Read Sidama_Qullaawa _Maxaafa LAYINKI QORONTOOSI 12 Bible Online

LAYINKI QORONTOOSI 12 - Sidama_Qullaawa _Maxaafa bible

LAYINKI QORONTOOSI 12

¹Adawadha kaa'litannori nookkita ikkiturono, adawadha hasiissuro Mootichu uyinoe xawishshinninna ajuujanni adawadheemmo.

²Kiristoosiha ikkinoha mitto mancho egennoommo. Konne mancho tonaa shoolu diri albaanni sayikki gordi giddora haa'noonnisi. (Haa'noonnisihu maalunkunni ikko ikka hoogo afoommori dino. Maganu kayinni afino).

³Kuni manchi Gannate einota kayinni afoommo. Maalunkunni einoronna hoongoro kayinni diafoommo. Maganu afino.

⁴Isi Gannate hawulukame mannu qaalinni leellannokkihanna coyi'ra dandiinannikki coye macciishshino.

⁵Hattoo manchinni naaxxeemmo. Anera kayinni wolqiweelle'ya ka'a naaxxeemmori dinoe.

⁶Ani halaale coyi'reemmo daafira naaxxate hasi'rummoro gowwa di"ikkeemmo. Ikkollana ayino ane aana la"annohunninna anewiinni macciishshannohunni aleenni sayise hedannokki gede naaxxa qoropheemmo.

⁷Kunni xawinoehu jawu coyinni kainohunni boo'neemmokki gede mannimma'ya utu gede qasanno qarra uyinoonnie. Kunino Sheexaanu sokkaancho ikke runkute qarrisanni boo'neemmokki gede assannoe.

⁸Kuni runkutannoe coyi aani'yanni ho'lanno gede Mooticha sase hige huucci'roommo.

⁹Isi kayinni, «Ane wolqa guutte leeltannohu ate wolqiweelle aana ikkinohura elto'ya ikkitannohe» yiinoe. Kunnira Kiristoosi wolqa aana'ya fooliishshidhanno gede, albinni roorse wolqiweelle'yanni naaxxa baxeemmo.

¹⁰Wolqa afi'reemmohu wolqiweeleemmo woyite ikkinohura, Kiristoosi daafira yee wolqiweelummoro, xonamummoro, mitii'mummoro, xiiwamummoro, qarramummoro tashshi yaannoe.

¹¹Naaxxa'yanni gowwa ikkoommo. Togo coyi'reemmo gede assitinoonnieri ki'neeti. Ane galata hasiissanno'neri ki'neeti. Ewelumma'ya afa hoogginirono, bayirraaddu soqqaamasinewiinni dixe"eemmo.

¹²Ani halaalaancho soqqamaasincho ikkoommota, ani ledo'ne hee'rummo yannara cincatenni loosoommo malaati, dhaggenna maalale leellishshanno.

¹³Ki'nera duha ikka hooga'ya agurranna ki'ne wole beetekiristaannawiinni ajishoommo'nehu mayinniiti? Tini sao ikkitinoro agurre"e.

¹⁴Ki'newa daate qixxaawanna tini sayikkite. Duha ikkammo'nera dihasi'reemmo. Ani ki'ne ikkinnina woxe'ne dihasi'reemmo. Oosonsara woxe miinjitannori iltinonsareeti ikkinnina ooso iltinonsarira woxe dimiinjitanno.

¹⁵Ki'ne daafira woxe'ya agurranna anenee sayise uummoro nafa tashshi yaannoe. Ani ki'ne lowo geeshsha baxanna'ne ki'ne shiima geeshshalla baxxinannie?

¹⁶Ikkitano ikkiro duha di"ikkoommo'ne. Ki'ne xagarrotenninna dogatenni amadoommo'neha lawanno'ne.

¹⁷Soyummo'ne manni mittu widoonni qole nafa mogummo'neni?

¹⁸Tiito ki'newa daanno gede huucci'roommo; hakkonne rodoonke isi ledo soommo. Anfina, Tiito mogi'neni? Aninna isi soqqammoommo'nehu dimitte hedonniiti? Qaafonke dimittete?

¹⁹Xaa geeshsha ninkenee gargadhinanni hee'noommoha lawino'ne? Ninke Kiristoosi widoonni hinge coyi'neemmohu Maganu albaanniiti. Jaalla'ya, ninke konne baala coyi'neemmohu ki'ne keereensateeti.

²⁰Ki'newa dayemmo woyite, miteekke ani hasi'reemmo gede ikkitinikkinni, anino ki'ne hasidhinanni gede ikkummokkinni xaandeemmo yee waajjeemmo. Ki'ne giddo gibbo, hinaasu, hanqu, umo baxa, gosoomu, heme, boo'nanna cancu hee'ranno yee waajjeemmo.

²¹Galagale ki'newa dayemmo woyite, miteekke Magani'ya ki'ne albaanni shollishannoe yee waajjeemmo. Kunni albaanni cubbo loose, hattenne loosino battewiinni, foorretewiinni, busha hamaandewiinni aagintaawe higinokki manni daafira dadillu amadannoe yee waajjeemmo.