Read Sidama_Qullaawa _Maxaafa LAYINKI QORONTOOSI 1 Bible Online

LAYINKI QORONTOOSI 1 - Sidama_Qullaawa _Maxaafa bible

LAYINKI QORONTOOSI 1

¹Maganu yiino garinni Yesuusi Kiristoosi soqqamaasincho ikkinohu Phaawuloosinna rodiinke Ximootewoosi Akayu gobbara heedhanno ammanaano baalate ledo Qorontoosi heedhannotera Maganu beetekiristaanera.

²Maganu Anninketinna Mootichu Yesuusi Kiristoosi eltonna keeru ki'ne ledo hee'ro.

³Maarote Anni, jawaante baalate Magani, Mootichinke Yesuusi Kiristoosi Anni Kaaliiqi galatamo.

⁴Isi qarrinke baalu giddo jawaachishannonke daafira, ninkeno Maganuwiinni afi'noommo jawaantenni, qarru baalu giddo noore jawaachisha dandiineemmo.

⁵Kiristoosi qarra batinse adhineemmonte gede, jawaanteno Kiristoosi widoonni hala'litannonke.

⁶Ninke qarrammeemmo woyite, ki'ne jawaantenna gato afidhinanni. Ninke jawaanteemmo woyite, ki'neno ninkera iillanno qarri amadeenna'ne cincitine jawaattinanni.

⁷Qarranke gutantinanninte gede jawaantenkeno beeqqitinannita egenninoommo daafira, ki'nera noonke hexxo jawaatate.

⁸Roduuwa'ya, Issiyu gobbara hee'noommo yannara amadinonke qarri hiittoohoro affinara hasi'neemmo. Amadinonke qarri wolqankera aliidiha ikkino daafira, lubbotenni hee'rate hexxo nafa ba'inonke.

⁹Wodaninkenni hendeemmo woyite, reyote yoo yinoonninkeha lawinonke. Kuni coyi ikkinohu, ninke wolqa ikkitukkinni reyitinore kayisannohu Magano ikkinota buunxeemmo gedeeti.

¹⁰Isi reyo abbanno qarriwiinni gatisinonke; albillitteno gatisannonke gede iso hexxineemmo.

¹¹Ninke lowo huuccattonni Maganu elto afi'neenna lowo manni Magano galatanno gede, ki'ne ninkera Magano huucca hasiissanno'ne.

¹²Ninke adawadhineemmo coyi konneeti: Kuni coyi halaale ikkinota tii"inke kulannonke. Wolu manninna roorsineno ki'ne ledo noonke xaadi, Maganuwiinni afi'noommo qullaambenna sumbete aana xintaminoho. Kuni ikkinohu, Maganu eltonniiti ikkinnina mannu egennonni di"ikkino.

¹³Nabbabanna buuxa dandiitinanniha ikkinnina wole coye diborreessineemmo'ne. Gudissine buuxxinanni gedeno afoommo.

¹⁴Xa ninkere gamarella affinoonni. Gedensaanni kayinni buuxxinanni. Mootichinke Yesuusi Kiristoosi daanno Barra ninke ki'nenni naaxxineemmonte gede, ki'neno ninkenni naaxxitinanni.

¹⁵Konne coye buuxoommo daafira, ki'nera lame hige tola ikkanno'ne gede balaxe towatammo'nera hedoommo.

¹⁶Meqedooniya ha'ranninna hakkiinnino higanni ki'ne widoonni hige daye Yihuda ha'reemmo woyite, doogote ikkannore kaa'litinaera hedoommo.

¹⁷Tenne heda'yanni, lame arrawo coyi'rummoha lawi'neni? Mitte hige, «Ee woy dee'ni» yee lame arrawo coyi'ranni tenne gobba manni gede ikkoommoha lawi'neni?

¹⁸Maganu ammanaminoha ikkino daafira, ninke ki'nera coyi'neemmorino «Ee woy dee'ni» yinanniha di"ikkino.

¹⁹Ani, Silaasinna Ximootewoosi mereero'ne kullummohu Maganu Beetti Yesuusi Kiristoosi wo'manka woyite, «Ee» yinanniho ikkinnina, «Ee woy dee'ni» yinanniha di"ikkino.

²⁰Maganu uyinonke hexxo baala «Ee» yaamantannohu Kiristoosinniiti. Maganu ayirrinyira Kiristoosi widoonni qolle, «Hamii'ni» yineemmohu kunniraati.

²¹Ki'neno ninkeno Kiristoosinni kaajjine hee'neemmo gede assinonkehunna soqqanshote doorinonkehu Maganoho.

²²Qoleno isire ikkankera sumudinonkehunna Qullaawa Ayyaana taje asse wodaninkera worinohu isooti.

²³Galagale Qorontoosi Katama daa hoogoommohu ki'ne qarrisa giweeti. Kunni coyira Maganu naqaashshe'yaati.

²⁴Kaajjitine uurritinoonnihu ammanatenni ikkinohura, hagiidhitinanni gede ledo'ne loonseemmo ikkinnina ammana'ne aana duha dilendeemmo'ne.