Read Sidama_Qullaawa _Maxaafa UMI QORONTOOSI 9 Bible Online

UMI QORONTOOSI 9 - Sidama_Qullaawa _Maxaafa bible

UMI QORONTOOSI 9

¹Ani borojjimmatenni fuloommoha di"ikkoommo? Ani Maganu soqqamaasincho di"ikkoommo? Mooticha Yesuusi Kiristoosa ille'yanni diafoommo? Ki'neno Mootichunni loosi'ya guma di"ikkitinoonni?

²Anera ki'ne Mootichunni soqqamaasinchimma'ya gumaati. Soqqamaasinchimma'ya wolootuno adha hoogguro, ani kayinni ki'nera soqqamaasinchoho.

³Bushiishshannoerira dawareemmoti tenneeti:

⁴Itanna aga ninkera dihasiissannote?

⁵Wolootu Mootichu soqqamaasine gede, Mootichu roduuwinna Pheexiroosiuu gede, galtenke anga adhine ha'ra didandineemmo?

⁶Woy loosi'ra hasiissannonkeri aneetinna Barinabaasiitillani?

⁷Umisi woxinni olanto ikke soqqamannohu nooni? Woy laalanno haqqa kaasi're laalosi itannokkihu ayeti? Woy saada ce"e ado qaamannokkihu ayeti?

⁸Konne coye mannu egennino daafira calla yaanni noommo? Seeruno hatto diyaanno?

⁹Muse Seerira, «Gide gananno hando afoo usurtooti!» yine borreessinoonni. Hatto yinanni woyite, Maganu handoho qarrame coyi'rino yaateni?

¹⁰Konne coye yiinohu dininkeraati? Loosannohu hagiidhanni loosanno gede, gide ganannohuno hagiidhanni gananno gede, konne coye addinta ninkera borreessinoonni.

¹¹Ninke ki'ne giddo ayyaanu wixa wixi'ne, ki'newiinni uullate laalcho adha loworeetini?

¹²Wolu ki'newiinni konne coye agadhannoha ikkiro, ninke hiitto ikkine hakkiinni roore adha hoongeemmo? Ninke kayinni Kiristoosihu Danchu Duduwira guficho ikkineemmokki gede qorophine, baalanta cincine sa'noommo ikkinnina, hasiisinonkere mittoreno diadhinoommo.

¹³Qullaawa Mine soqqantannori ittannore hakkiinni adhitannotanna kakkalote darga soqqantannori, ittannore hakkiinni beeqqitannota diaffinoonni?

¹⁴Dancha Duduwo kultannorino sagalensa kunni loosinni afidhannota Mootichu Yesuusi kulino.

¹⁵Ani kayinni konne malinoere baala diadhoommo. «Kuni coyi mayira gatie?» yee borreessoommoha di"ikkino. Tenne ku'la'ya haafare asse kiirannohu hee'riro reya woyyitannoe.

¹⁶Dancha Duduwo kula gidde'ya ikkitinohura, naaxxeemmori dino. Dancha Duduwo kula hoogummoro anera bayisibao!

¹⁷Dancha Duduwo gadadinsiekkinni kulummoro, ba'raa'ra agadheemmo. Gadadinseennae kuleemmoha ikkiro kayinni, yinoonni wogalla wonshanni noommo yaate.

¹⁸Hatto ikkiro daafuri'ya gumi maatiyya? Dancha Duduwo kuleemmo woyite, hasiisannoere adhummokkinni calla kulate.

¹⁹Ani ayerano borojjicho di"ikkoommo; ikkollana danduummo deerrinni lowo manna gatisatenna kaa'late yee lowo manni borojjicho ikkoommo.

²⁰Ayihudootu ledo hee'rummoro, insa gatisate yee insa gede ikkeemmo. Muse Seerira woroonni galoommoha ikka hoogummorono, Muse Seerira woroonni galtinore gatisate insa gedeeha ikkoommo.

²¹Maganu Seerinni galoommohanna Kiristoosi Seerira woroonni noommoha ikkummorono, Seeru nookki daga gatisammora yee insa gedeeha ikkoommo.

²²Ammana shaqqitinore gatisammora yee insa gedeeha ikkoommo. Danduummo deerrinni mito mito gatisammora yee, baalunku mannira baalankare ikkoommo.

²³Konne baala assoommohu, Danchu Duduwi maasso beeqqate, Danchu Duduwi daafira yeeti.

²⁴Qolchanshote worroonnihu baalunku dodannota, hakkuri giddonni kayinni mittu callu ba'raa'ra adhannota diegentinoonni? Ki'neno adhitinanni gede ikkitine dodde!

²⁵Qolchamannohu baalu balaxe mannimmasi daafurse qajeelanno. Insa daafurtannohu, ba'anno ba'latto adhateeti; ninke kayinni ba'annokkita hegere ba'latto adhateeti.

²⁶Kunnira, hedo nookkihu gede ikke mulla haafa didodeemmo. Diilallo gananno manchi gede mulla haafa disharrameemmo.

²⁷Wolu mannira kule kae, ani fundule gateemmokki gede, manninate'ya gadadisanni miirannoe gede asseemmo.