu, isinni diegenninoonniho.

³⁹Kunnira roduuwa'ya, himana coyi'rate lowo geeshsha diinaggaabbe. Haaru afiinni coyi'rano hooltinoonte.

⁴⁰Ikkollana baalunku coyi seerunninna amanyootunni ikkona.