Read Sidama_Qullaawa _Maxaafa UMI QORONTOOSI 15 Bible Online

UMI QORONTOOSI 15 - Sidama_Qullaawa _Maxaafa bible

UMI QORONTOOSI 15

¹Roduuwa'ya, ani kuloommo'neha, ki'ne adhitinihanna addaxxitiniha Dancha Duduwo qaagiisseemmo'ne.

²Kuloommo'neha Dancha Duduwo seekkitine cu'midhiniro, gattinanni. Hakkuyi ka'a kayinni ammana'ne haafaho.

³Ani adhoommoha qara coye ki'nera sayisoommo. Hakkuno qullaawa borro giddo Kiristoosi ninke cubbi daafira ree,

⁴waamame, qullaawa borro giddo yinoonninte gede sayikki barra reyotenni kaino.

⁵Pheexiroosira leellihu gedensaanni, tonaa lame rosaanosirano leellino.

⁶Hakkunni gedensaannino onte xibbe roortino rosaanora mitte hige leellino. Insa giddonni haammatu xaa geeshsha lubbotenni no. Mitu mitu kayinni reyitino.

⁷Hakkunni gedensaanni Yaiqoobira leellino; hakkiinni aanche soqqamaasine baalantera leellino.

⁸Wo'munkura gedensaanni barrimale ilamoommohura anerano leellinoe.

⁹Ani soqqamaasine duuchantera woriidiho. Maganu beetekiristaane qarrisanni hee'roommo daafira, soqqamaasincho ikke woshshamate di"ikkoommoho.

¹⁰Ikkollana Maganu eltonni xa noommo gedeeha ikkoommo. Uyinoe elto mullawa digattino. Insa baalunkunni roore daafure loosoommo. Ikkollana, konne duucha assitinoti, Maganu eltooti ikkinnina ane di"ikkoommo.

¹¹Anino insano kulleemmoti mitte sokkaati. Ki'ne ammantinoonnitino iseeti.

¹²Kiristoosi reyotenni kainota rosiinsanna, ki'ne giddonni mitu mitu, «Reyotenni ka"a dino» hiitto yitanno?

¹³Reyotenni ka"a nookkiha ikkiro, Kiristoosino reyotenni dikaino yaateyya.

¹⁴Kiristoosi reyotenni kainokkiha ikkiro, ninke kulleemmorinna ki'ne amma'na haafaho yaate.

¹⁵Qoleno Maganu, «Kiristoosi reyotenni kayisino» yine farci'neemmo coyira, Maganoho kaphu naqaashshe ikkineemmo yaate. Reyino manni ka"annokkiha ikkiro, Maganu Kiristoosino reyotenni dikayisino yaate.

¹⁶Reyino manni ka"annokkiha ikkiro, Kiristoosino dikaino yaate.

¹⁷Kiristoosi reyotenni kainokkiha ikkiro, ammana'ne haafaho yaate; xaa geeshsha cubbu giddo heedhinoonni yaate.

¹⁸Kiristoosi ammante heedhe reyitinori, ba'ino yaate.

¹⁹Kiristoosa hexxinoommohu tenne gobba heeshsho callate ikkiro, ninke wolu manni baalunkunni roore mararsineemmoreeti.

²⁰Ikkollana, Kiristoosi reyitinorira reyotenni ka"ate umiha ikke, halaalinta reyotenni kaino.

²¹Reyo dagginohu mittu manchi Addaami widoonni ikkitinonte gede, reyotenni ka"ano dagginohu mittu manchi Kiristoosi widoonniiti.

²²Addaaminni kainohunni mannu baalu reyannonte gede, Kiristoosi widoonni mannu baalu heeshsho afi'ranno.

²³Kuni ikkannohuno bado badosinniiti: Umiha ikke Kiristoosi ka"anno; isi daanno woyite isire ikkitinori ka'anno.

²⁴Kiristoosi roorroota, gashshaanonna wolqaataamma baala hune gashshoote Magano Annaho aanno yannara, goofimarcho ikkanno.

²⁵Maganu baarigaarrasi baala angasira qola geeshsha, Kiristoosi mooha hasiissanno.

²⁶Goofimarchoho ba"anno diini reyote.

²⁷Qullaawa borro, «Maganu baalankare angasira qolino» yaanno. «Baalunkuri angasira higino» yinanni woyite, baalankare angasira qolinoha Magano Anna dikarsanno.

²⁸Baalunkuri Kiristoosi angara higihu gedensaanni kayinni, Maganu wo'munkurira guuta ikkanno gede, Beettu qole, baalankare angasira qolisi Magani angara higanno.

²⁹Reyotenni ka"a nookkiha ikkiro, reyino manni daafira yite cuuantannori ma assitannoyya? Reyitinori horonta ka'annokkiha ikkiro, mannu insa daafira mayira cuuamannoyya?

³⁰Ninkeno wo'ma woyite qarraataame heeshsho hee'neemmohu mayiraatiyya?

³¹Roduuwa'ya, ane barru baala reyo agarte nooe. Konne coye kuleemmo'nehu, Mootichinke Yesuusi Kiristoosinni ki'ne addinta hawaqi'reemmo daafiraati.

³²Mannu hedo garinni, Efesooni moyichu ledo sharrama'ya ma leddinoe? Reyino manni ka"annokkiha ikkiro, «Ga'a reyineemmo daafira, into ango» yinannihu garaati!

³³So'rantinoonte! Bushu jaaloomi dancha amanyoote hunanno.

³⁴Wodana assidhe; cubbono loossinoonte. Ki'ne giddo mitu mitu Magano affinokkiri no. Konne yeemmohuno saalfachishammo'nera yeeti.

³⁵Mittu manchi, «Mannu reyotenni hiitto ikke ka"anno? Reyotenni ka"anno woyite hiittoo manninati hee'rannosi?» yee xa'ma dandaanno.

³⁶Ati gowwu! Wixi'ratto gidi reya hoogiro heeshsho afi'rannoni?

³⁷Qamade woy wole gide wixi'rittoro, gedensaanni wo'ma biso afidhino mu'ro ikkannohe.

³⁸Maganu kayinni hakko wixira hasi'rino biso aanno. Mittu mittunku wixira hasiisino biso aanno.

³⁹Maala afi'rino kalaqami baalu mittu daniha di"ikkino. Mannu mittu gari maala afi'rino. Saadate wolu garihu, ceate wolu garihu, qulxu'mehono wolu garihu noonsa.

⁴⁰Qoleno gordu widi bisinna baattote widi bisi no. Ikkollana gordu widi gaamaarre addite; baattote widi gaamaarre qolte addite.

⁴¹Arrishshote biinfilli addiho; aganu biinfillino addiho. Beeddahete biinfilli addiho; mitte beeddakko biinfilli woletewiinni baxxanno.

⁴²Reyotenni ka"anno mannitino tenne labbanno. Winxi bisi ba"annoho; reyotenni ka"annohu hee'rannoho.

⁴³Shollinyunni winxoonnihu ayirrinyunni ka"anno; wolqiweelo winxoonnihu wolqaataamo ikke ka"anno.

⁴⁴Kalaqamu biso winxeenna, ayyaanaamo biso uddi're ka"anno. Kalaqamu bisino no; ayyaanaamu bisino no.

⁴⁵Kunnira Maganu qaali, «Umi manchi Addaami lubbotenni hee'ranno kalaqama ikkino» yaanno. Gedensiidi Addaami kayinni heeshsho aanno Ayyaana ikkino.

⁴⁶Balaxe dayinohu kalaqamu biso uddi'rinoho ikkinnina ayyaanaamo di"ikkino. Ayyaanaamu dayinohu gedensaanniiti.

⁴⁷Umi Addaami baattote bushshinni kalaqamino; layinki Addaami gordunni dayinoho.

⁴⁸Baattote aaniri, baattote bushshinni kalaqaminoha labbanno; gordunniri gordunni dayinoha labbanno.

⁴⁹Baattote manchi dana uddi'nummonte gede, gordunnihu danano uddi'neemmo.

⁵⁰Roduuwa'ya, ani kuleemmo'neti, maalunna mundee Maganu Gashshoote diragidhanno. Reyannohu reyannokkiha diragi'ranno.

⁵¹Mitto go'le noo halaale kuleemmo'nena macciishshe: Ninke baalunku direyineemmo; goofimarchu xurumba ufuunfanni woyite, baalunku mitte hinge illete lipheessi giddo soorrammeemmo. Xurumba ufuunfanni woyite, reyitinori ba"annokki biso uddidhe ka'anno. Ninkeno soorrammeemmo.

⁵²

⁵³Ba"annohu ba"annokkiha uddi'ranno; reyannohu reyannokkiha uddi'ranno.

⁵⁴Ba"annohu ba"annokkiha uddi'ranno woyitenna reyannohu reyannokkiha uddi'ranno woyite, «Reyo qeelletenni egemmantu.

⁵⁵Tee reyo, qeellekki hiikko no? Tee reyo, gawajjattati wolqakki hiikko no?» yine borreessinoonni coyi wo'manno.

⁵⁶Reyote urde cubboho; cubbu wolqano seeraho.

⁵⁷Mootichinke Yesuusi Kiristoosi widoonni qeelle uyinonke Maganira galatu iillosi.

⁵⁸Kunnira ki'ne ayirradda roduuwa'ya, Mootichaho soqqantinanni daafurtinoonni daafuri mullawa gatannokkita affinoonnina, Mootichu looso wo'manka woyite agurtinikkinni kaajjitine loosate hixamanye!