Read Sidama_Qullaawa _Maxaafa UMI QORONTOOSI 7 Bible Online

UMI QORONTOOSI 7 - Sidama_Qullaawa _Maxaafa bible

UMI QORONTOOSI 7

¹Adhamate daafira borreessitine xa'mitinoonnie xa'mo garinni, woleteemmero meyata adha hooga danchate.

²Ikkollana adhama hooga foorre abbitannota ikkitinohura, mittu mittunkura umisi galte heedhusiro danchaho. Mitte mittenterano umise minaanni hee'risero danchaho.

³Minaanni galtesira hasiisannore baala wonshose; iseno minaannisera hasiisannore baala wonshito.

⁴Minaama manninati minaannisera gutoho ikkinnina, iseha calla di"ikkino. Minaanni manninatino minaamasira gutoho ikkinnina, isiha calla di"ikkino.

⁵Huuccatto assi'rate yitine ma'litinoonni yannara agurranna, wole woyite mimmiti'nera qakkinoonte. Tenne yortonni umo'ne qee'la hooggineenna Sheexaanu jifanno'nekki gede galagaltine mitteenni heedhe.

⁶Konne coye malu gede asse kulanni noommo'ne ikkinnina hajajo di"ikkitino.

⁷Mannu baalu galte adha agure ane gede ikke hee'roommero baxeemmo; ikkollana Maganu mittu mittunkura addi addi elto uyino; mitoho mittu gariti, woleho wolu gari elto noosi.

⁸Adhitinokkiriranna galte shiidhinorira kuleemmona, insano anente gede adhitukkinni heedhoommero danchaho.

⁹Ikkollana yortotenni giiramantenni adha woyyitanno. Umonsa qee'la hoogguro, adhitona.

¹⁰«Minaama minaanniwiinni baxxitoonke. Baxxituro kayinni, mine assidhukkinni ofolto;

¹¹woy minaannise ledo araaranto. Minaannino minaamasi fushshe ha'risoonke» yee galte afi'rino manna hajajeemmo. Tini hajajo Mootichunnite ikkinnina, aneta di"ikkitino.

¹²Wolootaho yeemmoti, (Ane ikkummokkinni Mootichu): Mittu ammanaanchira ammantinokki galte heedhusiro, iseno ledosi hee'ra baxxuro, fushshe ha'risoonkese.

¹³Ammanaanchote ammaninokki minaanni hee'risero, isi ledose hee'ra baxiro, iseno iso agurtoonke.

¹⁴Ammaninokki minaanni ammantino minaamanni keeraa'manno. Ammantinokki minaamano ammanino minaanninni keeraa'mitanno. Hakkunni ka'a ooso'ne battaabbinoreeti; xa kayinni keeraa'mitanno.

¹⁵Ammaninokkihu, baxxa hasi'riro kayinni baxxona. Ammantinori labbaahano ikko meyati, kunni coyinni diusurantanno. Maganu woshshinonkehu keere hee'nammoraati.

¹⁶Ati ammanoottati, ammaninokkiha minaannakki gatisattata mayinni afatta? Ati ammanoottohu, ammantinokkita minaamakki gatisattota mayinni afatto?

¹⁷Mittu mittunku Maganu yiinosi garinninna woshshinosi garinni hee'rona. Beetekiristaanna baalate kuleemmo wodho tenneeti.

¹⁸Ayino barcime hee're ammaninoha ikkiro, barciminokkihu gede ikkoonke. Barcimikkinni ammaninohu, barcimate qarramoonke.

¹⁹Barcimano barcima hoogano leddannori dino. Qaru coyi Maganu hajajo wonshate.

²⁰Kunnira, mittu mittunku ammani yannara noo garinni hee'ro.

²¹Borojjimmatenni heedhe ammanoottoro, hattennera qarrantooti. Borojjimmatenni fula dandaattoha ikkiro fuli.

²²Borojjimmatenni hee're Mooticha ammaninohu, Mootichunni wodaminoho; borojjimma galinokkihu hee'rirono, hakku Kiristoosi borojjichooti.

²³Ki'ne waagunni hirroonnireeti; kunnira, mannu borojje ikkitinoonte.

²⁴Roduuwa'ya, mittu mittunku Maganu ledo, woshshamino garinni hee'ro.

²⁵Adhantinokkiri daafira Mootichuwiinni adhoommo hajajo dinoe. Ikkirono, Mootichu maaronni addaxxinanniha ikkoommo daafira, hedoommore coyi'reemmo.

²⁶Xa noo qarrinni kainohunni, mannu noo garinni hee'riro woyya lawannoe.

²⁷Galte adhoottoha ikkiro, fushshite ha'rissooti. Adhoottokkiha ikkittoro, adhattora hasidhooti.

²⁸Adhittoro kayinni cubbo di"ikkino. Seemo beetto mine assi'ra cubbo di"ikkitino. Ikkollana, adhantannore lowo qarri amadannonsa; ane halchono kunni qarrinni gattinanni gedeeti.

²⁹Roduuwa'ya, hatto yeemmo woyite, xa gatte noo yanna haranchote. Kunni ka'a, adhite noori adhitinokkiri gede ikkite heedho.

³⁰Wi'litannori wi'litannokkiri gede, hagiidhitannori hagiidhitannokkiri gede ikkite heedho.

³¹Tenne gobba qiniite afidhinori, noonsari nookkihu gede assite kiirtona; xa noohu tenne gobba dani sa"annoho.

³²Ani baxeemmohu dadillitinikkinni heedhinaraati. Adhinokkihu Mooticha hagiirsiisate, Mootichu coye hedanno.

³³Adhinohu kayinni wodanisi lamewa beehamino daafira, galtesi hagiirsiisate tenne gobba coye hedanno.

³⁴Kunni garinni wodanisi lamewa beehamino; adhantinokkitinna seemo beetto maalasenna lubbose keereensidhe Mootichu coyira diinaggaabbanno. Adhantinoti kayinni galtese hagiirsiisate yite tenne gobba coye heddanno.

³⁵Tenne yeemmohu, Qarrisammo'nera ikkikkinni, ki'nera injaa'nera yeeti. Hedo'ne billaallitukkinni wo'mu wodaninni Mootichaho aamanantinara yee ikkinnina, millo ho'lammo'nera di"ikkino.

³⁶Mittu manchi huucci'rino seemo amanyootunni amada hoogironna iseno yanna xiibbanni noo daafira adhara hasi'riro, hedinore assona; cubbo di"ikkannona adhanto.

³⁷Wodanisi daaqikkinni kaajje, isonoo geisi're, seemo beetto adha hoogate hedo heedhusiro kayinni, danchaho.

³⁸Kunnira seemo beetto adhannohu dancha coye assino; adha hooginohuno roore dancha assino.

³⁹Meyati minaannise lubbotenni noo geeshsha usurantinote. Minaannise reyiro kayinni ammaninohalla ikkiro, baxxinohura assi'ra dandiitanno.

⁴⁰Ane hedo gede ikkiro, adhantukkinni heedhoommero roore hagiirraame ikkitanno. Anerano Maganu Ayyaani ledo'ya nooha lawannoe.