Read Sidama_Qullaawa _Maxaafa UMI QORONTOOSI 4 Bible Online

UMI QORONTOOSI 4 - Sidama_Qullaawa _Maxaafa bible

UMI QORONTOOSI 4

¹Mannu ninke Kiristoosi soqqamaanonna go'le nooha Maganu coye mannaho xawinse kulleemmore asse hedankera hasiisanno.

²Hatto ikkiro, Maganu Mini soqqanshora hendoonniri ammanantinore ikka hasiisannonsa.

³Ki'newano ikko wolewa ane aana yoo yiniro, anera mitiimma dinoe. Ani umi'ya aana yoo diyeemmo.

⁴Anera giddo'ya keeraanchote; hatti kayinni ane fayyaaleessa diassitannoe. Ane aana yoo yaa dandaannohu Mooticha Yesuusaati.

⁵Kunnira, Mootichu Yesuusi yoo yaara daa geeshsha, aye aanano yoo yitinoonte. Isi daanno woyite, tunsote go'le noore haa're xawo fushshanno; mannu wodani giddo nooreno reqecci assanno. Hakka waro, Maganu baalanka gari garisinni jajanno.

⁶Roduuwa'ya, ki'ne kaa'lammora yee aneneenna Aphiloosi lawishsha asse shiqishoommo. Hatto assoommohuno, «Borreessine worroonnihunni sa'ooti» yinoonni coye ninkewiinni rossinara yeeti. Kunnira, mito minshe mito adawadha dihasiissanno.

⁷Ati wolu mannira aliidiha assinohehu ayeti? Noohere baala uyinohehu Magano di"ikkino? Uyinoonnisikkihu gede ikkite umokki mayira bokkeessattoyya?

⁸Xaa woyite hasiisino'nere baala afidhinoonni! Ninke agurtine ki'ne calluwi'ne mookkinoonni; ninkeno ledo amaddine mookkinoommero danchu baino.

⁹Maganu ninke soqqamaasine reyote yoo yinoonni mannira aanche uurrisinonkeha lawannoe. Kalqe baala, sokkaasinenna mannu duuchu daa"atannonke gede assinonke.

¹⁰Ninke Kiristoosira yine gowwinoommo. Ki'ne kayinni Kiristoosinni busulootaho. Ninke wolqiweelootaho; ki'ne kayinni wolqaataammaho. Ki'ne ayirrinsoonnireeti; ninke kayinni minshoonnireeti.

¹¹Kune xaa geeshsha hudi'nanninna goo'riinanni hee'noommo; kalline hee'noommo; gannoonninke; hingeemmowa hoongoommo.

¹²Angankenni daafurre loosi'neemmo. Rummanninke woyite, maassi'neemmo; xiimbanninke woyite, cincineemmo.

¹³Xonnanninke woyite, owaatu qaalinni coyi'neemmo. Xaa geeshsha tenne gobbara ishinu gede kiirammoommo; tunge hunnannirichi gede ikkinoommo.

¹⁴Tenne sokka borreessoommo'nehu, saalfachishammo'nera ikkikkinni, ooso'ya baxeemmote gede asse seejjammo'nera hasi'reeti.

¹⁵Yesuusinni lossitanno'neri tonnu kumi manni hee'ri'nerono, lowo annuwa dino'ne. Ani kayinni Danchu Duduwi Kiristoosi Yesuusihunni anna ikkoommo'ne.

¹⁶Kunnira, ane labbinanni gede huucci'reemmo'ne.

¹⁷Baxeemmohanna Mootichaho ammanaminoha beetto'ya Ximootewoosi soommo'nehu kunniraati. Wo'mankawa beetekiristaane baalate rosiisoommo coyi ledo xaaddannota Kiristoosi Yesuusinni hee'roommo heeshsho qaagiissanno'ne.

¹⁸Mitu mitu ki'newa dayemmokkiha laweenna'ne boo'natenni ufuufantinoonni.

¹⁹Ikkollana, Mootichu yiiro rahe ki'newa dayemmo. Hakka woyite, hatte boonaleeyye coyidhanno coye calla ikkikkinni, wolqansano afeemmo.

²⁰Maganu Gashshooti diafuunniitina, Maganu wolqanniiti.

²¹Maricho doodhitinanni? Gannanni siqqichonni dayo'nenso, baxillunninna shaqqillunni dayo'ne?