Read Sidama_Qullaawa _Maxaafa UMI QORONTOOSI 6 Bible Online

UMI QORONTOOSI 6 - Sidama_Qullaawa _Maxaafa bible

UMI QORONTOOSI 6

¹Ki'ne giddo wolu ammanaasinchi ledo giwaminohu, coyesi ammanaasinete ku'la agure, Magano afinokki manniwa mayira ha'ranno?

²Maganu manni tenne gobba aana yoo yaannoha ikkinota diaffinoonni? Tenne gobba aana yoo yitinannire ikkitinina, konne shiima coye hoogginanniyya?

³Sokkaasinete aana yoo yineemmore ikkinoommota diaffinoonni? Tenne gobba aani coyira hiitto roorsine yoo yaa hoongeemmo?

⁴Hattoo coyi hee'ranno woyite, ammana jawaatinokki manna yoote wodhessiyya!

⁵Konne coye coyi'ranni noommohu saalfachishammo'nera yeeti. Halaalinta ki'ne mereero giwantino roduuwa araarsa dandaanno hayyichi mittuno dinoni?

⁶Mittu ammanaanchi wolu ammanaanchi ledo giwame yoote ammantinokkiri albira maranno?

⁷Mimmiti'ne ledo giwantine coyi'rama umise giddo'ne noo xe'o leellishshanno. Hatteentenni ki'ne shollitiniro diwoyyanno? Ki'ne xagarantiniro diwoyyanno?

⁸Roorenka ki'ne ammantino roduuwa'ne xagartinanni; insa aana sao assitinanni.

⁹Haxawarrootu Maganu Gashshoote e'annokkita diaffinoonni? Sodhinoonte! Saalimalootu woy kaphu maganna magansidhannori woy foortannori woy labbaahu ledo akkimaltannori woy

¹⁰mooraano woy hafuuraammu woy dimbaasine woy mannu su'ma huntannori woy mulqidhannori Maganu Gashshoote diragidhanno.

¹¹Kunni albaanni ki'ne giddonni mitu mitu hattooreeti. Ikkollana, Mootichinke Yesuusi Kiristoosi su'minni Anninke Maganu Ayyaaninni hayishshidhinoonni; qullaawoota ikkitinoonni; keeraa'mitinoonni.

¹²Baalankare fajjinoonnie; baalunkuri kayinni kaa'lannoha di"ikkino. Baalankare fajjinoonnie; ikkirono, ani mitturirano borojjicho di"ikkeemmo.

¹³Sagale godowunnite; godowuno sagalenniho. Maganu kayinni sagaleno godowano hunanno. Mannimma Mootichunnite ikkinnina, foorrennita di"ikkitino; Mootichuno mannimmanniho.

¹⁴Maganu wolqasinni Mooticha reyotenni kayisinte gede, ninkeno kayisannonke.

¹⁵Mannimma'ne Kiristoosi biso ikkitinota diaffinoonni? Kiristoosi biso masse foorrenniha assoyya? Di"ikkanno.

¹⁶Woy foorate ledo namoominohu ise ledo mittu bisiha ikkannota diaffinoonni? «Lamunku mitto biso ikkitanno» yine borreessinoonni.

¹⁷Mootichu ledo mittimma afi'rinohu kayinni Ayyaanunni isi ledo mitto ikkanno.

¹⁸Foorretewiinni xooqqe! Mannu loosannohu wolu cubbi mannimmasi dikisanno. Foorannohu kayinni, cubbo manninatisi giddo loosanno.

¹⁹Mannimma'ne giddo'ne hee'rannohunnita Qullaawu Ayyaanita ikkitinota diaffinoonni? Konne Ayyaanano Maganuwiinni adhitinoonni. Ki'ne umi'nere di"ikkitinoonni.

²⁰Waagunni hidhinoonni'nereeti; kunnira mannimma'nenni Magano ayirrisse.