Read Sidama_Qullaawa _Maxaafa UMI QORONTOOSI 2 Bible Online

UMI QORONTOOSI 2 - Sidama_Qullaawa _Maxaafa bible

UMI QORONTOOSI 2

¹Roduuwa'ya, ani Maganu halaale[1] kulammo'nera ki'newa dayummo yannara, hayyotenninna busulletenni dishiqoommo.

²Ledo'ne noommo yannara, sutaminoha Yesuusa Kiristoosa agurranna wodani'yara wolere wodheemmokki gede murci'roommo.

³Ani ki'newa dayummo yannara, wolqiweellenna waajjillu qoleno lowo masilli amadeennae noommo.

⁴Sokka'yanna kuloommo qaali, Maganu Ayyaani wolqa leellishshinoeho ikkinnina busulsi're mannu hayyonni coyi'reemmoha di"ikkino.

⁵Hatto ikkinohuno, ammana'ne mannu egenno aana ikkikkinni, Maganu wolqa aana xintantinota ikkitanno gedeeti.

⁶Ayyaanaame heeshshonni lophitinorira egennote qaale kulleemmo. Kulleemmo qaali kayinni tenne gobba egenno woy gedensaanni ba'annoriha tenne gobba gashshaano egenno di"ikkino.

⁷Ninke kayinni, bi're balaxe ayirrinyinkera qixxeessinota go'lite keeshshitinota Maganu halaali egenno kulleemmo.

⁸Tenne gobba gashshaano mittuno tenne egenno diaffino. Affinoha ikkoommero, ayirrinyu Mooticha disuttino.

⁹Ikkollana, «Ille la'inokkiha, macca macciishshitinokkiha, mannu wodani hedinokkiha, Maganu baxxannosirira qixxeessino» yine borreessinoonni.

¹⁰Maganu go'lino coye Ayyaanisinni leellishinonke. Ayyaanu, Maganu giddo noori baalu gatikkinni qonqolche afanno.

¹¹Manchu giddo noo hedo, giddosi noo ayyaana agurranna afannohu ayino dino. Maganu Ayyaana agurranna Maganu hedono afannohu dino.

¹²Maganu uyinonke coye baala anfeemmo gede, adhinoommohu Maganu Ayyaanaati ikkinnina tenne gobbaha di"ikkino.

¹³Ayyaanaamo coye ayyaanaamu mannira rosiinseemmohu, mannu egennonni ikkikkinni Maganu Ayyaaninni afi'noommo egennonniiti.

¹⁴Ayyaana afi'rinokki manchi kayinni, tenne gowwimmate kiiranno daafira Maganu Ayyaani aanno elto adha didandaanno. Maganu Ayyaaninni xiinxallinanni coye ikkino daafira, buuxa didandaanno.

¹⁵Ayyaanaamu manchi baalanka coye Ayyaanunni xiinxalle la"anno. Iso kayinni ayino xiinxalle lae diafanno.

¹⁶Qullaawa borro yitannonte gede, «Mootichu hedo afannohu nooni? Mala aasira dandaannohuno ayeti?» Ninkera kayinni Kiristoosi wodani noonke.