Read Sidama_Qullaawa _Maxaafa UMI QORONTOOSI 3 Bible Online

UMI QORONTOOSI 3 - Sidama_Qullaawa _Maxaafa bible

UMI QORONTOOSI 3

¹Roduuwa'ya, Kiristoosi coyira qaaqqimma amaddino'nehura, maalu mannira kullannire ikkinnina, ayyaanaamu mannira kullannire kulammo'nera didandoommo.

²Kaajjado sagale ittine affinannikkihura, ado haqaaqoommo'ne ikkinnina kaajjado sagale dioommo'ne. Xaano kaajjado sagale ita didandiitinoonni.

³Xaa geeshsha ki'ne maalu mannaati. Mimmito'ne hinaassinannihunna mimmiti'ne ledo moromantinannihu, dimaalu manna ikkitinoonnihuraati? Ikkito'ne mullichu mannita di"ikkitino?

⁴Mitu mitu, «Ani Phaawuloosiho», wolootu qoltine, «Ani Aphiloosiho» yitinanni. Hatto yaa'ne, ki'ne mullicho maalu manna diassitanno'ne?

⁵Ikkina, Aphiloosi maati? Phaawuloosino maati? Insa ki'ne ammantinanni gede assitino soqqamaanootilla. Mittu mittunku Maganu uyinonsa garinnilla soqqantanno.

⁶Ani kaasummo; Aphiloosi waa hayikkisi. Lossinohu kayinni Maganoho.

⁷Kunnira, loosoho umo ikkinohu, kaansoonnire lossi Maganooti ikkinnina, kaasihuno waa hayikkisihuno ku'lannori dino.

⁸Kaasihunna waa hayikkisihu lamunku mittoholla. Mittu mittunku loosisi garinni daafurisi guma adhanno.

⁹Ninke Maganu ledo loonseemmoreeti; ki'neno Maganu ho'richootinna Maganu mineeti.

¹⁰Maganu uyinoe elto garinni anino ogeessu manchi gede safo safummo. Wolu ani safoommo safo aana minanno. Mittu mittunku hiitto asse minannoro xunse afo!

¹¹Sanfoonniha agurranna ayino wole safo safa didandaanno. Hatti safono Yesuusa Kiristoosaati.

¹²Hatte safo aana ayino culkunni woy birrunni woy dilqu kinchinni woy haqqetenni woy hayissotenni woy agadunni miniro,

¹³mittu mittunku loosi yoote barra xawo fulanno. Hakko barra giira fonqoltanno daafira, mittu mittunku loosi reqecci yaanno.

¹⁴Ayerano safote aana assi'rinori giiramisikkinni saisiro, daafurisi guma adhanno.

¹⁵Giiramisiro kayinni mulla anganni gatanno; isi umisi gatanno; gatasi kayinni giirate giddonni xooqe fulino manchi gedeete.

¹⁶Ki'ne Maganunniha Qullaawa Mine ikkitinoonnitanna Maganu Ayyaani giddo'ne galannota diegentinoonni?

¹⁷Maganu mine diigannoha, Maganu diiganno. Maganu Mini Qullaawaho; hakku Qullaawu Minino ki'neeti.

¹⁸Ayino umosi dogoonke. Ayino tenne gobbara egennaamo ikkinoha lawisiro, egennaamo ikkate gowwa ikko.

¹⁹Tenne gobba egenno Maganu albaanni gowwimmate. Hakkuno, «Maganu hayyoole, xagarronsanni amadanno» yine borreessinoonni gedeeti.

²⁰Qoleno, «Mootichu egennaamu hedo, kapho ikkitinota afino» yine borreessinoonni.

²¹Kunnira, ayino manna adawadhoonke. Baalunkuri ki'neho.

²²Phaawuloosino, Aphiloosino, Pheexiroosino, tenne gobba heeshshono, reyono, xa noohuno, kunni ka'a daara noohano ikkiro, baalunku ki'neho.

²³Ki'ne Kiristoosireeti; Kiristoosino Maganunniho.