Read Sidama_Qullaawa _Maxaafa LAYINKI QORONTOOSI 11 Bible Online

LAYINKI QORONTOOSI 11 - Sidama_Qullaawa _Maxaafa bible

LAYINKI QORONTOOSI 11

¹Shiima gowwimma'ya cincitinannie yee hexxeemmo. Eeggatena cince"e!

²Mitte seemo beetto seemimmasenni adhannohura huuccinanninte gede, anino ki'ne Kiristoosira huuccoommo'ne daafira, ki'nera ayyaanaame laala nooe.

³Hamashshu Heewani xagare so'risiisinte gede, miteekkite ki'ne hedono ba'eenna Kiristoosira noo'neta taalonna xalala ammanama'ne agurtinanni yee waajjeemmo.

⁴Mittu manchi ki'newa daye, ninke kulloommo'neha agure wole Yesuusa kuli'nero, woy adhitinoonni Ayyaana agurtine wole adhitiniro, woy adhitinoonniha Dancha Duduwo agurtine wole adhitiniro, sammi yitine qeelantinoonni yaate.

⁵Ani kayinni hakkuri bayirraaddu soqqamaasinenni mitturinnino xeoommoha dilawannoe.

⁶Coyi hayyora fullahoommoha ikka hoogummoro nafa, egenno dixe'inoe. Konne coye batinye hinge addi addi doogonni xawinse kulloommo'ne.

⁷Ani Maganunniha Dancha Duduwo woxe baantiekkinni calla kula'yanna ki'ne gotti assate anenee shollisha'ya miteekkite cubbu gede kiirantue ikka?

⁸Ki'nera soqqamammora yee wole beetekiristaannawiinni kaa'lo adhanni insa buujjoommo.

⁹Ki'ne ledo hee'reenna qarru iillie yannara Meqedooniyunni daggino roduuwi hasiisannoere baala uyitinoe daafira ayerano duha di"ikkoommo. Xaa geeshsha ki'nerano mitturinnino duha di"ikkoommo'ne. Albillitteno duha di"ikkeemmo'ne.

¹⁰Kiristoosi halaali ane giddo noo daafira, adawadheemmokki gede assannoehu Akayaho ayino dino.

¹¹Hatto yeemmohu baxeemmo'nekkihuraatini? Baxeemmo'neta Maganunku afino.

¹²Hakkuri wolootu soqqamaasine, «Ninkeno insa gede loonseemmo» yitanni adawadhitannori coye hunate xa asseemmore albillitteno asseemmo.

¹³Hattoo manni Kiristoosi soqqamaasine lawate insanaa soorritannoreeti; kaphaasine soqqamaasineetinna awaawuraasine loosaasineeti.

¹⁴Kuni maala'linanni coye di"ikkino; Sheexaanu nafa xawaabbu sokkaasincho lawate isonoo soorranno.

¹⁵Sheexaanu soqqamaanono keeraanchimmate soqqamaano labbara insanaa soorrituro maala'linannire diafi'rino; goofimarchoho loosinsata mixxitanno.

¹⁶«Ayerano ani gowwoommoha lawoonkesi» yee lede coyi'reemmo. Gowwa lawummo'nero nafa shiima geeshsha naaxxeemmo gede gowwu gede assitine kiirre"e.

¹⁷Togo ikke naaxxe coyi'reemmo woyite, coyi'ranni noommohu Mootichu hedo garinni ikkikkinni gowwu gede ikkeeti.

¹⁸Lowo manni maalu coyinni naaxxanno daafira anino naaxxeemmo.

¹⁹Ki'ne wodanaamma ikkitinoonnihura gowwoota hagiirrunni dandiitinanninsa.

²⁰Hattonni ayino borojje assi'ri'nero, ayino miici'nero, ayino mogi'nero, ayino malxifati'nero, ayino baqqaalla qawaadi'nero cincitinanni.

²¹Saalsiisanno coye ikkiro nafa, konne coye assate wolqa afi'noommokkita egensiiseemmo'ne. Ayino mittu coyinni adawadhannoha ikkiro kayinni anino adawadheemmo; togo yeemmohu xaano gowwu gede ikkeeti.

²²Insa Ibiraawootahoni? Anino Ibiraawichaho. Insa Israeelootahoni? Anino Israeelichaho. Insa Abirihaami sirchootini? Anino Abirihaami sirchooti.

²³Insa Kiristoosi soqqamaasineeti? Ani insanni roore Kiristoosi soqqamaasinchooti. Togo yeemmo woyite, macharaaraamu gede ikke coyi'ranni noommo. Insanni roore lowo yanna loosunni daafuroommo; batinye hige usuramoommo; batinye hige ganamoommo; batinye hige reyote afiinni gatoommo.

²⁴Ayihude sajjiina honse, sajjiina honse higge lichetenni onte goowa gantinoe.

²⁵Sase hinge siqqotenni gannoonnie. Mitte hinge kinnatenni awwaalloonnie. Sase higge markaawe hiiqqantinoe. Mitto hashshanna mitto barra baaru giddo gale hosoommo.

²⁶Doogote xeertinyinni wayinna lolahu, hattono mulqidhannori qarrissinoe. Gosa'yanna daga bala tugginoe. Katamaho, halallitte gobbaranna baaru aana qarru iillinoe. Kaphaasine ammanaanono bala tugginoe.

²⁷Lowo loosinna daafuru amadinoe; batinye hige goxicho hoogoommo. Hudenna goo'ro shetissinoe. Batinye hige qatumoommo; qiidunna kallimma amaddinoe.

²⁸Wole coye baala kiirummokkinni, barru barrunkunni beetekiristaannate daafira yaadanni lowo geeshsha dadilloommo.

²⁹Mitu daafureenna anino ledosi daafuroommokki woyiti nooni? Mitu cubboho uweenna ani giiramoommokki yanna nooni?

³⁰Naaxxa hasiissoommero, ani naaxxeemmohu wolqiweelle'ya leellishanno coyinniiti.

³¹Hegere geeshsha maassaminohu Mootichinke Yesuusi Kiristoosi Anni Maganu kapheemmokkita egennino.

³²Demaasiqote Katamira noommo waro, moote Aretaasira woroonni noo gashshaanchi amadaera hasi're, katamu waalchuwa agaraasine wore agarsiisino.

³³Mannu kayinni gimboolaho wore huxxu masikoote giddoonni qole dirriseennae angasinni gate fuloommo.