Read Sidama_Qullaawa _Maxaafa UMI QORONTOOSI 16 Bible Online

UMI QORONTOOSI 16 - Sidama_Qullaawa _Maxaafa bible

UMI QORONTOOSI 16

¹Ammanaanote kaa'linanni woxe, Galatiyu ammanaanora kulummo garinni fushshe.

²Ani dayummohu gedensaanni fushshate kachaachammannikki gede, Sambatu Barra mittu mittunku noosi woxi aaninni afi'ri bikkinni kayise oona.

³Ani dayemmo woyite, doortinoonni manni gamba assinoonni woxe haa're Yerusaalame ha'ranno gede ani hirsiishshu borro eemmona.

⁴Ane ha'ra hasiissannota ikkituro, miilaambe ledo ha'neemmo.

⁵Meqedooniyu widoonni saeemmo daafira, hakkaanni hige ki'newa dayemmona.

⁶Ha'reemmowa baala doogote sinqe kaa'litinannie gede, wole agurranna konne hawado nafa daye ki'newa keeshshummokkinni digateemmo.

⁷Xa sa"anni muddame hee're keere haa'rammo'nera dibaxoommo. Mootichu yiiro, ki'ne ledo seeda yanna keeshshammora hedoommo.

⁸Phenxeqosxete Ayyaani geeshsha kayinni Efesooni keeshsheemmo.

⁹Gibbannori kiiro haammatturono, jawaata looso loosate doogo fa'nante nooe.

¹⁰Ximootewoosi anente gede Mootichu looso loosannoha ikkino daafira, dayiha ikkiro ruxxi yiikkinni ki'ne ledo hee'ranno gede asse.

¹¹Kunnira ayino mishoonkesi. Roduuwu ledo anewa galagale daanno gede agare noommona, doogote mitii'mannokki gede kaa'lesi.

¹²Rodiinke Aphiloosi wolu roduuwi ledo daye ki'ne la"anno gede lowo geeshsha huuccoommo. Isi kayinni xa daara horonta dihasi'rino. Kunni ka'a injiisiro daanno.

¹³Baqqi yitinoonnire ikke; ammanatenni uurre; jawaatte; kaajje.

¹⁴Baalanka coye baxillunni asse.

¹⁵Roduuwa'ya, Isxifaanoosi mini manni Akayu gobbara umi ammanaano ikkinotanna Maganu mannira soqqamate umonsa sayise uyinoha ikkinota affinoonni.

¹⁶Hattoo manniranna ledonsa daafurtannorira baalaho hajajantinanni gede qaagiisseemmo'ne.

¹⁷Ki'newa hooginore wonshitino daafira, Isxifaanoosi, Fardonaaxoosinna Akayiqoosi daanni hagiidhoommo.

¹⁸Insa anenna ki'ne wodana fooliishshiishshino. Togoo manna egenna hasiissanno.

¹⁹Issiyaho noo ammanaano, keere dhaantino'ne. Aqiilanna Phirisqillano minensa noo beetekiristaane ledo Mootichu su'minni lowo keere sokkino'ne.

²⁰Hakko noo ammanaano baala keere dhaantino'ne. Qullaawa sunqamanni mimmito keere haadhe.

²¹Konne keere, ani Phaawuloosi anga'yanni borreessoommo'ne.

²²Mooticha baxannokkihu hee'riro, rumaminoha ikko. Maaranaata - Mootichanke rakke amo!

²³Mootichinke Yesuusi elto ki'ne ledo heedho.

²⁴Baxilli'ya, Yesuusi Kiristoosinni ki'ne baalunku ledo hee'ro. Hamii'ni!